TONY LEATUALEVAO

Ua sauni atu nei le ali’i faiaoga mai le Aoga Tulaga muamua i Pago Pago e finauina lana mataupu i luma o ali’i ma tama’ita’i iloilo iuga, i le mae’a ai lea ona fa’ailoa e loia i luma o le fa’amasinoga maualuga i le taeao nei, le leai o se taunu’uga ua mafai ona latou taunu’u i ai ma le fa’amoemoe e fa’amuta ai taualumaga o lenei mataupu.

Ina ua valaau le mataupu a Tony Leatualevao i le taeao ananafi mo le isi ana iloiloga, na fa’ailoa ai e loia i le fa’amasinoga le le mafai ona latou taunu’u i se maliliega aufa’atasi e pei ona masani ai galuega a le malo ma i latou o loo molia, ae sili ai loa pe a taoto atu le mataupu e fa’ataunu’u ona fa’amasinoga autu, ina ia mafai ai ona tu’u atu le avanoa e iloilo ai e tagatanu’u se fa’aiuga amiotonu mo lenei mataupu.

I le mae’a ai ona talia e le afioga i le ali’i fa’amsino sili ia Micheal Kruse o le talosaga ina ia fa’atulaga loa se aso o le fa’amasinoga autu o lenei mataupu, sa ia fautauina ai loia a itu e lua, e le toe mana’omia e le fa’amasinoga le faiga masani lea o loo tupu i le tele o taimi, toe tasi le vaiaso oo i le aso e amata aloaia ai le fa’amasinoga autu ae tulioso mai loia ma se maliliega i le taimi mulimuli ma le manatu e fa’amuta ai taualumaga o le mataupu.

Saunoa Kruse e fa’apea, e na o le tiga o le finagalo o le fa’amasinoga i le tula’i soo mai o lea faiga masani.

O Leatualevao o loo tu’uaia e le malo i le moliaga mama o le sauaina lea o fanau i le tulaga lua, e mafua mai i le fa’alavelave lea sa ia fa’aaoga ai se laau e sasa ai se ali’i aoga i le masina o Novema o le tausaga na te’a nei.

I fa’amaumauga a le fa’amasinoga o loo taua ai e le ua molia e fa’apea, sa na mafua ona ia sasa le tamaititi aoga na a’afia, sa ia taumafai e fa’atonu o ia i lona le usitaia lea o le fa’atonuga e aua ne’i toe fusu i le aiga.

O loo tumau pea tuutuuga a le fa’amsinoga o loo tatala ai le ua molia i tua, e fa’atali ai le aso lea ua fa’atulaga e faia ai lana fa’amasinoga autu.

TALIGALU AH SIU

Ua talia e le fa’amasinoga maualuga le fautauga a le Ofisa Fa’anofovaavaaia, mo se avanoa e fa’ataga ai Taligalu Ah Siu ona auina atu i Hawaii mo togafitiga o le gasegase o lona fiafia lea e fa’aaoga fualaau oona o loo a’afia ai o ia, ina ia mafai ai ona foia lea fa’afitauli ae toe fa’afo’i ai le malosi o lona mafaufau i le tulaga lelei sa i ai.

Na taua e loia a itu e lua e fa’apea, talu ai e le o i ai se poloaiga e mafai ai ona togafiti i Amerika Samoa i latou o loo a’afia i a’afiaga o fualaau fa’asaina, e lagolagoina ai e itu e lua le talosaga mo se avanoa e auina atu ai Ah Siu i Hawaii mo togafitiga, ma ua sauni fo’i lona aiga e fa’atupe tulaga uma ina ia mafai ai ona taunu’u o ia i lona fa’amoemoe o loo i ai, ae na saunoa le afioga i le ali’i fa’amasino sili ia Michael Kruse e fa’apea, ua talia e le fa’amasinoga talosaga a loia atoa ai ma le fautauga a le Ofisa Fa’anofovaavaaia mo le auina atu o Ah Siu i Hawaii mo togafitiga, ae afai e mae’a togafitiga ae tumau pea le fa’afitauli o lo’o aafia ai le ua molia, na pau le polokalame a le fa’amasinoga e mafai ona fesoasoani ai ia Ah Siu, “o le falepuipui i Tafuna”.

O le taeao nei na fa’atulaga e tu’uina mai ai se fa’aiuga a le fa’amasinoga maualuga, e tusa ai o le mataupu lea ua ta’usala ai Ah Siu i lona le usitaia lea o tuutuuga o lana nofovaavaaia, o le fa’asa lea ona ia toe tagofia pe fa’aaoga vaega o fualaau fa’asaina.

A o taofia ai le ua molia i le toese mo le tuliina o lana fa’asalaga fa’a falepuipui, e mafua mai i le fa’alavelave lea na ta’usala ai o ia i le moliaga mamafa o le talepe fale, e mafua mai ina ua ia osofa’i fale o aiga aemaise ai o lona aveese mai o kesi o ta’avale a ni isi o aiga mai totonu o tane kesi o ta’avale ae fa’aaoga e sogisogi ai, sa mafai ai ona ia tagofia vaega o le laau fa’asaina o le mariuana.

Saunoa Kruse e faapea, o se tasi o mafua’aga o le taofia e le fa’amasinoga o Ah Siu i le toese i Tafuna, ina ia puipuia mai ai o ia mai lona toe fa’aaoga o kesi o ta’avale e sogisogi ai, peita’i e ui i le taofia ai o ia i le toese, sa mafai lava e ia ona tagofia vaega o le laau fa’asaina o le mariuana, lea ua mafua ai ona ta’usala o ia i tu’uaiga o lona le usita’i lea o poloaiga o lana fa’anofovaavaaia.

VINCENT VILIAMU

Ua molia nei e le malo le ali’i o Vincent Viliamu i le moliaga o le ave ta’avale ao se’i lona laisene, e mafua mai i le fa’alavelave lea na maua ai o ia o loo ia fa’afoeina se ta’avale i luga o le auala a le malo i Nu’uuli i le vaiaso na te’a nei.

O se tama’i fa’alavelave tau ta’avale na tula’i mai i Nu’uuli, ina ua so’a e se Van lanu uliuli autafa o se isi ta’avale sa paka i luma o se faleoloa, na mafua ai loa ona vili e molimau sa i ai i le taimi o le fa’alavelave ia Leoleo mo se fesoasoani, ina ua latou molimauina le taumafai o le ave ta’avale o le Van e sola ese, ae ina ua fesiligia Viliamu e Leoleo na iloa ai o loo se’i lona laisene ave ta’avale.

O le fa’aiuga o le masina nei lea ua fa’amoemoe e toe tula’i ai Viliamu i luma o le fa’amasinoga mo le isi ana iloiloga.