Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

ROPETI MUAO

 

Ua taoto atu nei i se fa’aiuga a le fa’amasinoga maualuga le tali ioe a se ali’i e 46 tausaga le matua, lea ua ia ta’utino sa ia fa’aaoga se a’upega e fa’ao’o ai manu’a i se tamaititi e laititi i lalo o le tulafono ma i’u ina manu’a tigaina ai o ia.

 

Na ulua’i tu’uaia e le malo le susuga a Ropeti Muao i le moliaga mamafa o le fa’ao’olima i le tulaga muamua, o le vaega A lea o solitulafono mamafa lea e mafai ona fa’asala ai se tasi i le fa’asalaga o le soloatoa i le falepuipui, pe fa’asala fo’i i le fa’asalaga fa’a falepuipui e le itiiti ifo i le 10 tausaga ae le sili atu i le 30 tausaga.

 

Ae i lalo o le maliliega lea ua mae’a ona sainia e le ua molia ma le malo, ua ia malie ai e tali ioe i le moliaga lea ua toe teuteu e le malo, ina ia fa’ailoa ai le solitulafono o le fa’ao’olima i le tulaga lua, o se vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asalaga i le salatupe e le silia i le $5,000, poo le fa’asala fo’i i fa’asalaga uma ia e lua.

 

I le tali ioe ai o Muao i le moliaga e pei ona latou malilie i ai ma le malo, sa ia ta’utino ai e faapea, i se taimi o le aso 4 Me 2017 i Amerika Samoa, sa ia fa’ao’o ai ni manu’a tuga i se ali’i e laititi i lalo o le tulafono, e ala i lona fa’aaoga o se seleulu e 12 inisi le umi e sasa fa’atele ai lona ulu ma lona ua, seia oo ina manu’a tigaina ai o ia ma tafe mai ai le toto mai lona tino.

 

Na ta’utino Muao i luma o le fa’amasinoga, o lana gaioiga sa faia i lea aso ua le tusa lea ma ala o le tulafono, e leai fo’i se fa’atanaga na te fa’atinoina ai lea gaioiga.

 

Ua malilie itu e lua e talosaga i le fa’amasinoga mo se fa’asalaga fa’anofovaavaaia, peita’i ua malamalama le ua molia, e le mafai ona toe suia lana tali ioe ua tuuina atu i le fa’amasinoga, pe afai ae tu’u atu e le fa’amasinoga se fa’asalaga e le tusa ma lona mana’o.

 

O le aso 27 Oketopa lea ua fa’atulaga e toe valaau ai le mataupu a Muao, ma iloa tonu ai pe talia e le fa’amasinoga lana tali ioe pe leai. O lo o taofia pea o ia i le toese ina ua le mafai ona ia totogi le tupe e tatala ai o ia, e fa’atali ai se fa’aiuga o lana mataupu.

 

FERETI LAUTALA

 

E 24 tausaga o se ali’i ua molia e le malo i moliaga mama o le gaoi ma le fa’atupu vevesi i nofoaga faitele, e mafua mai i le fa’alavelave lea na tula’i mai i Utulei i le vaiaso nei, ina ua ia taumafai e gaoi se ato o lo o i ai meafaigaluega kamuta sa i tua o se pikiapu.

 

Na teena e le ali’i o Fereti Lautala tu’uaiga a le malo fa’asaga ia te ia ina ua tula’i i luma o le fa’amasinoga fa’aitumalo i le vaiaso nei, ma ua toe tolopo nei lana mataupu e toe fofogaina i le masina fou o Setema.

 

O se ali’i ave taxi na paka lana ta’avale la’upasese i le vaegatonu na tu ai pe pikapu na osofaia e Lautala, sa ia logoina le Ofisa o Leoleo mo se fesoasoani, i le mae’a ai lea ona ia vaaia o gaioiga sa faia e le ua molia, i lona aveese mai lea o le ato sa i tua o le keli o le ta’avale ona savali lea ma ia i tafatafa o se faleoloa ma nofonofo ai.

 

Na taunu’u Leoleo i le vaega na tula’i mai ai le fa’alavelave, ma fa’asino ai e le molimau le vaega tonu o loo nofo mai ai le ua molia, lea na aga’i atu i ai Leoleo ma latou maua atu ai o ia ma se ato ta’ita’i o lo o i ai ni mea faigaluega i totonu.

 

O ni isi o tuutuuga ua tatala ai e le fa’amasinoga le ua molia i tua, e aofia ai le fa’asa lea ona ia toe solia se tulafono a le malo, fa’asa ona ia toe alu i le vaega na tula’i mai ai le fa’alavelave, a ia avea o ia ma tagatanu’u e tausisi i tulafono a le malo i soo se taimi.

 

Ua fa’asa fo’i ona ia toe tagofia le ‘ava malosi, ona o lo o taua i fa’amaumauga a le fa’amasinoga le malosi o le nanamu pia i le taimi na taofia ai o ia e Leoleo.