Vaega: 69

Alo maia, o le a toe fa’aauau atu la tatou tala mo lenei aso. Na muta mai la tatou tala, ina ua nonofo nei Lilo ma Loleta i le aiga o Lilo. O lea fo’i la ua o fa’atasi e faigaluega, aua o i’ina na masani mai ai.

Fai mai, ua pei o se avega mamafa ua amo nei e Loleta i totonu o le aiga o Lilo, e le mapu le fautua le ‘otegia ma le a’oa’o a le lo’omatua o Malia ia Loleta. Na i’u lava ina fa’apea ane le musumusu a Loleta ia Lilo. “Lilo, e a pe a ta o i le fa’aiuga o le vaiaso e asi o’u matua, ona ta toe o mai ai lea, e lelei fo’i le na se’i sui ai foi la ta fa’alogo.”

Ua le tautala Lilo i lea taimi, ae ua na o le punou ma lulu lona ulu. “Leta, fa’alogo lelei mai lava oe, e le mafai ona ta toe o i lou aiga, o la’u fa’aiuga ua fai, o la’u fa’aiuga lava lea, ta te le toe o i sou aiga, ua lava lo’u aiga ta te nonofo ai, ae afai ua e mana’o e te alu i lou aiga, ia fai le mea e te loto i ai, a’o a’u, ou te nofo lava e tausi o’u matua.”

Fai mai ua le ‘ai le maugu a Loleta, ae ua fa’ate’ia Lilo i le fa’alogo atu ua tagi, “Lilo, e moni lava oe si o’u to’alua pele, ae e tatau fo’i ona ta o i lo’u aiga, e le fa’apea na o ou matua, e i ai fo’i nai o’u matua, ou te fia alu e asi.”

Fai mai, o le masina lea e fanau ai Loleta, o le a la e le o mana’o Lilo e o ai i lona aiga, ae se ola le la tama ona o ai lea e asi ona matua.

Ua le toe faigaluega Loleta, ae ua nofo e fa’atalitali le taimi e fanau ai. Na taofi mai fo’i e le lo’omatua o Malia ia ‘aua ne i toe alu e faigaluega. Fai mai, o se avega mamafa tu ua amo nei e Loleta, ona o lona popole tele, i le tulaga o lo’o i ai ia. Manatua fo’i, ua na o Loleta, lona tina o Susitina ma le tama o Lilo lea o lo’o iloaina le mea atoa, ae e le o iloa e matua o Lilo.

O aso uma pe a manava ane le galuega a Lilo, ua na o le viga o Loleta, la te o i lona aiga, ae e le maluelue ane i ai le loto o le tama. Ae ua le mapu fo’i le va’aiga a le lo’omatua ma le toeaina ia Loleta. O a mea’ai uma e tatau lava ona ave i ai fuala’au ‘aina, o lea galuega o lo’o feagai ma Luisa ma Vesi.

Fai mai, e alu alu fo’i, tau lavea si tamaloa o Vesi ia Luisa, ona o le tele o mea o le aiga e fai. O le isi itu, o lo’o masalosalo lava le loto o Luisa i le ma’i o Loleta, ma ua uma fo’i ona talatalanoa ai ma lona uso, le teine o Filipina. Ae fai mai, o le alolofa i si o la tuagane e to’atasi, lea e mafua ai ona le gagana se tasi o i la’ua i lo la tina.

Ae fai mai, na tau masalosalo lava Luisa, ona o le vave o le masina e fanau ai Loleta, a’o lea fa’atoa fa’aipoipo. O le isi itu, e iloa lava e Luisa le le fiafia o Lilo, ae sa le i mafai lava ona tautala i ai le teine i lona tuagane. O Luisa, o le tama a le tuafafine o Mose, lea ua avea ma a la tama, ina ua maliu lona tina, o lea la ua to’atolu ai le fanau a Mose ma Malia, aua ua le toe ta’u ‘esea Luisa.

O le tele o taimi e tau lavevea ai Luisa ma Filipina i le lo’omatua o Malia, pe a va’ai atu o fa’aletonu se mea, ae maise lava o mea e taoto ai Loleta. O le faiga o mea’ai a Loleta, e le fa’atamala ai le lo’omatua o Malia. E mo’i lava e ‘ote le lo’omatua i le tele o taimi ia Loleta, ae o totonu o lona loto e alofa, ona ua ia iloa o lo’o alofa fo’i i ai Lilo, ae maise ai lava o le atali’i po’o se afafine o si ana tama pe a pule alofa le Atua e ola Loleta, ma tu’u ‘ese’ese fo’i la’ua i se aso oi luma.

E faia pea...