Ads by Google Ads by Google

Onosa’i I Mea Tiga

Vaega: 11

 

Fa’afeiloa’i atu i le atunu’u i lenei taeao fou, i lou alafa’i mai i le manuia i le tausiga alofa a lo tatou Matai oi lagi. E ao ai ona o tatou fa’apea ifo, “Le Ali’i, o Oe o Ieova o Au, ia foa’i mai ia i matou le loto osona’i ma le fa’apalepale i lenei aso ma aso uma o lo matou, ina ia mafai ai ona o matou tali atu i faigata ma mafatiaga o lo’o matou i ai, ae ia tumau atu pea le vi’iga ma le fa’ane’etaga i Lau Afio e fa’avavau, fa’avavau lava, amene.”

 

Ua alu aso, sau fo’i aso o le soifuaga, ua le toe laiti, ae ua o’o mai le matua. O taimi fo’i ia, e o’o mai ai ma’i ma faigata i le soifuaga o le tagata. O taimi o le talavaou sa fai lava le ivi o le tagata latou, ae ina ua o’o mai le matua, ua amata ona suiga malie ai mea uma o le olaga. Atonu o le finagalo lea o le Atua, ina ua ia gaosia le tagata i lona fa’atusa ma tu’u atu e nonofo i le fa’atoaga o Etena, e alu aso, sau aso o le olaga, ona o tatou toe manatua ai lea o mea sa o tatou faia i aso o le talavou ma aso o le malosi.

 

Ua fa’apea le tulaga ua o’o nei i ai le soifua o Mose ma Malia, ma ua amata ai fo’i, ona i ai suiga lelei ina ua o’o mai le matua. Ua fa’ai’uina i le manuia a’oa’oga a le le la fanau o Lilo ma Filipina ma ua faigaluega uma tamaiti. Fai mai, o le mea e sili ona ofo ai tagata o le nu’u, ona o le suiga ua va’ai nei i ai i le toeaina o Mose ma le lo’omatua o Malia, fai mai o aso la, e leai se tasi e mate ai le fu’a a le toeaina i totonu o le nu’u. O le lo’omatua fo’i ia, e le mafai ona sau i lalo le lo’omatua, o ai lava le tina o le nu’u e fia tetele i fea, e tasi lava le tala a Malia, nofo e le toe tautala.

 

Ua fesilisili tagata pe o le a le mafua’aga ua fa’apea ai le toeaina ma le lo’omatua, ae lilo i o latou manatu, ua matutua, ua i ai fo’i suiga o le olaga latou i lea taimi, ona ua fa’apena le finagalo o le Atua mo i tatou. Ua iloa e tagata le suiga tele ua o’o i ai uiga o le toeaina o Mose ma le lo’omatua o Malia.

 

Ua faigaluega lelei le la fanau o Lilo ma Filipina, ma o se fanau fo’i e atamamai, ae o le va’ai a le nu’u, o se fanau e ‘ese le usita’i i o la matua. Atonu fo’i o le ala lea ua taunu’u ai i le manuia a la a’oa’oga, ona ua iloa lelei lava, e le mafai ona sasi le lo’omatua o Malia i le tapenaina o lavalava a’oga a lana fanau.

 

Fai mai, e fai lava le tapenaga, ma alu lava ma le ‘ote a le lo’omatua, ae maise lava i si teine o Filipina, “Filipina, e te va’ai i ai pe a le i’u manuia au a’oga, ua e fa’alogo mai i a te a’u, va’ai mai ou te le moe i le po, tau mafaufau po’o mafolafola ou ofu a’oga, po’o lelei piliki o lou taulavalava. ia e toaga i lau aoga, pau lava lea o le mea ou te mana’o i ai. Ou te va’ai atu loa ua tupu mai se fa’alavelave i a te oe, ae e le i i’u au a’oga, e te va’ai lava i ai Filipina, e tilotilo mai tagata o le nu’u, ua ou sele po’oina lou ulu, ma toso fa’atata oe i le aualatele.”

 

Ua le tautala Filipina, ae ua na o le tilotilo ane i lona tina i lea taimi ma lulu lona ulu. “Se tina, se ua ou iloa, e te le taufai mai i a te a’u, ua ou iloa.” E le i toe fa’atali le lo’omatua, “Filipina, ua lelei, o le mea sili lava o le na ua e iloa, ia polili teuteu mai au faiga ma lau amio, ia e teine lelei, e te fiu e fai tama pe a i’u lelei lau a’oga, ae ou te le fia pupula atu lava o tau sa’e mai sou manava ua e fa’alogo mai, aua tailo lava i le mea ou te faia i a te oe.”

 

Ua tu nei le teine ma pupula to’a ane i lona tina, i le va’ai a Filipina, ua sui lava lona tina, ua pae’e, ma e foliga mai ua ma’i. Na fa’ataupupula ane nei le teine i si ona tina ua le tautala, ma i’u lava ina savali ane ma fusi si ona tina i lea taimi. “Malia, ‘aua e te popole, ou te faia uma mea o lo’o e mana’o ai.” O lea la ua i’u manuia a’oga a Filipina ma Lilo, ma ua faigaluega lelei uma tamaiti.

 

Na i’u lava ina oso le ma’i o le lo’omatua o Malia, ma ua le to’a ai le mafaufau o le toeaina o Mose. Ua na o le tilotilo ane i si ona to’alua ua tele tausaga o o la mafuta. Na fa’apea ona  manatu, “Ma’imau e, le olaga pe ana le seanoa le oti.”

 

E faia pea...