Ads by Google Ads by Google

Tala otooto o Fa’amasinoga

ausage@samoanews.com

ABRAHAM MCMOORE

 

E 15 fa’aiuga o vaiaso lea ua fa’asala ai e le fa’amasinoga maualuga le ali’i o Abraham McMoore e taofia ai i le toese i Tafuna, ina ua fa’amaonia e le fa’amasinoga moliaga mama e lua sa tu’uaia ai o ia e le malo, le moliaga o le umia fa’asolitulafono o se fana e lei lesitalaina, atoa ai ma le fa’aaoga fa’asolitulafono o se a’upega.

 

O fa’aiuga o vaiasoe 15 e pei ona fa’asala ai McMoore, e amata mai lea i le itula e 6:00 i le afiafi o le aso Faraile e oo atu i le itula e 6:00 i le afiafi o le aso Sa.

 

Na fa’atoese le ua molia i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia. Na tutu fa’atasi loia a itu e lua ina ia fa’asala le ua molia i se fa’asalaga fa’anofovaavaaia, lea fo’i na talia e le fa’amasinoga.

 

Na taua e le loia a le malo ia Gerald Murphy e fa’apea, o lenei mataupu na afua mai ina ua ita le ua molia i le vaega sa paka ai le ta’avale a le ali’i na a’afia, ma alu atu ai loa ma fa’alala se tama’i fana ia te ia, ma e ui e le’i fa’apaina e le ua molia le fana, ae o se gaioiga matuia sa faia ai, aemaise lava o le ta’iina lea o se fana i se isi tagata.

 

E 2 tausaga lea ua faanofovaavaaia ai McMoore e le fa’amasinoga, ae ua poloaina o ia ina ia usita’i i poloaiga a le fa’amasinoga ua tu’uina atu e usita’i i ai.

 

O ni isi o ia poloaiga e aofia ai le fa’asa lea ona ia toe umia se aupega mata’utia e aofia ai ma pulufana, fa’asa ona ia toe tagofia le ‘ava malosi poo fualaau fa’asaina, a ia avea o ia ma tagatanu’u lelei e tausisi i tulafono a le malo.

 

Ua poloaina fo’i le tu’uina atu o se kopi o lenei fa’aiuga i le Komesina o Leoleo, ina ia mautinoa ai e le mafai ona toe lesitalaina se fana i lalo o le igoa o le ua molia.

 

Ua poloaina e le fa’amasinoga le fa’aleagaina o le fana sa fa’atino ai le solitulafono, pe a mae’a aso e 10 talu mai le aso na tuuina mai ai le fa’aiuga a le fa’amasinoga, pe afai e leai se tagi apili e faila e le itu tete’e. Ua poloaina fo’i o ia na te totogi le salatupe e $1,000

 

AKILA AMITUANA’I

 

O le poloaiga faapitoa lea ua tuuina atu e le fa’amasinoga maualuga i le ali’i o Akila Amituana’i, o le taimi lava na te toe soliina ai se poloaiga o poloaiga e tele ua tuuina atu e le fa’amasinoga e usita’i ai, e aofia ai ma lona toe tagofia o le ava malosi, o le taimi loa lena e fa’ati’eti’e ai o ia i le va’a ae toe fa’afo’i loa i lona atunu’u na malaga mai ai.

 

O le vaiaso na te’a nei na tuuina mai ai e le fa’amasinoga maualuga sana faaiuga fa’asaga ia Amituana’i, ina ua fa’amaonia tu’uaiga o lona le usitaia lea o tuutuuga o lana nofovaavaaia sa tuuina atu e le fa’amasinoga e usita’i i ai, le nofoaiga o le avea lea o ia ma tagatanu’u lelei e tusisi i tulafono uma a le malo.

 

Ina ua faamaonia e le fa’amasinoga le moliaga mamafa o le faaoolima i le tulaga muamua fa’asaga ia Amituana’i i ni tausaga ua mavae atu, sa poloaina ai loa o ia ina ia aua ne’i ona toe solia se tulafono, peita’i o le tausaga na te’a nei na ta’usala ai e le fa’amasinoga fa’aitumalo le ua molia i le moliaga mama o le fa’aoolima i le tulaga tolu, e mafua mai i se feseeseaiga i le va o ia ma lana uo teine.

 

“Ia e usita’i i le tuutuuga faapitoa lea ua tuuina atu ia te oe, o le taimi lava e te toe inu ai se isi vailima, o le taimi fo’i lena e toe fa’ati’eti’e ai loa oe i le va’a ma toe fa’afo’i i Samoa”, o le saunoaga lea a le fa’amasino sili ia Michael Kruse.

 

Ua poloaina fo’i le ua molia ina ia fa’aaua pea lona usitaia o tuutuuga uma lava a le fa’amasinoga ua tuuina atu e usita’i i ai, e aofia ai ma poloaiga e tele ua tuuina atu e le fa’amasinoga fa’aitumalo.