Ads by Google Ads by Google

Onosa’i I Mea Tiga

Vaega: 102

 

Ia manuia lou alo atu i faiva ma tiute o le a feagai ai i lenei aso, ae alo maia, o le a toe fa’aauau atu la tatou tala mo lenei aso . Na muta mai la tatou tala ina ua saval i atu nei Lilo i le fale o lo’o i ai lona tina o Malia ma le tama a si ona tuafafine o Filipina. Na ona vaai ai lava o le lo’omatua ua savali atu Lilo, ‘ata loa ma genogeo ane i le pepe, “Ali’ioaiga, o lea a afio mai Lilomaiava e asi mai ta’ua, ua se e au mai se ta tupe se i fa’atau ai sou napekini, agusa ua matua’i leva ona alu lou tama.”

 

Ua tu Lilo ma tilotlo atu i si ona tina, ua savali atu nei ma saofa’i i talane o lona tina, ma a’apa atu nei ua si’i mai i luga le tama a lona tuafaffine. Fai mai, e si’i mai i luga e Lilo le pepe, ae o lo’o sa’a solo ona vae ma ‘ata a’e i a Lilo, ua tau le mafai e le tama ona tatali ona loimata i lea taimi. “Lilo, e i ai se mea o mafatia ai lou loto, tautala mai, o a’u o lou tina, tautala mai pe i ai se mea o e tiga ai.”

 

Fai mai, ua pei o timuga e maligi mai le lagi loimata o le tama i lea taimi. Ua le matonu ai le loto o lona tina. Ua a’apa ane nei le lo’omatua ma u’u atu le lima o lana tama. “Lilo, tautala mai, ou te ia iloa afai e te fa’aali mai ia te a’u, ona ou malamalama ai lea, ma tu’u atu sa’u fautuaga ia te oe si a’u tama, tautala mai ia te a’u, o a’u o lou tina, ou te malamalama lava i so’o se mea.”

 

Fai mai e maligi ifo lava loimata o Lilo, ae o lo’o sa’a lava Aliioaiga ma ‘ata a’e ia Lilo, ua atili ai ona fusi mau e Lilo le tama a lona tuafafine. “Lilo, o oe o le a avea ma Sa’o o lo tatou aiga, ia e loto tele, o a lava mea tiga ma faigata e o’o mai, o oe, e fa’apalepalea mea uma i lou loto maualalo ma lou loto fa’amagalo.”

 

Ua tau mafaufau nei Lilo po’o le a le tala o le a mafai ai ona ia fa’ailoa i lona tina le mea ua tupu i le to’alua o Filiina. O le mea ua tupu na fiu Lilo ma Loleta e toe vala’au i Ausetalia, a’o le taimi lea, ua toe fo’i ane le to’alua o Filipina i lona aiga i Amerika. Ua fa’ailoa ane fo’i e le ofisa o va’alele ia Lilo, ua le toe faigaluega Roger i le latou kamupani va’alele, ma ua toe fo’i Roger i Amerika.

 

O le tala lea na logo ane e le Ofisa o Va’alele, o ua matinoa ai loa e Lilo, e moni lava le tala a le fafine lea na talia le telefoni, o ia o le to’alua o Roger ma e to’alua le la fanau, o teine uma. ina ua maua e Lilo ma Loleta lea tala, na o la taumafai lava ina ia faia se taimi tatau e logo ai Filipina i le mea ua tupu.

 

O le isi itu na va’ai i ai Lilo ma Loleta, ia maua se avanoa e talatalanoa muamua ai i sio latou tina, le lo’omatua o Malia. O lea la ua iloa nei e Lilo, atonu o le taimi tonu  lenei e tautala ai loa i lona tina. E leai se tasi o le aiga o iloaina, e o’o fo’i i teine, e leai se tasi o iloaina, e o’o fo’i ia Luisa ma Vesi, e le i ta’uina i ai e Lilo ma Loleta.

 

E fai ane lava tala a le lo’omatua i a Lilo, ae o lo’o opoopo lava e Lilo si ona tei, le tama a lona tuafafine. O le va’ai ai Lilo i le pepe e leai se mea o le tamaloa o Roger e ave’esea i foliga ma mata o Ali’ioaiga. Fai mai, o aso uma e manava ane ai galuega a teine, e le toe tu’ua i lalo le tamaiti, e si’i ane e lea, ua taufao e teine si o latou tei.

 

“Tina, e i ai le mea o lo’o o’u mafatia ai, e moni lava oe, ae o le a fo’i sau va’ai mai ia te a’u, ia malie lou loto, ona ua pau lava o o’u uiga, o le a fo’i sau va’ai i a ma’ua ma Loleta i le taumafaiga o mea o le aiga, ia e fa’amagalo mai ma’ua, ae o le mataupu ou te fia talatalanoa atu ai,” Ae ulufale loa ma Filipina i lea taimi.

 

E faia pea...