PILI SUESUE AI TALA’AGA SUI TAUVA O LE PALOTA

Ua i luma nei o le maota o sui o le Fono Faitulafono se pili mo se tulafono tau fa’aofi, e faia ai ni suesuega i talaaga o sui tauva uma ua agava’a e tauva mo nofoa o itumalo taitasi i le maota o sui, i taimi e sauniuni ai le atunu’u mo lana palota.

O lenei tulafono taufa’aofi sa fa’aulufaleina e le afioga i le ali’i faipule ia Faimealelei Anthony Fu’e Allen, ma ua fa’atulaga ai loa se iloiloga e faia i le vaiaso fou e suesueina ai le taua o lenei tulafono taufa’aofi.

I lalo o le vaega o le Fa’atuina o sui tauva mo le palota, atoa ai ma lisi o tagata lesitala e palota, lea e tuu atu ai le malosi i le Ofisa Sili Faipalota na te faia ai le faaiuga pe agava’a sui fa’atutu e tauva mo le palota, e aofia ai le faia o ni sailiiliga mae’ae’a i o latou tala’aga, e aofia ai tulaga tau solitulafono.

Na fa’amanino e Faimealelei i le Samoa News e fa’apea, o le taua o le suiga i le tulafono pe a pasia, e le tau toe fesiligia ai agava’a o sui e manumalo ai i nofoa a itumalo taitasi, ae o le a fa’afaigofie ai ona faia le faaiuga e aunoa ma le toe fesiligia e isi sui tauva.

TELE FESILI A FAIPULE I LE TAUTUA A LE ASTCA

E tele fesili mai afioga i faipule fa’atatau i le tautua a le Pulega o Fesootaiga i Amerika Samoa (ASTCA) e le o mafai lava ona taliina i le taimi nei, aemaise lava ina ua le fa’ataunu’uina le iloiloga lea sa fuafuaina i le amataga o le vaiaso nei.

Na talosagaina e le afioga i le ali’i faipule ia Veevalu M. Mageo le tatau lea ona toe fa’atulaga se isi iloiloga ma le ASTCA i le vaiaso fou, se’i fa’amanino ai mataupu o loo fia malamalama i ai le atunu’u, e pei o le mataupu i le nonogatupe fou e $4 miliona a le ASTCA lea ua maua i ripoti o loo fuafuaina mai le Teugatupe o le Litaea, ae o le a se tulaga e fa’atatau i le isi fo’i nonogatupe e tusa ma le $4 miliona mai le Litaea lea sa tu’uina atu i tausaga ua mavae.

Na lagolagoina e le afioga i le ali’i faipule ia Vesi Talalelei Fautanu Jr le talosaga a Veevalu, ma ia taua ai le tatau lea ona fa’amanino mataupu ia i le atunu’u, ona o lea o loo fesiligia pea le lumana’i o le teugatupe a le litaea, ae foliga mai e le o mautu mai tulaga o nonogatupe a le ASTCA.

FINAGALO FAIPULE FA’AMANINO MATAUPU I SUIGA O LE FA’AVAE

O le taeao o le aso Lua o le vaiaso fou lea ua fa’atulaga e faia ai le iloiloga i luma o le maota o sui, mo le talanoaina o le mataupu e fa’atatau i suiga o le Fa’avae a le atunu’u, lea o le a molimau ai le ali’i foma’i ia Tapaau Dr. Dan Aga o loo fa’auluulu i ai le Ofisa e gafa ma le talanoaina o mataupu i le Fa’avae a le malo.

Na taua e le afioga i le ali’i faipule ia Timusa Tini Lam Yuen le taua tele o mataupu eseese e fa’atatau i le Fa’avae o le malo, aemaise lava i le mataupu lea o loo fesiligia e tupulaga talavou e fa’atatau i le palotaina lea o Senatoa, sa mafai ona fa’asoa i ai le afioga a Tapaau ma fanau aoga i le Kolisi Tu’ufa’atasi i le vaiaso na te’a nei.

O le taua o lenei mataupu e pei ona saunoa Timusa, e mana’omia ai le malamalama o le auala e momoli atu ai le feau i le atunu’u faapea tupulaga talavou, ina ia latou silafia le tulaga tonu e tatau ona taoto i ai suiga o le Fa’avae, ina ia mafai ai fo’i e le Fono Faitulafono ona fa’atino lana pito laau e ala i le fa’amalamalamaina atu i le atunu’u o vaega taua o le Fa’avae o loo fesiligia ma talanoaina.

Saunoa Toeaina Faufano Autele e fa’apea, a talanoa loa i suiga o le Fa’avae, ua talanoa i le lumana’i o le atunu’u, o le mafua’aga lena e taua ai le tatau lea ona fa’aauau pea le fa’amaninoina o mataupu nei i fanau aoga ma tupulaga talavou, ina ia latou silafia ai le aano moni ma le taua o vaega ta’itasi o le Fa’avae.