Vaega: 109

Alo maia faaauau le tatou tala. Ua fa’asolosolo pea aso o le olaga, ua matutua fo’i le fanau a Lilo ma Loleta, fa’apea Luisa ma Vesi, ma ua faigaluega ma ua tu lelei fo’i le aiga. Fai mai, ua le toe ola tau fa’asoasoa, ua maua lava mea uma i le taimi e mo’omia ai. Fai mai, talu ona maliu si o latou tina o Malia, e le galo i le fanau ona uiga ma ana tala e apoapoa’i ai i latou.

Ua maua fo’i le tama a le teine o Sesilia le tama matua a Vesi ma Luisa, o se fiafia telefo’i lea ia Luisa ma si ona to’alua. Ae fai mai, e le maua e Matalena ma si ona to’alua le la tama, ua ola a’e lava i lima o Luisa ma Vesi. E musu le to’alua o Matalena e fafaga e Luisa le la tama i talo ma fa’i, e mana’o lava le tamaloa e fa’atau mai ‘apa supo mai le faleoloa e fafaga ai.

Na i’u fo’i ina lavea ai Matalena i le tala a lona tama, “Malia Matalena, fai i lou to’alua, pe na masani ai, e, fai i ai pen a fafaga e ona matua i ni na mea, va’ai, ai na mama fa’asolosolo i ai e lona tina le fa’i ma le talo, a’o lena ua fia tama autu.”

Ua le tautala Matalena i lea taimi, ae ua na o le tilotilo ane i si ona tama, ma ua ia iloa ai, ua matua fo’i Vesi, ae e le mafai e le tamaloa ona malolo, fai mai, lava lana tala, a e le gaioi e maua se fasi momo, ae e le gaioi e te le ‘ai. ia o tala la ia a fa’alogo i ai Matalena, ona ‘ata lea ma tilotilo ane i si ona tama.

Ua tapena nei le aiga mo le fa’aipoipoga a le tama’ita’i o Mataniufeagaimaleata, fai mai o se ali’i Palagi fo’i o le a nonofo ma le tama’ita’i. Ae fai mai, ua uma ona su’esu’e lelei e Mataniu mea uma e uiga i lana uo. Ua toe mafaufau alofa nei i le tuafafine o si ona tama, le teine o Filipina ma le mea lea ua tupu ai nei. Ae fai mai, i le va’ai a Mataniu, e ‘ese le loto tele o Filipina, ma e leai se mea e fa’aletonu i le teine, i le tausiga o si ana tama, lea ua fitu nei ona tausaga. O se tamaititi e ‘ese le lalelei i le va’ai. O le mea ua tupu, e fenanui lava i ai teine, ma o le mea fo’i lea, ua atamai ai le tama a Filipina.

O ana lipoti e maua mai i le a’oga, e leai se mataupu e fa’avivai ai le tamaititi, ae se i vanaga ai lana Fa’aSamoa, ae e le o popole i ai Filipina, aua o lana galuega lea o lo’o fai nei, o le a’oa’o o lana tama i le gagana fa’aSamoa. Fai mai, e alu alu fo’i a ita nei Filipina i lana tama, ua alu le nanu a le lo’omatua, “Alfred, you listen to your Mom, okay, you just listen to me.”

Ua le iloa ai la e Ali’ioaiga, po’o le a le mea e fa’alogo ai i lona tina, ona e leai se fa’atonuga o fai ane i a te ia. Ua ‘ata le tama’ititi ma tilotilo ane i si ona tina e pele i lona loto. O le va’aiga a Lilo i totonu o lo latou aiga, ua mautu mea uma, ae le mafai lava ona ave’ese lona fa’amoemoe, e i ai se taimi a’o se aso e toe fo’i mai ai Roger, e asi lona atali’i.

O le mea ua tupu, ua mafaufua nei Lilo, o le taimi lava e toe o’o mai ai le Palagi, ua lagilagi loa ma le no’o i se afi. A le o le na fo’i, ua ave e sisi fa’atautau mai i lalo le ulu. A fai fai mafaufauga ia o Lilo, te’i lava ua ‘ata na o ia, ae ona va’aia loa le savali mai a Ali’ioaiga i lona fale. Ua tu a’e nei i luga Lilo ma savali ane e fa’afeiloa’i i le tama a si ona tuafafine e pele i lona loto.

E faia pea...