Ads by Google Ads by Google

Teena talosaga e fa’aleaoga ai le taofia faapagota o Dean Fletcher

ausage@samoanews.com

Ua teena e le afioga i le ali’i fa’amasino ia Fiti A. Sunia le talosaga na fa’aulu e le ali’i loia ia Mathoni McCormick, mo se poloaiga a le fa’amasinoga e fa’aleaoga ai le poloaiga na pu’e fa’apagota ai le ali’i sitiseni Amerika ia Dean J. Fletcheer, lea o lo o tu’uaia e le malo o Tonga i lona fasiotia lea o lona to’alua.

 

I le teena ai e le fa’amasinoga fa’aitumalo o le talosaga a McCormick, ua toe fa’atulaga ai loa le isi iloiloga o lenei mataupu e toe fofogaina lea i le aso 22 Novema i le itula e 8:30 i le taeao, ma o lo o taofia pea Fletcher i le toese i Tafuna e aunoa ma se tupe ua fa’atulaga e tatala ai o ia i tua e fa’atali ai le aso lea ua e fa’atulaga e toe tula’i ai i luma o le fa’amasinoga.

 

E tele vaega na taua e McCormick i lana folasaga e tatau ai ona talia e le fa’amasinoga lana talosagaina ia fa’aleaoga le poloaiga na mafua ai ona taofia fa’apagota Fletcher i le toese.

 

Mo se faata’ita’iga e pei ona finau le ali’i loia o lo o tula’i mo Fletcher, o lo o tu’uaia e le malo le ua molia i lona fa’atamala lea e tu’u mai fa’amaumauga sa’o e tusa ai o lona ulufale mai i le teritori, aemaise ai o le leai lea o se fu’a samasama na sisi mai i luma o lana va’a e fa’ailoa mai ai le mae’a lea ona tu’uina atu o le fa’atanaga e ulufale mai ai i Amerika Samoa, peita’i e le o taua i totonu o le pepa o le tagi na fa’aulu e le malo le taimi na fesiligia ai e sui o le Ofisa o Tiute ia Fletcher e fa’atatau i fa’amatalaga e tatau ona ia tu’uina atu.

 

Na finau McCormick e fa’apea, e le o taua i le pepa o le tagi a le malo po o ai ali’i Ofisa o le Tiute na fesiligia le ua molia i le taimi na taunu’u mai ai, se’i vagana ai ali’i Leoleo o lo o taua sa latou maua o ia, ma afai la o ali’i Leoleo ia o lo o taua na fesiligia le ua molia, e tatau ona fa’amanino mai e le malo i totonu o le pepa o tagi, o Leoleo ia sa fai ma sui o le Ofisa o Tiute e fesiligia le ua molia e tusa ai o lona ulufale mai i le atunu’u.

 

Na finau atili le ali’i loia e fa’apea, talu ai o fa’amatalaga o lo o i le pepa o le tagi sa fa’aulu e le malo, lea na mafua ai ona saini e le fa’amasinoga le poloaiga e pu’e fa’apagota ai Fletcher, o le mafua’aga lea o lona finau ina ia fa’aleaoga le poloaiga a le fa’amasinoga na pu’e fa’apagota ai le ua molia.

 

Na fa’auilavea Sunia ma fa’ailoa ia McCormick e fa’apea, afai o le tulaga lea o lo o ia finau mai ai, lona uiga o le a toe amata mai taualumaga o le mataupu i lona amataga.

 

I le taimi muamua o le fa’afinauga a McCormick, sa ia finau ai e solofua le moliaga fa’asaga ia Fletcher, ona e le o talafeagai le poloaiga na pu’e fa’apagota ai o ia, ae ina ua si’isi’i i luga le si’ufofoga o le afioga i le ali’i fa’amasino ia Sunia ma ia tu’i fesili le ali’i loia e ta’u atu le mafua’aga e ala ai ona le talafeagai le poloaiga a le fa’amasinoga na pu’e fa’apagota ai le ua molia, na mafua ai loa ona toe fa’asa’o e McCormick lana talosaga, e le o le solofua o le moliaga fa’asaga i le ali’i ua molia le talosaga e tatau ona faia, ae tatau ona ia finau i le fa’amasinoga ina ia fa’aleaoga le poloaiga na pu’e fa’apagota ai le ua molia.

 

Na faitau e Sunia ia McCormick upu uma o lo o i totonu o le poloaiga na sainia e le fa’amasinoga e pu’e fa’apagota ai le ua molia, e le o i ai se tulaga e atagia mai ai le le talafeagai o le poloaiga.

 

Na taua e le loia a le malo ia Jerard Murphy i le fa’amasinoga e fa’apea, e talitonu le malo e le o le talosaga sa’o lea e tatau ona faila e le itu tete’e, o le talosaga ina ia teena le moliaga fa’asaga ia Fletcher, ae afai o le agaga lea o le itu tete’e, e augofie le malo i le tulaga lea, atoa ai ma le toe amata mai o le mataupu i lona amataga, e aofia ai le solofua o le moliaga e le fa’amasinoga ae toe faila e le malo.

 

Na talosaga fo’i Murphy i le fa’amasinoga, afai e finagalo i ai le fa’amasinoga e solofua le moliaga fa’asaga ia Fletcher, ona talosaga lea o le malo ina ia tatala Fletcher i lalo o le va’ava’aiga a le ali’i loia ia Ude [Mark Ude], e fa’atali ai le taimi e toe faila ai e le malo le moliaga fa’asaga ia te ia i le aso e sosoo ai.

 

Ae i le mae’a ai ona iloilo e le fa’amasinoga o fa’afinauga a itu e lua e uiga i lenei mataupu, na fa’ailoa ai loa e Sunia le teena o le talosaga a le itu tete’e, ae o le a toe tolopo le mataupu a Fletcher e toe fofogaina i le isi 3 vaiaso.