O le afiafi nei lea na taunu’u mai ai le aufusu mai Samoa ma le fa’amoemoe latou te fa’afetauia le malosi o le aufusu filifilia a le atunu’u, mo le la Ta’amilosaga o Fusuaga Fa’avaomalo lea ua fa’amoemoe e fa’ataunu’u i le aoauli o le aso To’ona’i nei, Me 13, 2017 i le maota o le Maliu Mai i Fogagogo.

O le Ta’amilosaga Fa’avaomalo lenei sa fuafua e fa’ataunu’uina i le vaiaso o le sisigafu’a a le teritori i le masina o Aperila ua mavae atu, ae talu ai sa pisi Asosi Fusu a Samoa ma Amerika Samoa i le tapenaina o ana tama fusu i le ta’amilosaga tele sa faia i Ausetalia i le masina o Aperila na te’a nei, o le mafua’aga lea na le mafai ai ona fa’ataunu’uina lenei fa’amoemoe, a o lea la fa’atoa mafai ona fa’ataunu’uina i le vaiaso nei.

E to’alima sui o le aufusu a Samoa o le a fa’afetauia le malosi o le aufusu filifilia a Amerika Samoa, lea e aofia ai ni isi o tama fanau a Samoa e lua ua tele tausaga o fai ma sui o atunu’u e lua i ta’amilosaga fa’avaomalo e aofia ai le ta’amilosaga a le Oceania.

I se fa’atalatalanoaga a le Samoa News ma le Ta’ita’i o le aufusu mai Samoa, afioga Fata Leaso Usoali’i Sululoto, sa ia taua ai le lava tapena o lana aufusu mo lenei fa’amoemoe.

“E le faigofie le matou malaga mai e fa’afetoai le aufusu malosi a Amerika Samoa, e ui lava fo’i o ni isi o la’u aufusu ua leva ona fai ma sui o Samoa i ta’aloga fa’avaomalo e aofia ai ta’aloga a le Oceania, ae i ai lo’u talitonuga o lo o lelei fo’i le tapenaga o le aufusu a le teritori”, o le saunoaga lea a Fata i le Samoa News.

“E le faigofie le aufusu a Amerika Samoa, e le gata o lo o tulaga maualuga lana taumafaiga i le taimi nei i ta’amilosaga fa’avaomalo e 2 sa matou tausinio fa’atasi ai, ae o ali’i faiaoga fo’i o loo koleniina le au e le o ni tagata e fa’atauva’a i le ta’aloga, ae o ni isi ua loa lo la silafia i le fa’ataunuuina o le ta’algoa”.

I le tulaga o le au o lo o malaga mai a Samoa, o lo o malaga mai ai ma ni ai’i se to’alua ua tele tausaga o fai ma sui o Samoa i ta’aloga a le Pasefika, lea e aofia ia le susuga ia Fa’asala Livai fa’apea ai ma Petelo Matagi, lea ua fa’amoemoe o lana fusuaga mulimuli lenei mo Samoa ona se’e mai loa lea o ia e ta’alo mo Amerika Samoa i aso o lo o totoe o lona olaga fusu.

“Na pau lava sui o le au a Samoa ua leva i le ta’aloga, e na o le susuga ia Livai ma Matagi, o ni isi ia ua tele pine auro ua la maua talu mai ta’amilosaga fa’avaomalo sa fai ai ma sui o Samoa, o le isi to’atolu e aofia ai ma le tama’ita’i, e le i leva ona tausinio i le ta’aloga ae ua maitauina fo’i lo latou tulaga lelei”.

O le aufusu mai Samoa e aofia ai ali’i e to’afa ma le tama’ita’i e to’atasi.

Ae i le tapenaga o le aufusu a le atunu’u, na taua ai e le latou faiaoga ia Sala Sanele Etuale le lava sauni o le aufusu a le atunu’u mo lenei ta’amilosaga.

“Ua leva ona sauni le aufusu a le atunu’u mo le ta’amilosaga lenei, sa matou amata tapena mai lava i le amataga o le tausaga, ae talu ai sa le’i fa’ataunu’uina le fa’amoemoe ia Aperila, na toe fa’aauau mai ai loa iina a matou tapenaga seia oo mai i le taimi nei”, o le saunoaga lea a Sala.

Saunoa atili fo’i Sala e fa’apea, o le ta’amilosaga lenei ma Samoa o le a fesoasoani malosi i le tapenaina o le aufusu a le atunu’u mo le ta’amilosaga a le Oceania lea e faia i Ausetalia i le masina o Iuni o le tausaga nei, lea fo’i ua mae’a ona filifilia i ai le sui e to’atasi o le atunu’u e tausinio ai.

“E taua le ta’amilosaga lenei ma Samoa, e le gata e tapena ai le sui o le atunu’u lea ua sauni e tausinio i le ta’amilosaga a le Oceania i Ausetalia i le masina o Iuni o le tausaga nei, susuga a Kaisa ioane, ae o se avanoa fo’i e toe fa’amasani atili ai tapenaga a isi fo’i tama fusu a le atunu’u mo isi ta’amilosaga o lo o lumana’i mai, lea e aofia ai ma le ta’amilosaga a le Youth Olympic i Argentina i le masina o Oketopa o le tausaga fou, lea ua maua ai le avanoa o le isi sui o le atunu’u e tausinio ai, le susuga ia Falaniko Tauta”.

Ina ua fesiligia ali’i fusu o le a fai ma sui o Amerika Samoa i lenei ta’amilosaga, na taua ai e Sala e fa’apea, o le to’atele o le aufusu a le atunu’u sa latou manumalo i pine auro mai le tele o ta’amilosaga sa latou tausinio ai i tausaga ua mavae.

“O sui e to’atolu o le tatou aufusu lea na pine auro mai le ta’amilosaga o le Samoa Games i le masina o Tesema na te’a nei i Samoa, fa’apea ai ma le ta’amilosaga a le Oceania i le masina o Fepuari o le tausaga nei i Samoa fo’i, e aofia ai le susuga ia Kaisa Ioane, Falaniko Tauta ma Jeffrey Tago, o i latou ia sa manumalo uma i a latou fusuaga ma fo’i mai ai ma pine auro mo Amerika Samoa”.

O le lisi la lenei o paga fa’apitoa o le a molimauina e le atunu’u i lenei ta’amilosaga.

PAGA A TAMA’ITA’I:

1. Iva Maufouina (SAM) vs Elisapeta Tuavale (AS) - 91kg

PAGA MO ALI’I:

2. Archie Avei (SAM) vs Falaniko Tauta (AS) - 64kg

3. Iosia Fa’alaniga (SAM) vs Jeffrey Tago (AS) - 81kg

4. Fa’asala Livai (SAM) vs Kaisa Ioane (AS) - 69kg

PAGA FA’APITOA:

5. Petelo Matagi (SAM) vs Tesimale Fatu-Taua’i (AS) - 91kg.