Tala otooto o Fa’amasinoga
EDWARD EARY JR
O le aso 27 Iuni lea ua toe tolopo i ai le mataupu a le ali’i o Edward Eary Jr ma le fa’amoemoe o le aso lea e fofoga aloaia ai loa le latou maliliega lea ua sauni e sainia ma le malo, ma le fa’amoemoe e fa’amuta aloaia ai loa tu’utu’uga o le tagi fa’asaga ia te ia.
Na fa’ailoa e le loia a Eary i luma o le fa’amasinoga maualuga i le vaiaso nei, susuga Douglas Fiaui le mae’a lea ona latou tauaaoina o se ofa mai le malo, ma ua latou sauni fo’i e sainia ma talia.
Na fesili le fa’amasino sili ia Michael Kruse ia Fiaui poo le a tonu tuutuuga o le ofa, ae na tali le ali’i loia, o le a tali ioe le ua molia i isi moliaga ae talosaga le malo ina ia solofua isi moliaga. Na fa’ai’u le saunoaga a Fiaui i lona talosagaina lea o le fa’amasinoga ina ia tu’u atu sina taimi sei la talanoa ai ma Eary e uiga i le ofa, ina ia mafai ona fa’amalamalama lelei ia te ia a o le i sauni e tu’uina atu lana tali ioe i le fa’amasinoga.
E le i manatu Fiaui e fa’atulaga se aso tonu e toe valaau ai le mataupu a Eary, ae sa ia talosagaina le tu’u atu o sina taimi puupuu e faia ai feutanaiga mo le fa’amalamalamaina o le ofa a le malo, a mae’a, ona toe logo mai loa lea o le fa’amasinoga mo le toe fa’a kalenaina o se aso e valaau ai le mataupu.
Ae na saunoa Kruse e fa’apea, e le mana’o le fa’amasinoga e toe tula’i mai le fa’afituali lea na tula’i mai i se tasi o mataupu i le 2015, ina ua tu’u atu e le fa’amasinoga le avanoa i loia e talanoa ai mo se maliliega aufa’atasi, peita’i ane ua mae’a ona faia talanoaga mo le maliliega, ae fa’afuase’i ai ona galo le toe tu’uina o le mataupu i luga o le kalena, ae ua laki le mata’ala o ana Ofisa Faanofovaavaaia ua mafua ai ona toe maua fa’amaumauga e uiga i lea mataupu.
E 2 tagi ua faila e le malo fa’asaga ia Eary. O le tagi muamua o lo o tu’uaia ai o ia i moliaga mamafa e 2 o le talepe fale i le tulaga muamua, ma le tagi lona lua o lo o tu’uaia ai fo’i o ia i moliaga mamafa e 4 o le talepe fale i le tulaga muamua, ma o lo o taofia pea le ua molia i le toese i Tafuna e fa’atali ai le aso 27 Iuni lea ua fa’atulaga e toe valaau ai lana mataupu.
REUPENA LAVASI’I
Ua molia nei e le malo le ali’i o Reupena Lavasi’i i le moliaga mamafa o le ave ta’avale a o se’i lona laisene, e mafua mai i le fa’alavelave lea na tula’i mai i le 2 vaiaso talu ai i Faga’alu, ina ua maua o ia e Leoleo o lo o ia fa’afoeina se ta’avale ae o lo o se’i lona laisene.
O le amataga o le tausaga nei na ta’usala ai e le fa’amasinoga fa’aitumalo le ali’i o Lavasi’i i le moliaga mama o le ave ta’avale ‘ona, ma fa’anofovaavaaia ai loa o ia mo le 12 masina i lalo o tuutuuga e ao ona ia usita’i i ai.
O ni isi o ia tuutuuga e aofia ai le se’i e le fa’amasinoga o lana laisene ave ta’avale, ua fa’asa ona ia toe fa’afoeina se ta’avale i totonu o le 6 masina, ae i le 2 vaiaso talu ai ao tiute ai ni Leoleo se to’alua i luga o le alatele a le malo i se vaega o Faga’alu, na la vaaia ai se pikiapu lanu mumu o lo o sau mai le itu i Sisifo e aga’i atu i le itu i Sasa’e i se saoasaoa e le fa’atagaina i lalo o tulafono tau ta’avale afi i luga o le alatele.
Na taofi e Leoleo le ta’avale ma iloa ai o le ali’i o Lavasi’i o lo o ia fa’afoeina le ta’avale, ae ina ua fesiligia o ia i lona laisene ave ta’avale, na tali le ua molia o loo taofi e le fa’amasinoga.
O le moliaga o le ave ta’avale a o se’i le laisene, e mafai ona fa’asala ai se tasi i le toese i Tafuna mo le umi e le silia i le 5 tausaga, pe fa’asala foi i le salatupe e le silia i le $5,000, ae fa’amalosia ai le tatau lea ona fa’a falepuipui mo le umi e 90 aso.