TULIESE TALIU

O le naunau tele o le Fa’amasinoga e fia mautinoa atili tulaga e fa’atatau i le ali’i o Tuliese Taliu, ua mafua ai loa ona toe fa’atulaga le isi iloiloga faapitoa a lenei ali’i i le taeao nei, ina ia mafai ai ona silafia e le fa’amasinoga le tulaga ua i ai lana mataupu e pei ona fa’anofovaavaaia ai o ia e le fa’amasinoga maualuga.

O le ali’i o Taliu sa aofia i ali’i e to’afa na tu’uaia e le malo i le fa’alavelave lea na tafana ai le Ofisa o Leoleo i Leone i le 2 tausaga talu ai, lea ua ta’usala e le fa’amasinoga i le moliaga mama o le fesoasoani e fa’atino le solitulafono o le fa’aleaga meatotino i le tulaga muamua, ma manatu ai loa le fa’amasinoga e avea le 20 masina lea na taofia ai i latou nei e to’afa i le toese e fai ma a latou fa’asalaga i lenei mataupu.

O le vaiaso la na te’a nei na tatala ai i tua ali’i e to’alua sa tu’uaia fa’atasi ma Taliu, ae taofia ai pea na o Taliu ma le ali’i o Mosegi Solia Jr i le toese, ona o lo o i ai se isi mataupu o lo o tu’uaia ai Solia Jr, ae o Taliu o lo o i ai le poloaiga a le fa’amasinoga na te tuua ai le teritori mo le umi e 5 tausaga.

Na fa’ailoa e le loia a Taliu ia Doug Fiaui i le fa’amasinoga i le vaiaso na te’a nei e fa’apea, e le mafai ona tatalaina le ua molia i tua, ona o lea o lo o taoto le faaiuga sa tu’uina mai e le afioga i le ali’i fa’amasino ia Lyle L. Richmond na te tuua ai le atunu’u mo le 5 tausaga, ina ua ta’usala o ia e le fa’amasinoga i le fa’alavelave lea na maua ai fanau, pulu fana ma mariuana i totonu o lana ta’avale.

O le fia malamalama atili o le afioga i le ali’i fa’amasino ia Elvis P. Patea i tuutuuga a le fa’amasinoga e fa’atatau i le mataupu muamua a Taliu, na ia poloaina ai loa le tatau lea ona valaauina le iloiloga lea e fa’ataunu’u i le taeao nei.

Saunoa Patea e fa’apea, e tatau i le fa’amasinoga ona malamalama atoatoa i le tulaga o le mataupu a Taliu, ina ia aua ai ne’i toe fa’aluaina le tele o isi mataupu o lo o poloaina ai e le fa’amasinoga le toe fa’afo’i o tagata i o latou atunu’u, ae uma ane le isi vaiaso ua toe vaaia i latou i laueleele o Amerika Samoa.

O le mataupu ua ta’usala ai Taliu na alia’e mai ina ua taofi e Leoleo le ta’avale sa ia fa’afoeina i Avau i le alu saoasaoa, ae maua ai e leoleo ni pulufana se 3 i tafatafa o le faitoto’a o le ta’avale.

Ae ina ua sailia atoa e leoleo le ta’avale, sa maua ai fo’i isi pulufana, atoa ai ma se paipa e ula ai le pauta oona o le aisa, faapea ai ma sikaleti mariuana e 4.

Ina ua ta’usala e le fa’amasinoga ia Taliu i le moliaga o le umia fa’asolitulafono o fualaau faasaina ma pulufana, na faanofovaavaaia ai loa o ia mo le 5 tausaga i lalo o tuutuuga e ao ona ia usita’i i ai, ma o ni isi o ia tuutuuga e aofia ai lona tuliina o masina e 20 i le toese i Tafuna, lea fo’i ua mae’a ona ia tuliina, atoa ai ma lona tuua o le atunu’u ae toe fo’i atu i Samoa mo le umi o lana nofovaavaaia.

O lo o taofia pea Taliu i le toese i Tafuna e fa’atali ai se fa’aiuga o lana iloiloga lea ua fa’atulaga mo le taeao nei.

VALOAGA IESE

O le vaiaso nei lea ua fa’atulaga e tu’uina atu ai se fa’aiuga a le fa’amasinoga maualuga fa’asaga ia Valoaga Iese, i le mae’a ai lea ona ia ta’utino i luma o ali’i fa’amasino, e fa’amaonia tu’uaiga fa’asaga ia te ia, i lona le usitaia lea o poloaiga o lana nofovaavaaia sa tu’uina atu e le fa’amasinoga i le 3 tausaga talu ai.

O ni isi o tuutuuga o le nofovaavaaia a Iese na tu’u atu e le fa’amasinoga ina ua ta’usala o ia i le moliaga o le talepe fale i le tulaga muamua, o le fa’asa lea ona ia toe tagofia le ‘ava malosi, asiasi i le Ofisa Fa’anofovaavaaia i masina ta’itasi, aua ne’i ona toe solia se tulafono, ma ia totogi le salatupe e $1,000 atoa ai ma le tupe mo meatotino e $500.

O le masina o Oketopa na te’a nei na toe a’afia ai fo’i Iese i le tulafono ina ua taofia o ia e Leoleo ma tu’uaia e le malo i le moliaga mama o le fa’atupu vevesi i nofoaga faitele, e mafua mai i le fa’alavelave lea na ia fa’ao’olima ai i se ali’i sa latou inupia fa’atasi i Tafuna.

ua fautuaina e le Ofisa Faanofovaavaaia ma le malo ia le fa’amaasinoga ina ia fa’aleaoga tuutuuga o le poloaiga a Iese, ae poloaina loa o ia e tuli fa’amae’a lana fa’asalaga fa’a falepuipui e 12 masina o lo o totoe i le toese i Tafuna.

TU’UAIA SE ALI’I I LONA FAIA O SAUAGA I LONA TO’ALUA

O le ali’i e 42 tausaga le matua lea na taofia mai e Leoleo i le vaiaso na te’a nei, ona o tu’uaiga i lona faia lea o sau’aga i lona to’alua, e ala i lona fasi o ia ao ‘ona ma save’u ai le nonofo filemu o tagata i totonu o le aiga, ua molia nei o ia e le malo i le solitulafono mama o le fa’atupu vevesi i totonu o le aiga faapea ai ma le faaoolima i le tulaga tolu.

A o le i tu’uina atu e le afioga i le tama’ita’i fa’amasino ia Gwen Tauiliili-Langkilde le mataupu a le ali’i ua molia ina ia fofogaina lea i luma o le Fa’amasinoga o Aiga, Fualaau Fa’asaina ma le ‘Avamalosi, sa ia poloaina le ua molia ina ia aua ne’i one toe taumafai e fa’afeso’ota’i lona to’alua ma lana fanau, a ia saili se isi nofoaga e nofo ai e fa’atalitali ai taualumaga o lana mataupu.

O le vevesi na tula’i mai ina ua ‘ona atu le ua molia ma fasi lona to’alua, ma vili ai loa e aiga tuaoi le ofisa o Leoleo.