Ads by Google Ads by Google

Onosa’i I Mea Tiga

Vaega: 65

 

Alo maia, o le a toe fa’aauau atu la tatou tala. Na muta mai la tatout tala, ina ua mautu nei le tonu o le a fai le feiloa’iga a matua o Lilo fa’apea ma matua o Loleta. Ae e le o iloa atu e matua o Lilo ia mafatiaga o lo’o feagai nei ma si a la tama, ona o uiga o Loleta, lea ua te’i lava ua le alu atu e faigaluega.

 

Fai mai, ua manava galuega o lea aso, ma sa iloa lava e Lilo e i ai le mea ua tupu ia Loleta, fua i le le vala’au ane ia te ia, ae ua na o le vili ane ma talanoa i le isi teine o le ofisa, ma fai i ai lana fa’anoi, ae ua le tautala ane ia Lilo. Ua lagona lava le fa’anoanoa tele o Lilo ia Loleta, ma o lea fo’i ua manino mai ai le mata o le vai e ‘ese fo’i Loleta latou ma ona uiga.

 

Na manava le galuega a Lilo i lea aso, ma alu sa’o loa i le fale, e le i toe i ai lava se isi mea na manatu i ai le tama. Ua fia va’ai ma fia talatalanoa i onamatua, ma se i fai fo’i se tala po’o le a le mea o mananao i ai ona matua e fai. Ua taunu’u Lilo i le fale, ae e le i taunu’u ane lava le galuega a le tama’ita’i o Filipina, e le i popole i ai le lo’omatua, aua ua iloa lelei e Malia, ua uma ona fa’atonu Filipina i le taimi e tatau ona taunu’u ane ai i le fale.

 

Fai mai na iloa mamao atu lava e le toeaina o Mose le savali atu a si ona atali’i, ma i le va’aiga a Mose i lea taimi, e foliga mai, o lo’o i ai se mea o mamafa i le mafaufau o Lilo.O lea ma ia tua a’e ai loa i luga ma savali mai e fa’afetaui le alu atu a lona atali’i ua mavana lana galuega.

 

Na fa’ate’ia Lilo i le va’ai mai o savali atu si ona tama e fa’afetaui ia, ma o lea na tu ai loa ma fa’atali mai le taunu’u ane a lona tama. Na ona tu lava o le toeaina i luma o lona atali’i, u’u loa ma le lima o Lilo ma fa’apea ane, “Lilo, si o’u atali’i, sau ta o i le ma’umaga o lo’o i ai le mea ou te fia talanoa ai ia te oe, ae e le i faia sa tatou tala ma lou tina.”

 

Ua tu la tama ua te’i, ona sa mamao lava ma lona manatu ia tulaga, o lona loto sa i ai, ia o latou talatalanoa ma ona matua, ae e le na o lona tama, a’o lea ua fai ane le toeaina la te talatalanoa, ae e le i faia sa latou tala ma lona tina. Ua alu nei le solo a Lilo ma lona tama e aga’i atu i tuafale, i le mea o lo’o i ai le maumaga tele lava a le aiga. O lea ma’umaga, o lo’o galue malosi ai le tamaloa o Vesi, fai mai, e le iloga se ituaiga fuala’au ‘aina o lo’o ola ai, e le gata i lea, a’o le fa’i, o le talo, o le ta’amu o esi o moli, so’o se mea, o lo’o ola lauusiusi i le fa’atoaga a le tamaloa o Vesi.

 

Ua taunu’u Mose ma lona atali’i i le ma’umaga, ma ua saofafa’i ifo nei i lalo o se la’au matagofie o lo’o ola i totonu o le fa’atoaga. Na iloa lelei lava e Mose le mafatia o le loto o lona atali’i, aua o Lilo fo’i e fiafia lava i taimi uma, a’o lana va’ai i lea taimi, ua ‘ese lava foliga ma uiga o Lilo ua ia va’ai nei i ai.

 

“Lilo, ia va’ai oe le atali’i, ‘aua lava ne i fa’amamafaina i lou loto se mea e tasi pe lua, ou te mana’o ia e tautala sa’o mai lava ia te a’u, o a’u o lou tama na e iloa ai le lalolagi, tautala sa’o mai lava ia te a’u, po’o fea o i ai lou loto i le lua mafutaga a Loleta.

 

“Afai lava, o i ai se mea o pogatia ai lou loto ma lou mafaufau e uiga ia Loleta, ia e tautala sa’o mai nei ia te a’u, ona ou talanoa ai lea i lou tina, ua e iloa fo’i lou tina, e le mafai ona taofiofia i se mea pe a o’o lava ina le malie i se tasi, ae tautala mai oe ia te a’u, ona ou iloa ai lea o le mea e tatau ona fai.”

 

Fai mai le tala, e le i uma ane tala a Mose i lona atali’i, ae va’aia loa e Mose le maligi ifo o loimata o Lilo i lea taimi. Ua a’apa atu nei Mose ma soloi ‘ese loimata o si ona atali’i e pele i lona loto ma lona mafaufau.

 

E faia pea...