Ua i luma nei o le maota o sui o le Fono Faitulafono se pili mo se tulafono e si’i ai i le 8% le lafoga o oloa mai fafo, atoa ai ma le faia o se fa’aiuga ina ia soloia ai le lafoga o totogi e 2% o lo o totogi e tagata faigaluega uma i Amerika Samoa.

O lenei tulafono sa fa’aulufaleina e le afioga i le ali’i faipule ia Puleleiite Tufele Li’amatua Jr ma le afioga i le ali’i faipule ia Lavea Fatulegae’e P. Mauga.

E pei ona manino i le tino o le tulafono taufa’aofi e fa’apea, o le a si’itia i lenei tulafono le lafoga mo soo se oloa mai fafo, mai le 5% o lo o i ai i le maualuga e 8%. O le fa’aopoopoga e pei ona fuafuaina, o le a tu’uina atu le 2% e fesoasoani ai i le fa’agaioiga o le malo, ae o le isi 1% o le a alu lea i le fa’agaioiga o le Falema’i o le LBJ o Faga’alu.

O le 2% lea ua fuafua e alu mo le fa’agaioiga o le malo, o loo taua i totonu o le tulafono le tu’uina atu o le isi 1% e fa’aagaga mo le lipea, fa’afou atoa ai ma le fa’aleleia o fale ma mea e fa’aaoga i aoga uma a le malo o Amerika Samoa, ae o le isi 1% o le a fa’ailoga ese lea ma le fa’amomemoe e tu’uina atu mo le fa’agaioiga a le falema’i o le LBJ i Faga’alu, ae o le 6% o lo o totoe ai o tupe e maua mai i le lafoga e 8% o oloa o le a teuina lea i se teugatupe tele a le malo mo le fa’asoaina e le Fono Faitulafono.

O lo o fuafuaina ai fo’i i le isi vaega o lea lava tulafono taufa’aofi, le faia o se fa’aiuga e soloia ai le lafoga o totogi e 2% o lo o totogi e tagata faigaluega i le atunu’u.

O le Maga II.0607 o le Tulafono lea sa fa’aagaga ai le lafoga o totogi e 2% mo tagata faigaluega a le malo, ua soloia nei.

E pei ona silafia, o le lafoga o totogi e 2% lea na pasia mai i le taimi o le faigamalo a Togiola ma Faoa i le 2012, sa fa’aagaga e totogi ai le nonogatupe a le falema’i o le LBJ e $3 miliona mai le Teugatupe a le Vaega o Taui mo Fa’alavelave Fa’afuase’i ma le tuutuuga, afai ae mae’a ona totogiina lea aitalafu, ona tu’uina atu atoa loa lea o le 2% mo le pulega a le falema’i o le LBJ i Fagaalu, e fesoasoani ai i lana fa’agaioiga.

O le taeao ananafi lea na fa’atulaga e fa’ataunu’uina ai le iloiloga o lenei tulafono taufa’aofi, ae talu ai o se fonotaga fa’apitoa a le Kovana ma ni isi o sui o lana Kapeneta e aofia ai le Loia Sili, Teutupe a le malo, fa’apea ai ma le Fa’atonusili o le Ofisa o le Paketi, o i latou fo’i ia sa fuafua e molimau i le iloiloga, ma sui o le Ofisa o le Initeria, na mafua ai loa ona toe tolopo lenei iloiloga.

Na taua e le afioga i le ali’i faipule ia Lavea Fatulegae’e P. Mauga le taua tele o lenei tulafono, ona o loo naunau le malo e fia maua ni isi alagatupe faaopoopo e fesoasoani ai i lana atina’e ma galuega fa’ataino, ae na taua e ni isi o afioga i Faipule e fa’apea, e le tatau fo’i ona fa’anatinati se finagalo o le maota i lenei mataupu, ae tatau ona sailiili mae’ae’a lelei ma fesiligia molimau e tatau ona fesiligia, ona e le o se tulafono e faigofie mo le atunu’u, aua o lea ua fa’atulaga i le tulafono le si’i o le lafoga o oloa mo le aufai pisinisi, e mautinoa fo’i le pau atu o le mamafa o lenei lafoga i luga o le atunu’u ma tagata fa’atau.

Ua i ai le fa’amoemoe o le masina o Iulai pe a toe a’e mai le Fono mo lana tauaofiaga lona lua o lenei nofoaiga, o le a fa’atulaga ai loa le iloiloga mo lenei tulafono taufa’aofi.