BINGHAM SUIAUNOA

Ua tatalaina nei e le fa’amasinoga le ali’i o Bingham Suiaunoa i tua mai le toese i Tafuna, e fa’atali ai le aso 15 o Novema e lau ai lana fa’asalaga, ina ua ta’usala o ia e le fa’amasinoga i le moliaga o le faatupu vevesi i nofoaga faitele.

Na ulua’i tu’uaia e le malo ia Suiaunoa i le moliaga o le fa’atupu vevesi i nofoaga faitele, fa’aoolima i le tulaga tolu, aemaise ai o le lafo o upu masoa i nofoaga faitele, ae i lalo o le maliliega lea na sainia e le ua molia ma le malo, lea fo’i ua talia e le fa’amasinoga, ua tali ioe Suiaunoa i le moliaga o le fa’atupu vevesi i nofoaga faitele, ae solofua ai e le fa’amasinoga isi moliaga.

O le mataupu e pei ona ta’usala ai Suiaunoa e le fa’amasinoga, na tula’i mai i le fale kalapu o le Night Hawks i Iliili, ina ua tula’i mai se fusuaga i le va o ia ma le isi ali’i, ao molimauina e le to’atele o tagata i le fale kalapu i lea po.

Na taofia uma e Leoleo ia Suiaunoa ma le ali’i na la fufusu i le po na tula’i mai ai le fa’alavelave, ma ua mae’a ona tali ioe lea ali’i i le moliaga o le fa’atupu vevesi i nofoaga faitele, ma le fa’amoemoe o le aso 15 Novema e lau ai lana fa’asalaga, o le aso fo’i lea ua fa’atulaga e lau fa’atasi ai ma le fa’asalaga a Suiaunoa.

Ina ua fesili le afioga i le ali’i fa’amasino ia Fiti A. Sunia i le ali’i ua molia e fa’amatala i le fa’amasinoga le fa’alavelave sa tulai mai ae na tali le ua molia, “fa’amalie atu ou te le iloa se mea sa tupu i le po lea, ona sa ova lo’u ‘ona”.

Na taua e le itu a le malo e fa’apea, o le vevesi na tula’i mai ina ua tula’i mai se fusuaga i le va o Suiaunoa ma le ali’i na a’afia i le vaega e paka ai ta’avale o le Night Hawks, ae i le fa’aiuga o le fusuaga, sa lavea ai Suiaunoa i se tu’i ma matapogia ai o ia, ma ia le iloa ai se mea e tasi na tupu.

I le atoa ai o le vaiaso talu ona taofia Suiaunoa i le toese i Tafuna, o le taeao ananafi na faia ai e le afioga i le ali’i fa’amasino ia Sunia le poloaiga e tatala ai o ia i tua e aunoa ma se tupe e totogi, ina ua talia e le fa’amasinoga talosaga a itu e lua mo se avanoa e tatala ai le ua molia i tua.

Na taua e le itu a le malo e fa’apea, o le vaiaso lea ua mae’a ona tuli e le ua molia i le falepuipui, ua lava ma totoe lea e fai ma ana fa’asalaga mo le solitulafono ua ta’usala ai o ia. O ni isi o poloaiga a le fa’amasinoga ua tuuina atu mo Suiaunoa e usita’i i ai, e aofia ai le fa’asa lea ona ia toe tagofia le ‘ava malosi, fa’asa fo’i ona ia toe soli se tulafono a le malo, a ia avea o ia o se tasi e tausisi i tulafono a le malo i taimi uma.

TAO LIU

Ua talia e le fa’amasinoga maualuga le talosaga na fa’aulu e loia a itu e lua mo se avanoa e toe tolopo ai le mataupu a le ali’i Asia lea o lo o tu’uaia i lona umia fa’asolitulafono o fualaau fa’asaina ma se a’upega mata’utia, ona e oo mai lava i le taimi nei e le’i tauaaoina lava e itu e lua fa’amaumauga a Leoleo e tusa ai o le fa’alavelave sa tula’i mai.

Na taua e le tama’ita’i loia ia Mitzie Jessop-Ta’ase i le fa’amasinoga maualuga e fa’apea, o lea ua lata i le 2 masina talu ona taofia le ali’i o Tao Liu i le toese i Tafuna ma tu’uaia e le malo i moliaga mamafa, a o lenei lava e lei taunu’u atu le ripoti a Leoleo e tusa ai o a latou su’esu’ega i le fa’alavelave sa tupu.

O le aso 6 Tesema lea ua toe tolopo i ai le mataupu a Liu, ma ua poloaina e le fa’amasinoga le itu a le malo, e tatau ona oo atu i le aso lea ua mautu se tulaga tonu e tatau ona taoto i ai le mataupu a le ua molia, lea o lo o taofia i le toese e aunoa ma se tupe e tatala ai i tua.

O Liu o lo o tu’uaia e le malo i le moliaga o le umia faasolitulafono o vaega o le pauta fa’asaina o le aisa, umia fa’asolitulafono o se aupega e lei laiseneina, atoa ai ma le umia fa’asolitulafono o pulufana.

A o taofia ai Liu i le toese i Tafuna, na sola ese ai o ia i tua mai le toese i le masina na te’a nei, peita’i na toe maua o ia i le tuana’i ai o aso e lua talu ona sola ese mai le toese. Na taua e le loia a le malo i le Samoa News, e lei failaina lava e le malo le moliaga mamafa fou o le sola ese mai le toese fa’asaga ia Liu.

JOE LEULUA’IALI’I

O le ali’i lea na ia tu’ia se Leoleopo o le fale kalapu a le Night Hawks i Iliili i le masina na te’a nei, ua fa’anofovaavaaia nei o ia mo le 18 masina i lalo o tuutuuga e ao ona ia usita’i i ai. Na ulua’i tu’uaia e le malo le ali’i o Joe Leulua’iali’i i moliaga mama e lua o le fa’atupu vevesi i nofoaga faitele ma le fa’ao’olima i le tulaga tolu, ae i lalo o le maliliega lea na sainia e le ua molia ma le malo ma talia e le fa’amasinoga, ua ia tali ioe ai i le moliaga o le fa’atupu vevesi i nofoaga faitele, ae solofua e le fa’amasinoga le moliaga o lo’o totoe.

E lei mafai e Leulua’iali’i ona fa’amatala i luma o le fa’amasinoga le mea moni sa tupu i le po na taofia ai o ia e Leoleo, e mafua mai i le ova tele o lona ‘ona, peita’i na taua e le itu a le malo e fa’apea, talu ai le ova tele o le ‘ona o le ua molia i totonu o le fale kalapu, na alu ai le ua molia ma fa’alavelave solo i tagata o loo tafafao i totonu o le fale kalapu.

E fa’alua ona faia e le ua molia lea gaioiga i totonu o le fale kalapu, i lona fa’alavelave lea i tagata tafafao e aofia ai ma tama’ita’i, ae ina ua taumafai Leoleopo e ta’ita’i i fafo, na tu’i e le ua molia se tasi o ali’i Leoleopo, ma fa’asaga atu ai loa le Leoleopo ua tu’i le ua molia ma palasi ai loa i lalo, ma e taunu’u atu Leoleo o tau fa’atu i luga le ali’i ‘ona fiaulavale, ma taofia ai loa o ia i le falepuipui i lea lava po.

O ni isi o poloaiga o le nofovaavaaia a Leulua’iali’i e aofia ai le fa’asa ona ia toe tagofia le ‘ava malosi, auai i aoaoga e fesoasoani ai i le leaga o le ‘ava malosi, aua ne’i ona toe solia se tulafono, ma ia totogi le salatupe e $100.