Ads by Google Ads by Google

Tala otooto o Fa’amasinoga

ausage@samoanews.com

TALOSAGA SAMUEL WRIGHT MO SONA FA’AMASINOGA FOU

 

O le isi ali’i e to’atolu i ai i latou ua ta’usala e le fa’amasinoga maualuga i le osofaia lea o le faleoloa o le Gold Conda Store i Fagaalu i le masina o Me 2014, ua ia talosaga i le fa’amasinoga maualuga ina ia fa’aleaoga lana fa’asalaga lea ua mae’a ona tu’uina mai, ae toe fa’atulaga se isi ana fa’amasinoga autu fou i luga o tagata iloilo iuga.

 

O le amataga o le tausaga nei na ta’usala ai e se vaega iloilo iuga le ali’i o Samuel Wright i moliaga mamafa o le faomea i le tulaga muamua, talepe fale fa’apea ai ma le moliaga mama o le umia fa’asolitulafono o se a’upega, ma fa’asala ai loa o ia e le fa’amasinoga maualuga e taofia i le toese i Tafuna mo le umi e 15 tausaga.

 

O le mae’a ai ona fa’asala e le fa’amasinoga maualuga o le ali’i o Wright i le amataga o le tausaga nei, na toe faila ai loa e lana loia se talosaga i le fa’amasinoga mo se avanoa e toe faia ai se isi fa’amasinoga fou fa’asaga i le ali’i ua molia, ona e talitonu le ua molia, e i ai isi fa’amaumauga fou fa’asaga i le mataupu ua ta’usala ai o ia e tatau ona silafia e le fa’amasinoga.

 

O le ali’i loia fautua ia Michael White lea sa tula’i mo le ali’i o Wright i le taimi o lana fa’amasinoga, o ia fo’i lea na fa’auluina le talosaga mo se isi faamasinoga fou.

 

O lo o taofia pea Wright i le toese i Tafuna e fa’atali le aso Lua o le vaiaso fou, Oketopa 4, 2016 lea ua fa’amoemoe e fofogaina ai lana talosaga i luma o le fa’amasinoga maualuga.

 

TOE A’AFIA FO’I BERNARD IAKOPO I LE TULAFONO

 

O le toe a’afia ai o le ali’i o Bernard Iakopo i le tulafono i le vaiaso na te’a nei, ina ua tu’uaia o ia i le moliaga mama o le fa’atupu vevesi i nofoaga faitele, e mafua mai i le fa’alavelave lea na ia leoleoa solo ai i luma o se faleoloa, na poloaina ai loa e le afioga i le ali’i Fa’amasino ia Fiti Sunia loia a itu e lua, ina ia aua ne’i toe tu’uina atu le ua molia i le toese, ae toe fa’afo’i i le Falema’i mo i latou e a’afia i le gasegase o le mafaufau mo le fa’aauauina ai o togafitiga fa’asaga ia te ia.

 

I le avea ai o Iakopo o se tasi o tagata ua tula’i soo i luma o le fa’amasinoga ona o moliaga eseese na molia na ta’usala ai o ia e le fa’amasinoga fa’aitumalo, na saunoa ai Sunia e faapea, e le tatau lava ona taofia lenei ali’i i le toese i Tafuna, ona o le tulaga le manuia ma le to’atele o tagata o lo o i ai, ae lelei le toe fa’afo’i o ia i le falema’i mo le faia i ai o togafitiga i lona tino ma lona mafaufau.

 

I le lua masina talu ai, na ta’usala ai e le fa’amasinoga fa’aitumalo le ali’i o Iakopo i moliaga e lua o le fa’atupu vevesi i nofoaga faitele, e mafua mai i ni fa’alavelave eseese sa lua na a’afia ai o ia.

 

O le isi fa’alavelave na tula’i mai ina ua faia e lenei ali’i ni uiga mataga i lona lava tino (tulou), i le mae’a ai lea ona ia vaaia o se tama’ita’i lalelei fa’atasi ai ma ni ona laei manaia i luma o le fale o le malo i Utulei, le EOB, ae o le fa’alavelave lona lua na tula’i mai fo’i i totonu o le Fale Taele a tama’ita’i i le EOB, ina ua alu le ua molia i totonu o le fale o tama’ita’i, ma fa’afeso’ota’i ai loa e se tama’ita’i sa i ai i totonu o le fale taele i le taimi lea Leoleopo o le EOB, ma i’u ina logo ai loa Leoleo i le fa’alavelave, ma taofia ai Iakopo i le toese.

 

O le ripoti a le ali’i foma’i o le mafaufau ia Dr. Shifram Shifram o lo o gafa ma le tausiaina o le ali’i o Iakopo ma ave i ai ana fualaau, o le tele o taimi e taofia ai lenei ali’i i le falema’i, e le gata e le usita’i o ia i faatonuga e tu’uina atu mo le inuina o ana fualaau, ae o ni isi fo’i taimi na te faia ai ni isi o uiga e lagona ai e tama’ita’i foma’i le le mautonu ma le mumusu e ofo atu tautua mo ia.

 

E 2 vaiaso lea ua poloaina e le afioga i le ali’i fa’amasino ia Sunia loia a itu e lua e tatau ona toe taofia ai Iakopo i le falema’i, mo le fa’aauauina i ai o togafitiga a foma’i, ina ia mautinoa e le toe a’afia o ia i se isi solitulafono i le lumana’i.

 

NOFOVAAVAAIA LE ALI’I NA IA FA’AOOLIMA I LONA TO’ALUA

 

O le ali’i lea na ta’usala e le fa’amasinoga i moliaga mama e lua, o le fa’ao’olima i le tulaga tolu atoa ai ma le fa’atupu vevesi i totonu o lona aiga, e mafua mai i le fa’alavelave lea na ia fa’ao’olima ai i lona to’alua i luma o lana fanau, ua fa’anofovaavaaia e le fa’amasinoga mo le 18 masina, i lalo o tuutuuga e ao ona ia usita’i i ai.

 

E 45 aso na manatu le fa’amasinoga e fa’asala ai le ua molia i le toese i Tafuna, peita’i o le a fa’amalumalu lona tuliina o lea fa’asalaga, ae o le a nofovaavaaia o ia mo le 18 masina i lalo o tuutuuga e ao ona ia usita’i i ai.

 

O ni isi o ia tuutuuga e aofia ai le fa’asa lea ona ia toe faia ni uiga tau fa’amata’u pe sauaina fo’i lona to’alua ma lana fanau, ua fa’asa fo’i ona ia toe folafola ni upu tau fa’amata’u i lona to’alua, a ia avea o ia ma tagatanu’u e usita’i ma tausisi i tulafono a le malo.

 

O le vevesi na tula’i mai ina ua tuai mai le ua molia i le fale i le po na tula’i mai ai le fa’alavelave, ma oso ai loa le masalosalo o le fafine, ma i’u ina tula’i mai ai loa se taugaupu i lo la va. Talu ai sa ‘ona le ua molia i le taimi na tula’i mai ai le taugaupu i le va o ia ma lona to’alua, na i’u ai loa ina fa’atetele le vevesi, ma i’u ai loa i le una’i e le ua molia lona to’alua ma pau atu ai i luma o lana fanau, sosoo ai loa ma lona futi o lona ulu toe tu’i ona foliga.

 

Na fa’atoese le ua molia e tusa ai o lana gaioiga sa faia, ma ia ta’utino ai ua mae’a ona toe fa’aleleia le fa’aletonu na tula’i mai i lo la va ma lona to’alua, peita’i na fa’ailoa i ai e le fa’amasinoga e fa’apea, o le gaioiga sa ia faia i luma o lana fanau, ua ia momoli atu ai se lesona leaga i lana fanau pe a matutua i latou.

 

Ua poloaina le ua molia e totogi le salatupe e $125, fa’asa ona ia toe tagofia le ‘ava malosi, ma ia auai fo’i i aoaoga faa faufautua e fesoasoani ai i tulaga leaga o le ‘ava malosi.