Ads by Google Ads by Google

Tala otooto o Fa’amasinoga

ausage@samoanews.com

MOSEGI SOLIA JR

 

Ua mae’a nei ona saina se maliliega i le va o le malo ma le ali’i o Mosegi Solia Jr, ma le fa’amoemoe o le maliliega lea e fa’amuta aloaia ai loa taualumaga o le mataupu o lo o tu’uaia ai e le malo ia Solia Jr, pe afai ae talia e le fa’amasinoga maualuga tuutuuga o lenei maliliega.

 

O le taeao ananafi na fa’amoemoe e fofoga aloaia ai i luma o le fa’amasinoga maualuga tuutuuga o le maliliega lea ua mae’a ona sainia e itu e lua, ae talu ai o lo o i ai ni isi o vaega o le gagana o loo i totonu o le maliliega e tatau ona fa’amanino atili, o le mafua’aga lea na finagalo ai loa le afioga i le ali’i fa’amasino ia Elvis P. Patea ina ia toe tolopo le fofogaina o lenei maliliega i le aso Lua o le vaiaso fou.

 

O le tausaga fou lea na fa’amoemoe e toe valaau ai le mataupu i le va o le malo ma Solia Jr, ae i le mae’a ai ona tu’uina atu o le fa’asalaga a le fa’amasinoga i le aso Lua na te’a nei, fa’asaga i ali’i e to’afa ia na tu’uaia i le fa’alavelave na tafana ai le Ofisa o Leoleo i Leone i le 2 tausaga talu ai, lea fo’i e aofia ai ma Solia Jr, na poloaina ai loa e Patea itu e lua ina ia galulue e fa’amautu se tulaga e tatau ona i ai le mataupu a Solia Jr i le vaiaso nei, i le faia o se maliliega poo le fa’aauau pea o le aso e fa’atulaga ai le fa’amasinoga autu.

 

O le susuga a Solia Jr o lo o tu’uaia e le malo i le moliaga mamafa o le umia fa’asolitulafono o vaega o le pauta fa’asaina o le aisa, atoa ai ma le isi moliaga mamafa o le tete’e atu lea i Leoleo ao taumafai e pu’e fa’apagota o ia.

 

O tu’uaiga fa’asaga ia Solia Jr na alia’e mai i le tausaga na te’a nei ina ua taofia fa’apagota e Leoleo o ia, e mafua mai i le poloaiga a le fa’amasinoga e pu’e sailia ai o ia, ona o lona a’afiaga i le fa’alavelave lea na tafana ai le Ofisa o Leoleo i Leone i le masina o Novema 2014, ae maua ai e Leoleo se tama’i pepa iila sa fefiloi fa’atasi ma ni tupe pepa o lo o i ai vaega o le pauta oona o le aisa.

 

O lo o taofia pea Solia Jr i le toese i Tafuna e fa’atali ai lana iloiloga lea ua fa’atulaga mo le aso Lua o le vaiaso fou. O le ali’i loia ia Gerald Murphy o lo o tula’i mo le malo i lenei mataupu, ae o Michael White o lo o avea ma loia fautua a Solia Jr.

 

FA’AMANATU MIKA

 

O le masina fou o Ianuari 2017 lea ua fa’atulaga e le fa’amasinoga e toe valaau ai le mataupu a le ali’i o Fa’amanatu Mika, i le mae’a ai lea o lona teena o tu’uaiga fa’asaga ia te ia i le amataga o le vaiaso nei.

 

O Mika o lo o tu’uaia e le malo i moliaga mamafa e lua o le talepe fale i le tulaga muamua ma le gaoi, ma o lo o taofia pea i le toese i Tafuna ina ua le mafai ona ia totogiina le tupe e $10,000 na fa’atulaga e le fa’amasinoga e tatala ai o ia i tua.

 

O tu’uaiga fa’asaga ia Mika na alia’e mai i se fa’alavelave na a’afia ai se fale a se aiga i Malaeimi i le masina o Oketopa na te’a nei, lea na fa’ailoa e le aiga i Leoleo le talepe e se tasi o le faitoto’a pito i tua o le fale ma ulufale fa’amalosi ai i totonu ma le fa’amoemoe e fa’atino ai se isi solitulafono.

 

E pei ona taua i fa’amaumauga a le fa’amasinoga e fa’apea, ina ua ulufale fa’amalosi Mika i totonu o le fale o le aiga na a’afia, sa ia fa’asasa’o atu ai loa i le potu malolo ma ia aveese mai ai se masini laptop, iPad ma ni se’evae koleni, sosoo ai loa ma lona aga’i atu i le potu e teu ai isi meaalofa a le aiga ma gaoi ai lavalava e aofia ai mitiafu ma isi fo’i se’evae.

 

O le toe fo’i ane o le aiga i lo lato fale i le po lea na latou maitauina ai tulaga fa’aletonu i totonu o le fale, aemaise ai o meatotino ua leiloloa, ma latou logoina ai loa Leoleo mo se fesoasoani, ma, a o pisi ai Leoleo e tau saili poo o ai sa ia faia lenei galuega le alofa, na mafai e se tama’ita’i sa avea ma uo a Mika ona ia logoina Leoleo e tusa ai o lenei mataupu, ina ua ia maua le tala mai se tasi o ana uo, sa foa’i atu e Mika ia te ia ni mitiafu ma se pea se’evae.

 

Na saili e Leoleo ia Mika ma taumafai e fesiligia i lenei mataupu, peita’i sa fa’afiti le ua molia na te le’i osofaia le fale o le aiga na a’afia, ae ina ua saili e Leoleo le fale a le ua molia, sa maua i ai mitiafu ma pea se’evae, o meatotino ia na toesea mai i le fale o le aiga na a’afia. Mulimuli ane ina ua toe fesiligia Mika e Leoleo, sa ia ioeina ai loa lona ulufale i totonu o le fale o le aiga, atoa ai ma lona naunau e toe fa’afo’i mea totino sa ia gaoia.

 

FITU LAVEA’I

 

O le ali’i e 25 tausaga le matua mai Tafuna lea ua tu’uaia i lona fa’ao’olima lea i se isi ali’i talavou i totonu o se faleoloa i Tafuna lava i le vaiaso nei, ua toe tatalaina nei o ia i tua i lalo o tuutuuga a le fa’amasinoga e ao ona usita’i, e aofia ai le fa’asa lea ona ia toe alu i le faleoloa na tula’i mai ai le vevesi, pe toe taumafai fo’i e fa’afeso’ota’i le ali’i na a’afia i lenei mataupu.

 

E pei ona taua i fa’amaumauga a le fa’amasinoga, o se vevesi na tula’i mai i le va o Fitu Lavea’i ma le ali’i na a’afia i se ta’aloga Volipolo sa faia i le afiafi o le aso ua tuana’i, ae a toe vevesi ina ua toe fetaui ali’i ia e to’alua i totonu o le faleoloa i le aso Lua na te’a nei, na savali atu ai loa Lavea’i ua tu’i le ali’i na a’afia ma fa’aauau ai lava le la vevesi i totonu o le faleoloa seia oo i le taimi na taunu’u ai Leoleo ina ua vili e le pule o le Faleoloa.

 

O moliaga mama e 2 o le faaoolima i le tulaga tolu ma le fa’atupu vevesi i nofoaga faitele lea ua tu’uaia ai Lavea’i, ma ua poloaina o ia e aua ne’i ona toe solia se tulafono a le malo ao fa’agasolo ai taualumaga o lana mataupu.