Ads by Google Ads by Google

Tala otooto o Fa’amasinoga


[ata: archive]
ausage@samoanews.com

TETE’E SE TAMA I TU’UAIGA FA’ASAGA IA TE IA

 

O le ali’i lea o loo tumau pea lona tete’e i tu’uaiga a le malo o lona faia lea o uiga mataga i lona afafine, ua ia finau i le fa’amasinoga ina ia fa’atulaga loa se aso e faia ai lana fa’amasinoga autu.

 

O le leai ai o se maliliega e taunu’u i ai itu e lua ao feutana’i mo se taumafaiga e fa’amuta ai lenei mataupu, na fa’ailoa ai loa e le ali’i loia ia Douglas Fiaui i le fa’amasinoga le mana’o a le ua molia e fa’atulaga loa se aso e faia ai lana fa’amasinoga iloilo i luma o tagatanu’u o Amerika Samoa.

 

O le aso 18 Setema 2018 lea ua fa’atulaga e faia ai le fa’amasinoga autu a le ua molia, peita’i afai e avanoa le aso 20 Novema o le tausaga nei, ona fa’ataunu’u ai loa lea i le aso lea lana fa’amasinoga autu.

 

O lo o tu’uaia e le malo le ua molia i lona faia lea o uiga mataga i lona afafine, i lona alu i totonu o le potu o loo moe ai lona afafine ma taumafai e faia i ai uiga mataga ina ia fa’amalie ai ona lagona tu’inanau.

 

Ae na taua e le teineititi na a’afia i Leoleo lona vaaia o lona Tama o ula ana fualaau fa’asaina, le ituaiga o le aisa i totonu o le latou fale taele, ina ua mae’a, sa aga’i atu loa o ia i totonu o lona potu ma faia uiga mataga ia te ia.

 

Na taua atili fo’i e le teineititi i Leoleo e fa’apea, o aso Tofi uma lava e maua ai le totogi a lona Tina, e tu’u ai e lona Tina le tupe i le ua molia, ma, o le taimi lava e maua ai e le ua molia le tupe, na te tuua ai loa lo latou aiga ae alu ese ma le fale ma aga’i atu i fale o ana uo, fa’atoa toe fo’i mai lava i le fale i le leva o le po.

 

O loo tumau pea tuutuuga o loo tatala ai le ua molia i tua e fa’atali ai le aso lea ua fa’atulaga e faia ai lana fa’amasinoga autu. O ni isi o tuutuuga o loo tatala ai o ia i tua e aofia ai le fa’asa lea ona ia toe taumafai e fa’afeso’ota’i lona afafine o loo a’afia i lenei mataupu.

 

FA’ASILI AUPAAU & DAVID FO’A

 

Ua talia e le fa’amasinoga maualuga le talosaga a le loia mo le malo ina ia toe tolopo le iloiloga o le mataupu a Fa’asili Aupaau ma David Fo’a, ona e i ai isi fa’amatalaga fou lea ua fa’atoa latou maua mai Leoleo e tusa ai o le mataupu o lo o tu’uaia ai i laua e to’alua e pei ona taua.

 

O ia fa’amatalaga fou e pei ona taua e le ali’i loia ia Bob Pickett, na maua mai lea ina ua fesiligia e Leoleo ni isi o molimau, ma latou taua ai le i ai fo’i o le isi mataupu e ono a’afia ai fo’i i laua nei e to’alua, lea na osofaia ai se fale o se aiga i le po ae ave fa’agaoi meatotino sa i ai.

 

Ona o ia fa’amatalaga fou e pei ona taua e le loia a le malo, e ono faila e le malo ni isi moliaga fou fa’asaga ia Aupaau ma Fo’a, pe afai ae mae’a lelei su’esu’ega o loo fa’agasolo a Leoleo i le taimi nei.

 

O lo o tu’uaia i laua nei i moliaga o le talepe fale i le tulaga lua, e mafua mai i le fa’alavelave lea o loo tu’uaia ai i laua i lo la osofaia o se fale o se aiga.

 

O loo taofia pea i laua i le toese i Tafuna e fa’atali ai le la iloiloga lea ua fa’atulaga e toe valaauina i le aso Faraile o le vaiaso nei. E ui ua talia e le fa’amasinoga le talosaga ina ia toe tolopo mataupu a i laua e pei ona tu’uaia e le malo, ae na fa’ailoa e le afioga i le fa’amasino sili ia Lealaialoa Michael Kruse i le itu a le malo se atugaluga o le fa’amasinoga o lo o i ai, o le fa’atuatuai lea ona fa’agasolo o iloiloga a i laua nei, ae o loo i ai i lalo o le tulafono a la aia tatau e mafai ai ona vave faia a laua iloiloga e tusa ai o tu’uaiga fa’asaga ia te i laua.

 

Saunoa atili le ali’i fa’amasino sili e fa’apea, afai e oo atu i le aso Faraile nei e leai lava se isi suiga e tula’i mai i lenei mataupu, e ono faia e le fa’amasinoga le fa’aiuga e solofua ai moliaga fa’asaga ia i laua nei.