Ads by Google Ads by Google

Tala i Vaifanua


Laina muamua [Agavale]: Maupua Pousima (Tula) Mata'u Fa'iai (Leone), Fola Fuimaono (Petesa) Baby Amariah Pousima (Tula/Afono) Repa Thomas (Utulei) Aggie Mareko (Pago Pago). Laina 2 [Agavale]: Mark Mareko (Pago Pago/Pavaiai) Sharon Wind (Apia, Samoa) Rose Fuimaono (Petesa) Alalafaga Toia (Alofau) Aluane Te'o (Atu'u) Vineta Mareko (Pavaiai) ma Isapela Coggins (Leone). Laina 3 [Agavale]: Amasaia Pousima (Afono) Nuumai Fuimaono (Petesa) Pastor Lady Faitafa Burrell (Lepea, Samoa) Luteru Te'o (Pago Pago) Christopher Toia (Alofau) ma Veni Toia (Alofau). Matou te alolofa atu uma i le tatou atunu’u pele. [ata:foai]
ausage@samoanews.com

VALAAU E TAPUA’I FA’ATASI I UOSIGITONE D.C.

 

Ua augani mai le Ekalesia Tuto’atasi a Samoa i Uosigitone DC, le laumua o Amerika, lea ua filifili ina ia fa’auia lenei ala e fa’alauiloa ai le latou fiafia e tapua’i fa’atasi ma nisi uso Samoa o lo’o nonofo tulata atu i le latou ekalesia.

 

“Ona e le o iloa tele e nisi si a matou fo’i tapua’iga, ae fiafia tele i matou e feiloa’i ma fa’amasani ma nisi Uso fou mai le tatou atunu’u, o lea ua fa’ailoa ai le matou aufaipese siufofoga malie, ina ia iloa ai e nisi ma autova’a mai matou te mafuta,” o se tala fiafia lea a le tama’ita’i o Maupua Pulou Pousam mai ekalesia.

 

I le aso Sa ua te’a sa fa’apito augafa le fa’atasiga i le aufaipese, ma ua tatala ai fo’i ma le latou toniga fou.

 

“O le sauniga tu’u atu ai le fango o le matou aufaipese e ala i talosaga i le Atua, ina ia fa’ato’ateleina lana lafu mamoe i le Laumua nei, poo ai lava e alaala i Maryland, North Virginia ma Washington DC, e mafai lava ona auai mai, e matala lava le faitoto’a mo ni uso fou,” o se toe fa’aopoopo mai lea a Pousima.

 

O lea Ekalesia o lo’o i totonu o le Joint Base Myer-Henderson Hall i Arlington, i Virginia, lea fo’i e i ai le fanuatanu e lagomau ai so’o se fitafita tau e masoe a le Malo tele. O lo’o galulue ai le susuga le Faifeau Samoa Faitafa Burrell mai Lepea Samoa ma Luteru Te’o mai Pago Pago.

 

“O loo loto tetele lava i matou uma i le galuega, e leai se fa’avaivai, aua o le mea sili, o le tapua’i i le Atua ma le loto, ao i ai le lagona o uso lava o matou fa’atasi i nei nu’u mamao mai ma aiga pele ma si o tatou atunu’u o Samoa,” o a Pousima lea.

 

PASIA AGAVA’A KOLISI TU’UFA’ATASI AMERIKA SAMOA

 

Ua fa’ailoa e le Kolisi Tu’ufa’atasi a Amerika Samoa (ASCC) ua pasia e le gomiti suesue a le Asosi o Kolisi ma Iunivesite o Setete i le itu i sisifo Amerika, le agava’a o le kolisi, ina ia sailia ai tusi pasi maualuluga o tatou fanau aoga.

 

O lea suesuega na asia ai e le Komiti Suesue mo agava’a o Kolisi ma Iunivesite i Amerika [WASC-ACCJC], le ASCC i le fa’aiuga o le tausaga ua te’a, ona fa’ato’a fono lea o lea komiti ia Ianuari 11-13, 2017, ma ua fa’ailoa i se tusi ia Fepuari 3, ua pasia mea uma sa fa’atonu ai le Kolisi ina ia fa’aleleia.

 

O le tulaga sa i ai, sa nofo va’ava’aia ai le agava’a o le ASCC, se’ia vagana ua mae’a fa’aleleia mea na fa’atonuina.

 

I lea lava tusi ua fa’ailoa ai le agaga fiafia tele o le Komiti Atoa sa asiasia le ASCC ona o le galuega tele ma le vave na fa’atino ai e i latou mea sa mo’omia ona fa’aleleia. “Ua iloga mai lo outou galulue fa’atasi, le pulega, le vasega o faia’oga, aufaigaleuga ae maise le fanau aoga, ina ia ausia le agava’a sa mo’omia,” o se vaega lea o le tusi mai le  WASC-ACCJC.

 

Ua fa’ailoa le agaga fa’afetai tele o le tama’ita’i peresetene o le Kolisi, Dr Makaiwi Pato, ona o le loto tasi o le aufaigaluega ma le fanau a’oga e fa’atino mea uma na mo’omia ona faaleleia mo le pasiga o le agava’a o le ASCC.

 

“E mautinoa e matua tele lava itula sa ovataimi ai tatou uma ina ia fa’aleleia mea uma na mo’omia mai e le WASC-ACCJC, ma ou te fa’afetai i lo outou loto tasi mai ina ia maua le taimi ma fa’aleleia mea uma. E le mafaia e se tasi e to’atasi, ae o le aotelega o le tatou galulue fa’atasi, ua mafai ai. Fa’afetai.”

 

Sa ia fa’afetaia foi le Komiti Fa’afoe a le Kolisi i lo latou sao e tusa o lenei lava taumafaiga ia pasia le agava’a o le ASCC.

 

TALOSAGA PEPA ASO FANAU AMERIKA SAMOA

 

I le vaitaimi lenei, ua le toe mafai ona talosaga e matua pepa aso fanau o alo ua silia ma le 18 tausaga le matutua. Ua fa’ailoa mai, “Ona o mea sa aafia ai muamua lea auaunaga, e le ona o tagata uma, ae i ai nisi ua solitulafono ai.”

 

Mo i latou o lo’o nonofo i fafo atu o Amerika Samoa ae fia maua le pepa aso fanau ma isi fa’amaumauga mai le Ofisa o le Vital Statistics, o lo’o i ai le Upega Tafa’ilagi, po’o le Uepesite i luga o feso’ota’iga fa’a-Initeneti e mafai ona talosaga ai, ma e totogi ai fo’i e le tagata lona pepa fanau i luga o lea so’otaga, ae totogia la i le debit po’o le credit card.

 

Ina ua talanoa atu i nisi sa tausaili mai se fesoasoani, sa matua fa’ailoa mai lo latou fiafia, “Se fa’afetai ua faia lena tautua i luga o laina feso’ota’i fa’aonaponei, aua e tele taimi e matua fiu e lafo tupe ai i sui o aiga iina, ina ia fai mai se pepa fanau sei talosaga ai tusi folau i inei, ae sau lava le tali, Kupe e lafo mai!”

 

“E moni, e le fai fua soo se auaunaga, ae pei lava e gau le mea, e matua tele lava le tupe e lado atu, ae o lea e talosaga atu le mea e le atoa se $30.”

 

Talosga i le so’otaga fa’ainiteneti: www.vitalchek.com