Vaega: 7

“Le Ali’i e, Iesu Keriso, Le suamalie fa’avavau i e ua alolofa ia te Oe, le fiafia ua sili atu i lo fiafia uma po’o ni mo’omo’oga, le fa’aolataga ma le fa’amoemoe o tagata agasala, ia e alofa mai mo i matou, ina ia mafai ai ona o matou talia ma le ososa’i mafatiaga ma puapuga e o’o mai ia i matou, a’o le vi’iga ma le fa’ane’etaga ia tumau atu pea i lau Afio e fa’avavau, fa’avavau lava, amene.

Taeao manuia i le alafa’i mai o le atunu’u i le alofa ma le agalelei o le Atua Soifua, e i ai pea le fa’amoemoe o lo’o aoina le masina i le soifua laulelei o le atunu’u, ae alo maia, o le a toe fa’aauau atu la tatou tala mo lenei aso, ae ia manuia faiva ma tiute o le feagai ai ma oe i lenei aso.

Na muta mai la tatou tala, ina ua fa’ateia le Fa’afeagaiga, o Mose ma Malia, i le tu ane o Vesi ma le taumafataga, o le mea ua tupu, e le i iloa e Vesi, o lo’o i ai le asiasiga a le Fa’afeagaiga i le fale o Mose ma Malia. Na ona tu’u lava i lalo o le ipu, toe liliu loa ma Vesi ma toe tamo’e i lo la fale ma lona to’alua o Luisa. “Luisa, toe asu mai le mea’ai, o lo’o i ai le Fa’afeagaiga i le fale o le lo’omatua ma le toeaina, fa’avave, o lo’o fa’atali mai. Fai mai o le mea’ai na totoe ai, o le mea’ai e fa’atali ai si a la fanau o lo’o o i le a’oga, ae sa le i sili le la fanau, ina ua fa’alogo mai Luisa, o lo’o i ai le asiasiga a le Fa’afeagaiga i le fale o ona matua.

Manatua fo’i, o Luisa, o le tama a le tuafafine o Mose, ae ua maliu si ona tina, o lea ua fa’atamafai ai nei e Mose ma Malia ia Luisa. “Oi ta fe fe, ia sau e toe avatu le mea’ai, ma ia e nofo ai o i le fale o le lo’omatua ma le toeaina e fai feau, se i toe taliu le Fa’afeagaiga ona e toe sau ai lea.” O le aunagi ane lea a Luisa, ma topetope lava le toe ‘asuina o le mea’ai lea na totoe aua si a la fanau a’oga. Na toe liliu nei Vesi ma toe tamo’e fa’atopetope i le fale o le toeaina ma le lo’omatua.

E taunu’u ane Vesi, o lo’o fa’aauau pea le talatalanoaga a le Fa’afeagaiga ma le toeaina ma le lo’omatua i lea taimi, ua le iloga se tala e fai e le lo’omatua o Malia. Ua talatalanoa nei e uiga i le mafutaga a tina o le ekalesia, ua fa’ailoa fo’i e le lo’omatua o Malia, lona le fiafia, ona o nisi o mataupu o lo’o ta’ua i lea mafutaga. Ae na fa’ate’ia ina ua soafa’i ifo Vesi ma amata loa ona laulau le mea taumafa a le Fa’afeagaiga ma le lo’omatua fa’apea le toeaina o Mose. Fai mai, e pei o le gaioi a le va’alele tau a Amerika, le gaioi a Vesi i lea taimi. O mea uma e fa’aleleia ai le taumafataga, o lea ua saunia lelei e Vesi.

“Talofa e, i si a’u tama o Vesi, lau susuga a le Fa’afeagaiga, e ‘ese le lelei o lenei tama o Vesi, a ea? O le tala lea a le lo’omatua o Malia, ma ‘ata, ae na tilotilo ane i ai le toeaina o Mose, i lea taimi. Na toe fa’apea fa’aupuga a le lo’omatua, “Lau susuga i le Fa’afeagaiga, ua laki si o matou aiga, ua i ai Vesi, ua fesoasoani malosi i mea e fai, ae maise ai lo la galulue fa’atasi ma si toeaina nei i le faiga o ma’umaga ma mea fafaga, fa’afetai lava Vesi.”

O le taimi lea, ua na o le punou o le toeaina o Mose, ua pei ua oso a’e le ma’asiasi ma le matamuli i lea taimi. Ua lagona se manatu i le toeaina, ua salamo, ona o lana mea na tau fai i lea aso, a’o lea ua va’ai atu i a Vesi, o se faiava ua sili ona lelei. E leai se mea e tasi o lo latou aiga e fa’aletonu, e fai o le ma’umaga, o meafafaga, aemaise o le tausiga o la’ua, ona o lo’o laiti Lilo ma Lesina.

Ua ‘ata Vesi ma fa’apena ane, “Tina, se o vae a nei ma lima e tautuaina oulua.” Ua le tautala le Fa’afeagaiga, ae ua alo loa mo le taumafata, ua sao le fale atoa, ua lagona fo’i e le Fa’afeagaiga le fia taumafa i lea taimi, ona e fai o le tali na tu’u ane e le faletua i a te ia, lea ua lagona ai lona fa’anoanoa. E ui la ina tutupu ia tulaga uma, ae o lea ua au mai e le Atua le laolao e fa’atino ai fuafuaga lelei, aua le tausiga o le filemu ma le nonofo fealofani o aiga.

Na fa’ate’ia le taumafataga ina ua fa’apea ane le toeaina o Mose, “Vesi, si o’u atali’i, a tu’umuli le Fa’afeagaiga, ona e nofo mai lea, e i ai le mea ou te fia talanoa ai i a te oe.”

E faia pea….