Ads by Google Ads by Google

Onosa’i I Mea Tiga

Vaega: 110

 

Alo maia, o le a toe fa’aauau atu la tatou tala. Na muta mai la tatou tala ina ua tapena nei le aiga mo le fa’aipoipoga a le tama’ita’i o Mataniufeagaimaleata, ma o se ali’i papalagi fo’i o le a fa’aipoipo i ai le teine. O le ali’i la lenei, fai mai, o lo’o galue fa’akonekarate i le Matagaluega o Galuega a le Malo. O le ofisa fo’i lea o lo’o galue ai le tama’ita’i o Mataniufeagaimaleata. Ua uma ona o’o ane le ali’i Palagi i le aiga o Mataniu, ma feiloa’i ma Lilo ma Loleta fa’apea fo’i le aiga atoa.

 

Fai mai le tala, ua uma ona su’e uma e Mataniu le tala’aga o le ali’i o William, po’o Viliamu, ae ai ana fa’apea o soifua pea le lo’omatua o Malia, se manu e fa’aigoa foi e le lo’omatua si Palagi ia Fiapamu. O le fesili muamua lava a Lilo na fai i le ali’i Palagi lenei, pe fai sona to’alua, ae tali le ali’i e leai, a’o ia o le ulumatua a ona matua, e to’atolu tama, ae leai sona tuafafine.

 

Ua fai nei le polokalama a Lilo ma si ali’i palagi, o le fesili ma tali, ona o le naunau lava o Lilo, ia ‘aua ne i toe tupu mai se isi mea e pei o le tulaga ua o’o i ai si ona tuafafine o Filipina. Ua uma fo’i ona logo e Mataniu i ona matua, ua uma ona ia su’esu’eina le tala’aga o Viliamu, e moni lava ia, e leai sona to’alua, ae to’alua isi ona uso, ua fai to’alua uma tama i Amerika.

 

Na talia ai loa le e Lilo ma Loleta le uo a Mataniu, o lea la o le a alo atu mo le aso fiafia o Mataniu ma le ali’i o Viliamu. Fai mai, ua na o le tilotilo o isi teine, le fanau lea a Lilo i le ali’i o Viliamu, e le gata i lea, ae ua tau alia’e fo’i ma si mea fo’i lea, ua le popoi. A uma ona su’esu’e e Lilo ma Loleta si tama, ona toe su’esu’e fo’i lea e Ataata ma isi ona uso laiti si tama.

 

Ua na o le ata o Viliamu, i tala a teine, ma e fa’ate’ia fo’i le Palagi, ina ua va’ai i le tama’ititi o Ali’ioaiga. Na i’u lava ina fesili Viliamu i a Mataniu, po’o ai le tamaititi pa’epa’e lea e fetamoea’i solo ma sulu ona ie. Na tali i ai Mataniu, o le tama a le tuafafine o lona tama, o Filipina.

 

Ua toe tilotilo ane Viliamu i le tamaititi, ae o le taimi lea, e le o kea ane lava i ai Ali’ioaiga, pau le mea na iloa nei e Ali’ioaiga, e tutusa lelei lava le la pa’eap’e ma le tama lea ua o’o ane ma Mataniu. Na toe fesili le ali’i Palagi ia Mataniu po’o fea la o i ai le tama o le tamaititi, ae tali ane i ai Mataniu, “O le mea le na, e leai lava ma sau feau e te su’esu’e ai fua, o le mea le na e vave ai ona ta’e lou mata.”

 

Ua ‘ata le ali’i o Viliamu i lea taimi ma tilotilo ane ia Mataniu. Fai mai, e ‘ese fo’i le alofa o le ali’o Palagi ia Mataniu, o ona uiga e fa’aali i totonu o le falefaigaluega, o ana mea e fai, ua iloa ai lava e le ali’i palagi, e fa’apea, ua tatau loa ona fa’atatagi logo latou, ‘aua ne i toe fa’atali.

 

Ua fa’apea lava ona fai, fai mai o se aso fiafia tele i le aiga atoa, e moni lava ua le toe va’aia foliga o si o latou tina ma si o latou tama o Mose ma Malia, ae ua lagona lava e Lilo, ua lelei atoatoa si ona aiga, ae se i vagana ai si ona tuafafine o Filipina. Ae i le va’ai a Lilo i a Filipina, fai mai, e pei lava e leai se mea o tupu i le teine.

 

Ua va’aiae Lilo ola fiafia o le tala o Ali’ioaiga, e leai lava se mea o fa’aletonu, e le gata i lea, a’o le fanau fo’i a si ona tuafafine matua o Luisa. Ua maua fo’i fanau a fanau, ia o se fiafiaga sili lea i a Lilo ma Loleta. O le isi itu, o lea ua uma le fa’aipoipoga a Mataniu ma lona to’alua, ia ua sologa lelei lava aso o le olaga.

 

Na tau nei i le mafaufau o Filipina, o le a fai sona faleoloa, e fesoasoani i le a’oga a si ana tama, ae maise o nai tagata o le nu’u e fia maua se fesoasoani i le itu tau i le tausiga o le tino. O lea na tatala ai loa ma le faleoloa o Filipina. Fai mai le tala, o se faleoloa ua sili ona matagofie, o a lava mea e tau su’e, e maua uma i le faleoloa, Mary’s Family Store. Ua fa’aigoa e Filipina, i le igoa o si ona tina o Malia.

 

E faia pea...