I le aso Faraile na te’a ua toe fa’amauina e le A’oga Maualuga a Leone le manumalo i tauvaga uma na fa’atino mo le Speech Festival - Tauvaaga Lauga -  a A’oga Maualuluga uma i le tatou teritori, ma o le lona 31 lenei o le tauvaga faatautaia e le malo. O latou togi aofa’i e 68 ua maua ai e i latou le togisili i le tu’ufa’atasiga o vaega e ono sa tauva ai.

O le tulaga lua na maua e Tafuna High School i togi tu’uaofa’i e 63. Tulaga tolu Fagaitua High i o latou togi aofai e 60 na maua.

I le vaega muamua o le Monologue e fa’atino ta’itoatasi e tusa ai o le fa’atonuga i ituaiga tala e fa’aaoga. Na maua ai e Meloniga Brown mai Faga’itua le tulaga muamua. Tulaga lua Faith Loia mai Leone ma le tulaga tolu Torrey Monotaga mai le South Pacific Academy.

Mo le fa’atinoga o le Solo Tusia, tulaga muamua Jimmy Lopa mai Leone High, tulaga lua Emla Solaita mai Tafuna High ae tulaga tolu Jerry Sauni mai Fagaitua High.

O le vaega o le tauvaga e Fa’atino Taito’alua ai se tala tusia “Dual Acting” na sola ai ma Ana Kutty ma Miracle Mailo o Tafuna High le togi silia i lea fo’i fa’atinoga. Tulaga lua ai e tolu fa’atinoga na tulaga tutusa: Garion Langford ma Yasminna Sanchez o Samoana High, Monique Hollister ma Michelle Miller o le SPA ma Honoring Leaupepe ma Olyvia Ta’ase o Fagaitua High. Peita’i o le tulaga tolu na maua lea e George Fuimaono ma Olynn Ara mai Leone High.

O le Vaega o Lauga Taito’atasi e fa’ato’a tuu mai lava ia te oe le ‘auga o lau lauga i le taimi o le a faia ai. O se tasi lea o tauvaga faigata peita’i o le sui na ia mauaina le tulaga muamua i togi ua ausia, o le tama’ita’i ia Karlinna Sanchez o Samoana High. Ua fa’atolu ona ia mauaina le tulaga muamua ma ua agava’a fo’i o ia mo le Ipu na sauna e le susuga le Tusitala Amerika Samoa ma ua fa’aigoaina o le “John Kneubuhl’s Award.” Fa’afetai o lenei fo’i tausaga ua ausia ai e se tasi o tamaita’i a’oga lenei matatia e tulituli’aupu e le vasega o fanau a’pga ae maise o Aoga Maualuluga i le vaega a le Gagana Pesetania, aua e le faigofie ona ausia nei tulaga e se tasi o tauva ai i lea ituaiga o tauvaga, “Impromptu Speech.”

O lenei fa’ailoga ua atoa le sefulu o tausaga, e le’i toe mauaina lava e se tamaititi aoga, peita’i o lenei tausaga ua maua e Karlinna, e vasega 11. O le auga o lana lauga sa ia pikia i le taimi na tula’i ai, sa saunoa ai “Pe alagatatau ona fa’aaogaina le Fasi po’o le Sasa e fa’atonu ai fanau i totonu o A’oga? O lona taofi, e le tatau ma e tatau ona matua taofia le sauaga i totonu o aoga.

Tulaga lua i le tauvaga lava lea o John Iosefo mai Tafuna High, ma sa ia pikia fo’i le ‘auga na saunoa i ai Karlinna i lana folasaga. Peita’i o le tulaga tolu sa mauaina lea e Madeyn Fuimaono mai Fagaitua High.

O le vaega o Tala Fatu tusia mo se fa’atinoga,  po’o le “Original Script Writing” na manual ai le tala tusia mai Leone High lea sa fa’atino e Agnes Manning, Aleluia Vaina, Novoa Fagaima, Talavera Toilolo ma Matilda Kaio. Ma sa latou fa’atinoa ai nisi o agaga moni o le alofa o se malosi’aga lea e taofia ai le nofo fealofani i totonu o Aiga.

Na tulaga lua ai le fanau mai le Fa’asao Marist High lea sa latou tusia le tala “Aganu’u ua Mou Ese Atu” po’o le Lost Culture. Sa fa’atino e le fanau le tulaga o le Laei Samoa Moni ua taina mo nisi, ae matua leiloa lava le aoga ma le ogaoga o lea agaifanua a le atunu’u, ma ua leiloa lava se mea e patino i lea lae’i. O i latou na aofia ai i le fa’atinoga o Tuilei Scanlan, Melelinikeo Rose Manila, Fa’ananea Vimoto, Kealoha  Betham ma Anncelita Meli.

Tulaga tolu ai le tala tusia ma le fa’atinoga na tapena i ai le aoga maualuga a Tafuna. O i latou sa fa’atinoa e aofia ai Julia Tufele, Alex Ieremia, Inu Young, Mua Fiatoa, Celestial Lotulelei ma Manteau Mase. O le latou tala e faatatau i le fa’auo le amioleaga ma le tamaititi amio lelei, e i’u lava ina leaga ai le amiolelei.

Fa’atinoga to’atele o ni tala ma e faia fo’i ma teuga uma o nofoaga o tusia mai ai nei tala po’o le Contemporary Choral Recitation na mulimuli  ma na tulaga muamua ai Leone High i le latou tala “Tragedy of Orpheus and Eurydice” na tusia e Adam Vergante. Tulaga lua ai le fa’atinoga matagofie a Samoana i le tala “Wife of Bath” na tusia e Geoffrey Chaucer ae tulaga tolu ai le fa’atinoga a Tafuna i le tala “The story of Alcestis by Euripides” na tusia e Richard Aldington.

I lenei tausaga na auai uma lava a’oga maualuluga a le malo, fautasi ai ma Iakina Academy, South Pacific Academy, Pacific Horizons ma Fa’asao Marist High. Peita’i  ua le mailoa le mafuaga ua le auai ai le Aoga Maualuga a Kanana Fou, ae o se tasi fo’i o a’oga maualuga e matua uiga ese fo’i le tula’i mai i nei ituaiga o tauvaga i totonu o le teritori.

O i latou na galulue malosi mo le fa’atulagaina o le Speech Festival 2017 ua aofia ai: Pualani Fui ma Ruby Ripley, ae o le fa’afetai tele lava i a’oga taitasi.