Na fa’aaoga e le afioga i le Lutena Kovana ua toe filifilia a le malo mo le isi 4 tausaga ia Lemanu Peleti Mauga, le avanoa na ia maua e saunoa ai e fai ma sui o le afioga i le ali’i kovana ia Lolo Matalasi Moliga ma tagatanu’u uma o Amerika Samoa, i le tatala aloaiaina o le Fonotaga lona 7 a le Vaega o Soifua Maloloina a Samoa e lua i le taeao ananafi, e fa’aleo ai lona agaga fa’afetai i le atunu’u e tusa ai o le fa’aiuga o le palota na fa’atoa mae’a atu a Tutuila ma Manu’a.

O le ogatotonu o le saunoaga fa’afeiloa’i a le afioga i le ali’i lutena kovana e fa’afeiloaia ai sui usufono eseese o lo o auai i le fonotaga lea o lo o talimalo ai Amerika Samoa, na ia manatu ai loa e fa’aleo sona lagona e tusa ai o le faiga palota a le atunu’u ua mavae atu.

“Talu ai o le ulua’i fonotaga tele lenei ua usuia i Amerika Samoa, ma maua ai so ma avanoa ma le afioga i le ali’i kovana e tulei saunoa ai talu ona mae’a le palota a le atunu’u i le vaiaso na te’a nei, ua ou manatu ai e fa’aaoga lenei avanoa e fa’aleo atu ai so maua lagona ma le afioga i le ali’i kovana”, o le saunoaga lea a Lemanu i lana saunoaga puupuu sa fa’aleoina i le gagana Samoa.

“Le paia e o Amerika Samoa ua maua le avanoa e afifio mai ai tatou te molimauina lenei fa’amoemoe taua, fa’afetai atu i lo outou afifio mai, o lea ua tuana’i atu le fa’amoemoe o Tutuila ma Manu’a e pei ona i ai lana sailiga tofi i lena vaiaso, o le a lava le tulaga ua taoto i ai lena fa’amoemoe, tatou fa’atuana’i ma lafoa’i le aso ananafi, ae tatalo atu ma le agaga maualalo, o mai tatou galulue fa’ataasi mo le atina’eina o lo tatou malo”, o le saunoaga lea a Lemanu.

Na fa’afetai fa’apitoa le Lemanu i le afioga a Salanoa Iuni Maeva Saveena sa i ai i totonu o le Fale Laumei i le taimi o le fonotaga, ina ua mafai ona fa’aalia lona finagalo lagolago i le fa’amoemoe o le puipuia lea o le soifua maloloina o tagatanu’u o Samoa e lua.

“E fa’afetai atu i le afioga a Salanoa lea ua molimauina le mafuta mai i lenei taeao (taeao ananafi), o le agaga moni lena o i maua ma le ali’i kovana, ina ia tatou fa’atuana’i le aso ananafi, ae tatou o mai fa’atasi e fa’atino la tatou galuega na tofia i ai tatou e le Atua, o le tautuaina lea o le malo ma ona tagata”, o le saunoaga fa’aiu lea a le afioga i le lutena kovana.

Ina ua fesiligia e le Samoa News le afioga a Salanoa i le aso ananafi, sa ia fa’aalia ai lona agaga fiafia ina ua maua le avanoa e fa’atasi atu ai i le fonotaga lona 7 a Vaega o le Soifua Maloloina a Samoa e lua, aemaise ai fo’i o le tatau lea i tagata uma ona galulue fa’atasi e saili auala e fa’aleleia ai le tautuaina o le soifua maloloina o le atunu’u.

O Salanoa o le sui tauva mo le tofi lutena kovana i le pa’apa a Tuika ma Salanoa.