Ads by Google Ads by Google

Tala otooto o Fa’amasinoga

ausage@samoanews.com

MAUA LE ALI’I OVERSTAYER INA UA ‘ONA LEAGA

 

O le ali’i lea na ulufale mai i le pemita e 30 aso i le masina o Me 2016 ma nofo fa’asolitulafono ai lava i le teritori e leai ni pepa nofomau, ua taofia nei o ia i le toese i Tafuna e fa’atali ai taualumaga o lana mataupu ma fa’atali ai le aso e toe fa’afo’i atu ai o ia i lona atunu’u na malaga mai ai, ina ua maua taitaia e le o i ai ni ona pepa nofomau.

 

O le ali’i o Valaau Ta’ase ua tu’uaia nei e le malo i le moliaga o le tu fua i le fanua o le isi aiga atoa ai ma le fa’atupu vevesi i nofoaga faitele, e mafua mai i le fa’alavelave lea na tula’i mai i le fa’aiuga o le vaiaso na te’a nei i Fagatogo, ina ua pisapisao ma laulauvavale i se inugapia sa faia i le fale o se tasi o ana uo.

 

Na taua i fa’amaumauga a le fa’amasinoga le laulauvavale o le alii o Taase ma sosoo ai ma lona alu i le fale o le ali’i sa la tau upu ma lu’i o ia e sau i fafo la te fufusu, peita’i ao fa’atalitali pea Ta’ase i fafo o le fale o le ali’i lea ma le fa’amoemoe e sau loa i fafo ona la fufusu loa lea, na fa’afuase’i ona taunu’u Leoleo ma pu’e fa’apagota ai o ia ma taofia loa i le toese i Tafuna.

 

Na fa’ailoa e le afioga i le ali’i fa’amasino ia Fiti Sunia ia Ta’ase i le aso Lua na te’a nei e fa’apea, talu ai o ia o se tagata asiasi mai i le teritori, sa tatau ona ia usitaia tulafono uma a le malo o Amerika Samoa e aofia ai ma tulafono a le Ofisa o Femalagaaiga.

 

TULIPE ASOTAU

 

Ua tu’uaia nei e le malo le tama’ita’i o Tulipe Asotau i le moliaga o le ave ta’avale ao se’i lona laisene ave ta’avale, e mafua mai i le fa’alavelave lea na tula’i mai i le 2 vaiaso talu ai i Aua, ina ua maua e Leoleo o loo ia fa’afoeina se ta’avale ae o loo se’i lona laisene mo le 6 masina, e mafua mai ina ua ta’usala e le fa’amasinoga fa’aitumalo o ia i le moliaga mama o le ave ta’avale ‘ona i le amataga o le tausaga nei.

 

Na avea le saoasaoa o le ta’avale na fa’afoe e Asotau ma mafua’aga na taofia ai e Leoleo lana ta’avale, ae ina ua fesiligia lana laisene ave ta’avale, o iina na iloa ai o loo se’i e le fa’amasinoga lona laisene.

 

O ni isi o tuutuuga ua tatala ai Asotau i tua e fa’atalitali ai le isi ana iloiloga lea ua fa’atulaga mo le masina fou o Ianuari, o le fa’asa lea o ia ona ia toe fa’afoeina se ta’avale, fa’asa fo’i ona ia toe solia se tulafono a le malo, a ia avea o ia ma tagatanu’u e tausisi i tulafono a le malo i taimi uma.

 

FILIPO UELE

 

E 12 masina lea ua nofovaavaaia ai le ali’i o Filipo Uele i luma o le fa’amasinoga fa’aitumalo, ina ua ta’usala o ia i le moliaga o le fa’ao’olima i le tulaga tolu, i le mae’a ai lea ona talia e le fa’amasinoga o se maliliega sa latou sainia ma le malo.

 

E 3 moliaga mama na ulua’i tu’uaia ai e le malo le ali’i o Uele, ae i lalo o le maliliega na latou sainia ma le malo ma talia e le fa’amasinoga, ua ia tali ioe ai i le moliaga o le faaoolima i le tulaga tolu, ae solofua e le fa’amasinoga moliaga e lua o le faatupu vevesi i nofoaga faitele atoa ai ma le faaleaga meatotino i le tulaga tolu.

 

O se inugapia na tula’i mai i le va o Uele ma ni isi o ana uo, na mafua ai loa ona tula’i mai se vevesi ma i’u ina faaoolima ai Uele i lana uo, sosoo ai ma lona faaleagaina o lana telefoni feavea’i.

 

O ni isi o tuutuuga o le nofovaavaaia a Uele e aofia ai lona totogi i le salatupe e $125, auai i aoaoga e fesoasoani ai i le ita ma le tagofia o le ‘ava malosi, aemaise ai fo’i le fa’asa lea ona ia toe soli se tulafono a le malo.