Ads by Google Ads by Google

MAGEO: Maualuga tau o le soifuaga ae maualalo totogi amata

ausage@samoanews.com

O se tasi o mataupu na fesiligia ai e afioga i Faipule sui o le Komiti o le Tupe a le malo i le taeao ananafi, i le taimi o le iloilioga o le pili e si’i ai tau o tautua i luga o le uafu, o le fuafuaga a le malo e fa’aee lafoga i pisinisi ma sii totogi o tautua i luga o le uafu, ona atili ai lava lea ona maualuga le tau o le soifuaga ae o lo o tumau pea le maualalo o totogi amata.

 

Na taua e le afioga i le ali’i Faipule ia Veevalu Meauta L. Mageo e fa’apea, o lona popolega o lo o i ai i le tulafono lenei, soo se taimi lea e sii ai e le malo totogi o ana tautua, e alu sa’o lava le mamafa o ia siitaga i luga o tagata fa’atau, o i latou ia o le a fa’aee i ai e le aufai pisinisi le mamafa o le avega.

 

“Afai o le a sii le tau o totogi a le malo i luga o le uafu, a o lea fo’i o lo o fuafua le malo e fa’ae’e le lafoga o oloa e 7%, ona atili ai lava lea ona alu i luga le tau o oloa ma taugata ai le soifuaga, ae o lo o tumau pea le maualalo o totogi amata mo le to’atele o tagata,” o le saunoaga lea a Mageo.

 

“To’atele aiga e le lava le fa’asoa, e le gafatia e i latou si’itaga o le a faia e le aufai pisinisi, e mafua mai ona o tau fou ua fuafua le malo e fa’ae’e i le totogi o uta ma soo se tautua. E le fa’apea ou te tete’e i le tulafono, ae o le agaga e fia fa’asoa atu, sa tatau ona faia sa outou suesuega i aafiaga e o o i ai tagata lautele pe afai ae pasia lenei tulafono, ae o le tulaga lea ua maitauina, sau lava le isi pili tupe oso i luga o le isi pili tupe ae a’afia ai lava tagata lautele.”

 

“Ua tele naua pili tupe ma lafoga ua faia e le malo, ae le o siia lava totogi amata o tagata, ina ia tula’i mai i se tulaga lelei ma talafeagai. E le o se tulaga talafeagai lea i lo’u nofonofo atu, o le ta sii o lafoga ma pili ae le siia totogi o tagata. O lea lava fo’i e taofi e le faigamalo ia tupe fa’asili mo totogi o tagata faigaluega e le o totogia (increment).”

 

Na saunoa le afioga i le ali’i Fa’atonusili ia Kenisel Lafaele, o le isi lea totino o le Komiti o le Tupe a le malo e fa’apea, na oo lava suesuega a le Komiti i le tulaga pagatia o tagata ma le maualalo o totogi amata, o le mafua’aga lena na manatu ai le Komiti, o le a si’i lafoga ma tau o tautua ina ia maua ai se tupe mo le malo, ae o le fesoasoani mo tagata lautele, o le a aveese le lafoga o totogi e 2%, ina ia mafai ai ona toe fa’afo’i atu lea vaega tupe i lima o tagata o le atunu’u.

 

Na toe saunoa Mageo e fa’apea, e i ai lona talitonuga e le o lelei ona ao e le malo le tupe mo le lafoga o totogi e 2%, a o lea ua fai mai e toe fa’afo’i i tagata o le atunu’u, ae a vaai atu i le lafoga o oloa e 7% lea ua fa’amalumalu mai, e foliga mai o le tu’u fa’atasiga lea o le lafoga e 5% mo oloa i luga o le uafu ma le lafoga o totogi e 2%.

 

Na vave le fa’auilavea o Keniseli ma ia saunoa e fa’apea, e le o le auala lea na fa’avae ai le fuafuaina o le lafoga o oloa e 7%.

 

Na faaopoopo atu le Fofoga Fetalai ia Savali Talavou Ale i le saunoaga a Keniseli ma ia taua ai e fa’apea, e le o fa’aletonu le aoina e le malo o le lafoga o totogi e 2%, o lo o tulaga lelei lava fa’amaumauga a le malo e tusa ai o le lafoga lea.

 

Ae na saunoa le Teutupe ia Ueligitone Tonumaipe’a e fa’apea, e na o pisinisi tua o lo o tula’i mai ai le fa’aletonu i le aoina o le lafoga o totogi e 2%, ona o le lafoga lea e ta’i 3 masina ma ao. O le tele o le aufai pisinisi, e le totogia atu a latou lafoga pe a mae’a le ta’i 3 masina, ae talosaga pe mafai ona fa’atoa totogi pe a mae’a le tausaga, o le isi lena tulaga faigata na feagai ma le malo i le tau fa’amaopoopoina o le lafoga.

 

Saunoa le afioga i le ali’i faipule ia Timusa Tini Lam Yuen e fa’apea, a mafaufau atu i le pili e sii ai tau o tautua i luga o le uafu, e leai lava se eseesega ma le pili lea na faaulu mai e le faigamalo i le nofoaiga ua mavae atu, e si’i ai totogi mo laisene pisinisi mai le $25 i le $150.

 

O popolega e pei ona tula’i mai, ona o lea ua maua i le ripoti a le malo, ua fa’aitiitia le aofa’i o pisinisi sa lesitala i le tausaga tupe lenei, ma e i ai lona talitonuga atonu o le isi lea mafu’aaga.

 

Na taua e Timusa lona malamalama i le tulaga pagatia o lo o i ai le malo i le taimi nei i le itu tau tupe, ae tatau fo’i ona silasila toto’a i a’afiaga o pisinisi ma le atunu’u lautele pe afai ae soona sii lafoga ma tau o tautua a le malo.

 

Saunoa le afioga i le ali’i faipule ia Gafatasi Afalava e fa’apea, e faigofie tele i le malo ona fai mai, “o le lafoga o totogi e 2% lea la’a toe fa’afo’i i tagata”, e aunoa ma le taumafai e fa’amalamalama lelei i le atunu’u le isi avega mamafa o lo o fa’amalumalu mai i luga.

 

“Talofa e i nai tagata lima vaivai o le atunu’u, e le o malamalama atoatoa i latou i nei faiga, o lea ua aveese le 2% ae toe fa’aopoopo i luga le tau o lafoga ma oloa. Ou te lagolagoina le pili ae o le fautuaga, ia fai fuafua fo’i a tatou gaioiga ma silasila alofa i le pagatia o tagata,” o le saunoaga lea a Gafatasi.

 

Na tau le mau le toovae o ni isi o afioga i Faipule ina ua saunoa le afioga i le ali’i Faipule mai Saole ia Kitara Vaiau e fa’apea, e sili atu ai le faigamalo a “Upolu” i le faigamalo a Amerika Samoa, ona e tele atu atina’e latou e tua i ai lo latou tamaoaiga nai lo tatou iinei, e leai ma se atina’e e tua i ai le tamaoaiga a le malo, se’i vagana ai tupe o lo o aumai i le malo tele, ma lafoga o lo o maua mai i tautua eseese.