Ads by Google Ads by Google

Onosa’i I Mea Tiga

Vaega: 117

 

Alo maia, o le a toe fa’aauau atu la tatou tala mo lenei aso, ae ia manuia lou alo atu i feau ma galuega o lenei aso.

 

Na muta mai la tatou tala, ina ua tapena nei le malaga a le tamaloa Palagi o Roger, o le to’alua lea o Filipina e toe fo’i mai i Samoa e va’ai po’o a mai Filipina. Ae se i o tatou liliu atu i a Mataniufeagaimaleata ma lona to’alua Palagi o William. Fai mai, o se fiafiaga sili i le tamaloa o Viliamu, le va’ai atu i si ona atali’i, aua ua ola Mataniu, ma o le tama lana tama.

 

O se fiafiaga sili fo’i lea mo Lilo ma Loleta, aua ua va’ai  nei i se tama a se la tama ua fanau mai. Fai mai le tala, e tau le maua e Mataniu ma lona to’alua le la tama, aua e taofiofi e Loleta ma Lilo i lo la fale. O le tele fo’i o taimi, e te’i lava Mataniu ua o’o atu nai ona mauta, e tasi lava le tala a Loleta ma Lilo, ona fai lea e Mataniu.

 

Fai main a tau feoa’i ai lima o Mataniu i mata o si tamaloa Palagi, ina ua tomumu nei Viliamu i le ave so’o e ona matua o le la tama. “Viliamu, e le o avea i se toga vao, o lo’o ave e o’u matua, ae e te tago la e va’ai, o le na fo’i e te faigaluega oe, o lea fo’i e feagai a’u ma mea e tele,  “Afai la o lou mana’oga le na ia fa’afaigaluega se tama’ita’i e tausia le tama, pe a fai o le mea le na e te mana’o ai, ae ou te le mana’o i se teine tausi tama, e leai, leai lava Viliamu, o lona uiga e su’e ane ua lua sosola ma le teine tausi tama ae tia’i a’u.”

 

Fai mai, a fai tala ia a Mataniu, na o le ‘ata o lona to’alua ma tilotilo ane i le teine. i le va’ai a Viliamu i a Mataniu, fai mai, e le suia lava foliga o le tama’ita’i, ai ona o le gaoioi o Mataniu i le tele o mea e fai o le faleoloa ma isi fo’i pisinisi ua va’ai nei e le teine.

 

Ua lelei lava pisinisi a Mataniu ma lona to’alua, e le gata i lea, ae o le faleoloa o Mary’s Family Mart, lea o lo’o va’aia e Filipina ma le afafine la’ititi o Vesi ia po’o le tama teine a lona uso o Luisa. Fai mai, e ‘ese fo’i le masau o le penitala a le tama’ita’i o Samalaulu, e fai fai fo’i tau nenefu le fai’ai o Filipina, e tatope lava e Samalaulu mea uma.

 

A o’o ane la Mataniu e asi ane Filipina ma Samalaulu, fai mai, e taunu’u ane Mataniu, ua uma ona fa’avaesega uma e Samala’ulu mea uma o le faleoloa. O le aofaiga o le tupe na maua i le vaiaso, ae maise fo’i o tupe ua toe fa’aalu e fa’atau mai ai isi mea o le faleoloa. E le gata fo’i i lea, a’o aitalafu fo’i a tagata o lo’o fai pea i le faleoloa, e uma ona fa’apaleni uma e Samala’ulu.

 

Fai mai le tala, a o’o ane nai tagata o le nu’u i a latou aitalafu, e muamua ‘otegia e Samala’ulu, fa’atoa avea ai lea o mea. Na i’u lava ina o’o ane tagata ia Filipina ma fai i ai e uiga i a Samala’ulu. Pau le tala a le teine, “Va’ai outou, ana o se faleoloa o se Kolea, e le taitai lava tou o i ai, aua fo’i e le mafai ai ni aitalafu, a’o lea tou te o mai ma fai aitalafu i le faleoloa lenei, o lea la, tau polili teuteu mai, polili teuteu mai tatou, totogi a outou aitalafu i aso e maua ai a outou siaki, aua e fai fo’i o le avatu, a’o le au mai.”

 

E faia pea...