Ua fa’amaonia mai e le Komesina le Tumau o le Matagaluega o Leoleo, le maua i le osofaiga a Leoleo i le vaiaso na te’a nei o se vaega tele o fualaau fa’asaina, a’upega ma pulu fana, fa’apea ai ma se tinoitupe tele ina ua osofa’i e Leoleo ni fale se 2 i lalo o se poloaiga mai le Fa’amasinoga.

Na fa’amaonia mai e le afioga a Falana’ipupu Taase Sagapolutele i le Samoa News e fa’apea, e to’atolu ni ali’i ua taofia ma molia e le malo, e mafua mai i le osofaiga sa faia e Leoleo Suesue mai le Vaega a le Vice & Narcotics Units i le vavea o le aso Tofi o le vaiaso na te’a nei i Taputimu ma Alofau.

O lea osofaiga e pei ona saunoa Falana’ipupu, o le taunuuga lea o se suesuega ua leva ona fa’agasolo mai a le Vaega o Leoleo Suesue, e fa’atatau i le fa’afitauli o fualaau fa’asaina o lo o gaosia ma fa’atau solo i totonu o le atunu’u.

O le mae’a ai ona fa’amautu e Leoleo o mau fa’amaonia o le latou suesuega, na talosagaina ai loa se poloaiga mai le Fa’amasinoga e sailia ai fale o i latou ua masalomia i lenei solitulafono.

Na muamua osofa’i e Leoleo se fale i Taputimu, ma taofia mai ai se ali’i se to’atasi, o ia lea o Cody Christian Wood. I lea osofaiga, e le gata sa maua i ai vaega o fualaau fa’asaina, ae sa maua ai fo’i ma se tinoitupe e tusa ma le $54,003, lea e aofia ai le $495 sa maua i le tino o Wood.

O le fale na osofa’i e Leoleo i Alofau, na taofia mai ai le ali’i o Steve Tuatoo, o se ali’i sa avea ma Leoleo a le malo, sa ia umia fo’i le tulaga o le Satini. O le ali’i lona tolu na taofia e Leoleo i lenei osofaiga, o se ali’i ave taxi la’u pasese i luga o le alatele, o ia lea o Lemalie Taisia.

O isi mea na maua i le osofaiga e aofia ai ni fana se tolu, le ituaiga o le 12 shot gun; 357mm, ma le ituaiga o le ballet shotgun. O ia fana na maua ua mae’a ona utu i pulufana. Sa maua ai fo’i e Leoleo ututau e 144 o le fana o le 357mm, faapea ai ma le anoanoa’i o meatotino a tagata eseese o le atunu’u sa masalomia le gaoia ae ave e fa’atau mai ai fualaau fa’asaina.

O vaega o le pauta faasaina o le aisa sa maua i lenei osofaiga, e tusa lona tau ma le $50,000 i le $55,000, ae o mariuana sa maua, e tusa lona tau ma le $20,000 e oo atu i le $25,000.

O le vaiaso nei lea na tau fai tutula’i uma ai i latou nei e to’atolu i luma o le fa’amasinoga mo a latou ulua’i iloiloga, ma ua fa’atulaga ai nei le vaiaso fou e faia ai a latou iloiloga autu.

E $200,000 le vaega tupe lea ua faatulaga e totogi ona fa’atoa mafai lea ona tatala le ali’i o Wood i tua, e $25,000 lea ua fa’atulaga e tatala ai Tuatoo i tua, ae $5,000 lea ua fa’atulaga e tatala ai le ali’i o Taisia i tua mai le toese i Tafuna.

Na taua e Falanaipupu le tulaga sa i ai lenei osofaiga tele a Leoleo, e le gata i le umi o le taimi na fuafua mai ai, ae o le galulue fa’atasi fo’i o Leoleo i le fa’atinoina o lenei galuega faigata.

Talu ona toe fa’avae mai le Vaega Suesue Faapitoa a Leoleo latou te sailia fualaau fa’asaina, ua molimauina le to’atele o ni isi o Leoleo ua fa’amavae mai le galuega, e pei ona fa’amaonia mai e le Komesina o Leoleo ia Lei Sonny Thompson i se fa’atalatalanoaga ma le Samoa News i nai masina ua mavae atu.

Na taua e Le’i i le Samoa News i lea fa’atalatalanoaga e fa’apea, tusa lava poo ai e a’afia i lenei ituaiga solitulafono, o le taimi lava e faamaonia ai lona faatinoina o le solitulafono, o le taimi lava foi lena e taofia ai o ia ma molia i le tulafono.

O le ulua’i osofaiga tele lenei a Leoleo talu ona fa’aa’upegaina i latou i le masina na te’a nei, mo le fa’atinoina o le galuega e pei ona galulue ai i le ao ma le po, o le sailia lea o i latou o lo o fa’atinoina solitulafono eseese i le atunu’u.