Ads by Google Ads by Google

Talia talosaga EFKAS e fa’atula’i ese Amaama ma le maota Ekalesia


Ni isi o Faifeau sa auai i le iloiloga o le mataupu i le va o le Ekalesia EFKAS ma le Failautusi Aoao ia Rev. Amaama Tofaeono i le masina na te’a nei i luma o le Fa’amasinoga Maualuga. [ata AF]
ausage@samoanews.com

I le silia ai i ni nai vaiaso o fa’atali le Ekalesia Faapotopotoga Kerisiano i Amerika Samoa (EFKAS) i se fa’aiuga o le latou tagi sa tu’uina atu i le Fa’amasinoga Maualuga, o le vaiaso na te’a nei na tu’uina aloaia mai ai e le Vaega Iloilo o le Fa’amasinoga Maualug a Amerika Samoa lana fa’aiuga, e lagolagoina ai le tagi a le Ekalesia Aoao fa’asaga ia Amaama Tofaeono.

 

O le tagi a le Ekalesia fa’asaga ia Amaama ma lona faletua ia Joan Aleluia Tofaeono, na mafua mai lea ina ua mumusu i laua e tula’i ese ma le maota o le Ekalesia sa la nofoia ao avea ai Amaama ma Failautusi Aoao o le Ekalesia, ina ua faia le fa’aiuga a le Au Toeaiina i le masina o Mati 2017 e fa’amalolo ai le tofi o le Faifeau Fa’au’u o Amaama mo le 3 tausaga.

 

Ae talu ai o le tofi o le Failautusi Aoao o le Ekalesia e tatau ona umia e se tasi ua i ai le tofi o le Faifeau Fa’au’u, na manatu ai loa le Ekalesia ua le toe aloaia le avea o ia ma Failautusi Aoao, e le tatau fo’i la ona ia toe nofoia le maota o le Ekalesia.

 

Na taua e le Fa’amasinoga i lana fa’aiuga e fa’apea, e manino mau e fa’atatau i lenei mataupu, e agava’a ona nofo se tasi i le maota o le Ekalesia pe afai e avea o ia ma Failautusi Aoao, ae o le taimi lava na aveese ai le tofi Failautusi Aoao mai ia Amaama, o le taimi fo’i lea na le toe agava’a ai loa o ia ona nofo i le maota o le Ekalesia.

 

AMATAGA O LE TAGI

 

O le mataupu a le Ekalesia EFKAS na tofu atu i luma o le Vaega Iloilo o le Fa’amasinoga Maualuga, ina ua faila e le Ekalesia sa latou tagi fa’asaga ia Amaama ma lona faletua i le amataga o le masina ua te’a, ina ua mumusu i laua e tula’i ese ma le maota o le Ekalesia, ma talosagaina ai se poloaiga a le Fa’amasinoga. O le fa’amasinoga o lenei tagi sa faia i le aso 30-31 Me 2017.

 

O le tama’ita’i loia ia Gwen Tauiliili-Langkilde na tula’i mo le Ekalesia, ae o le ali’i loia ia  Toetasi Tuiteleleapaga na tula’i mo Amaama ma lona faletua.

 

I le taimi o le fa’amasinoga iloilo, na valaau ai e le Ekalesia le Sui Taitaifono ia Rev. Elder Fa’aeteete Saifoloi e molimau mo le latou itu, ae o Amaama ma lona faletua sa valaau e le itu tete’e e molimau mo le latou itu. Mulimuli ane toe valaau e le itu a le Ekalesia le Failautusi o le Komiti a le Au Toeaiina ia Rev. Elder Leatulagi Fa’alevao mo le tu’uina atu o isi fa’amatalaga mo le latou itu.

 

E tele fa’amaumauga na mafai ona maua e le Fa’amasinoga e tusa ai o lenei mataupu, ma o nei fa’amaumauga uma sa fesoasoani lea i le fa’aiuga a le Fa’amasinoga, e pei la o le tulaga lenei, i le tausaga e 1980, na pasia ai e le Ekalesia Aoao i lana Fonotagatele teuteuga i lana Fa’avae, ma le fa’amoemoe e lima ta’ita’iina ai galuega fa’atino a le Ekalesia Aoao.

 

I lalo o lea Fa’avae, o lo o taua ai le fausia o le Komiti a le Au Toeaina mai Faifeau Toeaiina e to’a 23, o i latou ia e gafa ma le iloiloina o mataupu e fa’atatau i le soifua fa’aleaga o tagata lotu atoa ai ma le ekalesia atoa, ma o se tasi o tiute tauave a le Komiti a le Au Toeaiina, o le fa’au’uina lea o tofi faifeau atoa ai ma le tu’uina atu o fa’aiuga fa’asaga i faifeau, ma o ia fa’aiuga fai o lo o fa’atulaga mai i totonu o le tusi o le ‘Fa’aiuga a le Au Toeaiina’.

 

I le tusi o le ‘Fa’aiuga a le Au Toeaiina’, o lo o atagia mai ai le fa’asalaina lea o faifeau pe afai latou te fa’atinoina ni agasala mamafa e pei o le fasioti tagata, mulilua, ma o fa’aiuga e tu’uina atu ia te i latou e aofia ai le fa’asala mo le ta’i 3 tausaga.

 

O le tiute tauave o le Komiti a le Au Toeaiina o le vaavaaia lea o le ola fa’aleagaga o tagata lotu ma le ekalesia atoa i le tausaga, ae o le Fonotele a le Ekalesia lea fo’i e aofia ai ma le Au Toeaiina fa’apea ai le Komiti Tumau, e fa’atoa usuia la latou fonotaga i le ta’i 2 tausaga.

 

O le tausaga e 2016 na filifilia ai Amaama e avea ma Failautusi Aoao o le Ekalesia, ma o lea tofiga e moomia ai se faifeau ua i ai lona tofi faifeau fa’au’u na te umia lea tofi maualuga mo le 4 tausaga, ma mafai ai loa ona nofo o ia ma lona aiga i le maota o le Ekalesia e pei ona tula’i mai ai lenei mataupu, e le gata e latalata i le Ofisa autu ae fa’a faigofie ai fo’i mo ana galuega. E leai se maliliega mo le nofoia ai e Amaama o le fale, e leai se tupe na totogi mo le fale se’i vagana ai lava le totogi e ia o lana pili vai ma le eletise.

 

I le fa’aiuga o le tausaga e 2016 na aga’i atu ai le faletua o Amaama ma talosagaina se fesoasoani a Rev. Elder Fa’aete’ete Saifoloi, e mafua mai i se tulaga fa’aletonu ua tula’i mai i lo la aiga, ma maua ai loa le avanoa e talanoa to’atolu ai i latou e uiga i lenei mataupu, ma i’u ina tofu atu ai le mataupu i luma o le Au Toeaiina, ma faia ai loa le ulua’i faaiuga a le Au Toeaiina e fa’amalolo le tofi faifeau o Amaama mo le 4 vaiaso ae maua pea lona totogi.

 

I le tuana’i ai o tusitusiga i le va o le Au Toeaiina ma Amaama ma lona faletua i le va o Ianuari ma Fepuari o le tausaga nei, na toe tu’uina atu ai loa le isi fa’aiuga a le Au Toeaiina e fa’amalolo ai le tofi faifeau o Amaama mo le 6 vaiaso e aunoa ma se totogi, ma poloaina ai loa fo’i ma lona aiga ina ua tula’i ese ma le maota o le Ekalesia.

 

O le fonotaga faaiu a le Au Toeaiina ia Mati o le tausaga nei, na aloaia ai loa le fa’aiuga e fa’amalolo ai le tofi faifeau o Amaama mo le 3 tausaga, atoa ai ma le tula’i ese ma le maota o le Ekalesia, peita’i sa fa’atuiese Amaama ma lona aiga, ma tofu atu ai loa lenei mataupu i le Fa’amasinoga.

 

ILOILOGA A LE FA’AMASINOGA

 

E talitonu le fa’amasinoga, e i ai lona malosiaga e iloiloina ai mataupu faapenei i lalo o le tulafono. I le mataupu e pei ona finauina nei, o loo finau mai ai le Ekalesia ina ia fa’atula’i ese Amaama ma le maota ona ua le toe agava’a le avea o ia ma Failautusi Aoao, ina ua le toe i ai sona tofi faifeau fa’au’u.

 

O lo o finau mai fo’i Amaama e le o tusa le fa’amaloloina o lona tofi faifeau fa’au’u ma fa’avae o le Ekalesia, ae i le silasila a le Fa’amasinoga, talu ai e leai se maliliega o se lisi sa faia i le va o le Ekalesia ma Amaama mo le nofoia ai o le fale, ae sa fa’alagolago lava le nofo o Amaama i le fale i le avea ai o ia ma Failautusi Aoao, e tatau ai ona silasila le Fa’amasinoga i le tulaga o le avea ai pea lea o Amaama ma tagata faigaluega a le Ekalesia.

 

O le taimi e fa’amuta ai le avanoa galue o se tagata, e le toe agava’a ai ona galue o ia i se galuega, peita’i e le avea lenei fa’aiuga ma auala e fa’aleagaina ai aia faaletulafono o se tasi. O loo finau mai le Ekalesia ua le toe agava’a le avea o Amaama ma Failatusi Aoao, peita’i o loo finau mai fo’i Amaama e le o tusa ma le Fa’avae le fa’aiuga e fa’amalolo ai lona tofi faifeau fa’au’u.

 

I le mae’a ai ona iloilo e le fa’amasinoga o mau faamaonia uma o lenei mataupu, ua tuuina mai ai loa lana faaiuga e lagolagoina ai le tagi a le Ekalesia fa’asaga ia Amaama, ma afai e leai se tali e toe failaina mai e le itu tete’e mo se fa’amasinoga fou i totonu o aso e 10, o le a tu’uina aloaia mai loa se fa’aiuga a le fa’amasinoga e uiga i lenei mataupu.

 

O le afioga i le ali’i fa’amasino ia Elvis P. Patea sa iloiloina le fa’aiuga o lenei mataupu, ae lagolagosua i ai afioga i Fa’amasino Lagolago ia Su’apaia E. C. Pereira ma Satele Lili’o Ali’itai.