Ads by Google Ads by Google

Tala I Vaifanua


2nd Lt Owen Tipa fa’au’u mai lona BSci ma ua fa’atalitalia nei lona avea ai ma Leoleo Nana. [ata: foa’i]

KONESETI A LE DANCING FINGERS 2017

 

O le afiafi o le aso Tofi ua te’a sa fa’atasia ai le mamalu o matua ma aiga, ae maise o sui na vala’aulia fa’apitoa, le Tina o le atunu’u, Cynthia Malala Moliga, le fa’atina fo’i o le Dancing Fingers mo le koneseti a le Dancing Fingers fa’atautaia e le fanau i le Piano, Flute ma Violin. Sa faia lea koneseti i le Malumalu AOG Lepuapua, Calvary Temple, i Lepuapua.

 

O saunoaga i lea afiafi e aofia ai le ali’i Faia’oga Musika Poe Mageo, le fa’atonu o le Dancing Fingers ma Marissa Ta’amu sa avea ma fofoga o le polokalama.

 

Na faailoa e Mageo lona fa’anaunauga ina ia mafai ona fa’atoateleina fanau a le atunu’u e maua lenei taleni o le musika. Na ia sauoa fo’i, “Matua, ou te fa’ailoa atu, o le matua popoto lava o alo o Samoa, e gafatia e i latou ona matua faalautele lo latou tomai i le Musika ma saili ai latou tusi pasi maualuluga i Iunivesite i fafo atu o Samoa.”

 

E ese mai lea sa ia fa’alauiloa fo’i le aoga o lenei a’oga i le sailliga o tupe e fa’amae’a ai le Fale Fou o le Koluse Mumu o Amerika Samoa i Tafuna.

 

Ina ua mae’a sa fa’asolosolo loa le vasega ua fa’ato’a taitasi tausaga talu mai ona a’oa’oina i le Dancing Fingers. Na tomua le tama’ita’i o Narei Mareko i lana pese sa taina “Love Somebody!” O Alana Joserose i lana pese o le Who’s on Third.” O Wilene  Leauanae i lana pese “Happy Song” ma Heaven Lafaele Neemia i lana pese o Birthday Fun.

 

Na mae’a lea ona taina lea o le pese a Iris ma Leila Penitusi, Concert Song, ma sa la’ua ofoina lea pese mo la’ua tina i lenei aso o Tina 2017. O le vasega numera lua na soso’o ai latou fa’aaliga ma muamua Ida DeWees i lana pese Indian Dance. O Taupulesea Vaeao i lana pese Rock Song, ma Lemalama Silafau i le “Row Row Row Your Boat!”  O le pese na taina e Lynelle Mareko na soso’o ai i le fa’aaliga “When the saints Go Marching In!”

 

Ona fa’asolo lea o isi vaega o fanau fa’ato’a fa’ata’ita’i i le ta piano, amata e Malaea Estherlene McFall i le pese “Liebestraum [Listz]. O le pese na soso’o ai sa taina atoa e le fa’aili a le Dancing Fingers ma sa taimia lea e Malaea ae and taina e Mageo.

 

Ina ua mae’a le fa’aaliga ona tufatufaina lea e Mrs. Moliga teu fugala’au na saunia e le Dancing fingers, mo le fanau sa tofu sao i le fa’aaliga atoa.

 

2nd LT TIPA, OWEN - FA’APINE I AMERIKA SAMOA

 

O Owen Tipa na fa’u’u mai Leone High School i le tausaga 2009, ua mae’a ona faapine lona fa’ailoga 2nd Lieutenant of Signal Corps i se sauniga  i le US Army Reserve i Tafuna ia Me 6, 2017. Na fa’atalosaga e ia lona fa’apinega ina ia faia mai i le atunu’u, ona o lona manatu ia molimauina e lona aiga atoa.

 

Mai le amataga o lona soifua aoaoina ma taumafai fo’i e tautua i le Vaega Au, sa malaga ese atu au i le tasuaga e 2009 ina ua mae’a fa’au’u mai Leone ina ua ulufale i le US Army Reserve ma ulufale i koleniga fa’ata’ita’i ia Iuni 2009.

 

O le tausaga lava lea e tasi na tu’uva’a ese atu ai mo koleniga BCT i Fort Bennings, Georgia ma sa mae’a lea ia Mati, 2010, ma ulufale atu ai e fa’aauau a’oa’oga fa’apitoa OSUT ma fa’ato’a mae’a mai ia Aperila o lea lava tausaga.

 

Ina ua mae’a ana koleniga fa’apitoa nei, sa taliu mai i Aiga ma toe ulufale atu i le Kolisi Tu’ufa’atasi mo sina vaitau pu’upu’u ae fa’ato’a tu’ua ai lea tunu’u mo a’oa’oga i Hawaii. Mai i’ina sa maua ai lona avanoa e  ulufale ai i Weber State Uiversity i Utah ia Iulai 2011. Na  fa’au’u o ia mai Weber ma lona fa’ailoga Associate of Science i le Automotive Technician i le tausaga e 2014 ma lea foi vaitau na ulufale ai i le MOSQ i Yorktown , Virginia mo le vaega a le Naval Ophthalmologic Services Training Academy.

 

I le tausaga e 2015 na ulufale ai i le Warrior leadership Course [WLC] i Fort McCoy i Wisconsin. Ma o lea foi tausaga sa faigaluega ai i le US Homeland Security ose TSA officer ae  fa’aauau aoaoga i le Iunivesite i Utah.

 

“Ua mae’a talosagaina sou avanoa e avea ai ma se Leoleo Nana ma ua talia mai lea fo’i avanoa mo a’u. Ou te iloa, afai e fa’ailoa mai loa ia te a’u le taimi e amata ai, ona suia loa lea o mea uma, ae ou auai atu mo lea avanoa, e talafeagai fo’i ma a’oa’oga fa’amiliteri ua mae’a a’oa’oina ai,” o a Owen lea.

 

Ina ua fesiligia po’o a nisi mea ua manatu e aga atu i ai lona talavou e fa’atino a’o maua pea le soifua malosi fa’atalavou, ae fa’ailoa mai e Owen, “Ou te iloa o le auaunaga lea o le a fa’asaga atu e fa’atino, ma e mo’omia lava fo’i talosaga a matua ma le aiga atoa ae maise o latou fa’amanuiaga, ina ia gafatia e lo’u sui fa’atauva’a lea fo’i tiute. Ae muamua lava i mea uma, e faia so’o se mea ma le tatalo ina ia foa’i mai e le Atua le malosi ma le tomai e fa’atino ai auaunaga.”

 

O matua o Owen o Papali’i Toia Mua’ava Faleafi Tipa ma lona tina o Kamelita Tipa. Ua fa’aipoipo atu o ia ia Mareta i le 1991.Ua fa’afetaia fo’i e ia le mamalu o lona aiga, ona o lo latou nofo tapua’ia o ona faiva ae maise o le auai o i latou i le sauniga na fa’atautaia mo lona fa’apinega.