TOFU FA’AMASINOGA VEVESI NA AMATA MAI I LE “FACEBOOK”

O se vevesi na amata mai i ni tusitusiga i luga o le “Facebook”, na mafua ai ona tula’i mai se vevesi i le va o ni tama’ita’i se to’atolu i le aso Lua na te’a nei, ma i’u ina taofia ai loa i latou e Leoleo i le toese i Tafuna i le po o le aso Lua lava lea, e fa’atalitali ai le taimi o le latou iloiloga i luma o le fa’amasinoga i le taeao ananafi.

Ae i le mae’a ai lea ona iloilo e le malo o le ripoti a Leoleo e tusa ai o le fa’alavelave sa tula’i mai, na fa’ailoa ai loa e le ali’i loia ia Woodrow Pengelly i le fa’amasinoga le faila e le malo o moliaga fa’asaga i tama’ita’i e to’alua, ae o le isi tama’ita’i o le a toe tatala o ia i tua e aunoa ma se moliaga e faila fa’asaga ia te ia.

O tama’ita’i e to’alua ua molia e le malo i le moliaga o le fa’ao’olima i le tulaga tolu e aofia ai Pauline Alenepi ma Paula Iafeta, lea ua toe tatalaina nei i laua i tua mai le toese i Tafuna e aunoa ma se tupe na totogi, i lalo o tuutuuga e ao ona la usita’i i ai.

O ni isi o ia tuutuuga e aofia ai le fa’asa lea ona la toe solia se tulafono, fa’asa ona la toe taumafai e fa’afeso’ota’i le tama’ita’i na a’afia, fa’asa fo’i ona le toe latalata i ai i lona fale.

O le mataupu lenei na tofu atu i le Ofisa o Leoleo i Tafuna ina ua talosagaina e le Tina a Pauline se fesoasoani a Leoleo, e fa’atatau i le latou aiga tuaoi o lo o misa, aemaise ai lana talosaga ina ia aveese le tama’ita’i lea o loo latou tuaoi, o ia lea ua fai ma fa’atupu vevesi i lo latou va.

Na taunu’u Leoleo ma latou aveese mai ai le tama’ita’i o lo o tu’uaia sa ia fa’atupuina le vevesi, ma auina atu loa i le Ofisa i Tafuna mo su’esu’ega, peita’i ina ua fesiligia e Leoleo le mafua’aga o le vevesi, na manino ai i a latou su’esu’ega, o le tama’ita’i lea ua latou fesiligia, o ia lea o lo o a’afia i lenei mataupu, ina ua fasi o ia e le fanau teine a le Tina sa ia telefoniina Leoleo mo se fesoasoani.

Na taua e le tama’ita’i na a’afia e fa’apea, o se vevesi na tula’i mai i le va o ia ma lona to’alua i le aso Gafua na te’a nei, na mafua ai ona le fiafia le aiga tuaoi ia te ia, ae i le aso Lua ina ua ui ane i tafatafa o le fale o le aiga tuaoi lea, na fa’afuase’i ai ona ia vaaia ia Pauline ma Paula o tau fetuli atu ma ma’a ma tauai ai o ia.

O le vave o lana gaioiga i lona taumafai e pupuni si ana tama e 3 tausaga le matua, le misi ai le ma’a mai lana tama ae pasasa i lona ulu ma manu’a ai o ia, sosoo ai loa ma le aga’i atu o tama’ita’i ia e to’alua ma fasi o ia, ae na tulioso ane tagata tuaoi ma aveese si ana tama ina ne’i lavea.

Ina ua fesiligia e Leoleo le mafua’aga o le vevesi, na taua ai e le tama’ita’i na a’afia e fa’apea, o lana tali atu i tusitusiga i luga o le “Facebook” sa faia e le tama teine a le Tina sa ia logoina Leoleo, na mafua ai loa le vevesi ma fa’ao’olima ai Pauline ma Paula ia te ia.

Ua fautuaina e le afioga i le Tama’ita’i Fa’amasino ia Gwen Tauiliili-Langkilde tama’ita’i e to’alua ua molia ina ia taumamao mai le toe faia o ni tusitusiga i luga o le “Facebook” e ono toe tula’i mai ai se isi vevesi.

TAVITA LALOVI

O le ali’i e 24 tausaga le matua mai Aua lea na tu’uaia i lona fa’ao’olima lea i se ali’i ave taxi, ua molia nei o ia e le malo i le moliaga mama e 2 o le fa’aoolima i le tulaga tolu faapea ai ma le fa’atupu vevesi i nofoaga faitele.

O se vevesi na tula’i mai i luma o se faleoloa i Aua i le aso Lua na te’a nei, ina ua tu’i e le ua molia se alii ave taxi sa paka lana ta’avale i luma o le faleoloa, na vili ai loa e ni isi Leoleo mo se fesoasoani, ina ua fiu e fa’a to’afilemu le ali’i o Tavita Lalovi ae ua le mafai lava le taumafai e fa’aoolima pea i le ali’i na a’afia.

Na taunu’u Leoleo ma pu’e fa’apagota Lalovi ma auina mai loa i le ofisa mo su’esu’ega, ma iloa ai le ova o le ‘ona o lenei ali’i.

O ni isi o tuutuuga ua tatala ai Lalovi i tua mai le toese i Tafuna, e aofia ai le fa’asa lea ona toe alu i le faleoloa na tula’i mai ai le vevesi, fa’asa fo’i ona ia toe taumafai e fa’afeso’ota’i le ali’i na a’afia, a ia avea o ia ma tagatanu’u e tausisi i tulafono a le malo. O le aso 28 Tesema lea ua faatulaga e toe valaau ai le mataupu a le ua molia i luma o le fa’amaisnoga.