E leai ni fa’alavelave matuia na tutupu i le aso Lua na te’a nei, a o alo atu Amerika Samoa mo lana sailiga tofi mo lenei tausaga, e ala i lana palota sa fa’atinoina i le aso 8 Novema 2016.

Na fa’amaonia mai e le afioga i le Komesina o Leoleo ia Save Liuato Tuitele i le Samoa News le leai o ni fa’alavelave matuia na tutupu i le aso o le palota a le atunu’u ua mavae atu.

Sa ia taua lona tofia o vaega taitasi o ali’i ma tama’ita’i Leoleo e tiute i nofoaga eseese sa i ai nofoaga autu a vaega ta’itasi, atoa ai ma le ta’amilo o Leoleo i le motu atoa i le taimi o le palota, ina ia mautinoa e to’a filemu le sailiga tofi a le atunu’u.

Na maitauina e le Samoa News vaega o Leoleo sa tiute i nofoaga taitasi sa avea ma nofoaga uatu a vaega sa tausinio i tofi a le atunu’u i le aso o le palota, lea fo’i sa latou fesoasoani i le tausiaina o le filemu i le atunu’u.

E na o le to’a 3 i latou na taofia e Leoleo i le po o le aso o le palota na mae’a atu nei, ma maua ai le avanoa e tutula’i ai i luma o le fa’amasinoga fa’aitumalo i le taeao ananafi, ona o tu’uaiga mama e aofia ai le fa’atupu vevesi ma le ‘ona i nofoaga faitele.

O le isi to’alua na tu’uaia i le ‘onana ma le fa’atupu vevesi i nofoaga faitele, ae o le isi to’atasi na tu’uaia i lona faia o sauaga fa’asaga i lona to’alua, o se tasi o solitulafono ua maitauina le fa’atupulaia i totonu o le atunu’u i le taimi nei, ona o sauaga i le va o ulugali’i ae a’afia atu ai ma fanau.

Na taua e le loia ia Mahoni McCormick mai le Ofisa o le Loia Fautua mo tagata lautele e fa’apea, o i latou uma e to’a 3 na taofi mai e Leoleo ma tutula’i i le taeao ananafi, e le o ni mataupu e fa’atatau i le palota na a’afia ai i latou, ae o vevesi lava na tutupu i totonu o aiga ma afioaga o lo o nonofo ai i latou.

I faiga masani a le fa’amasinoga fa’aitumalo, na toe tatala ai i tua i latou na taofia mai ananafi, ina ua mae’a ona latou teena tu’uaiga mama fa’asaga ia te i latou, ma fa’atulaga ai loa taimi ma aso e toe valaauina ai a latou mataupu.

O ni isi o tuutuuga ua tatalaina ai i tua i latou na molia, e aofia ai le fa’asa lea ona latou toe soli se tulafono, fa’asa ona toe tagofia le ‘ava malosi, a ia avea i latou ma tagatanu’u e tausisi i tulafono a le malo i soo se taimi, ma ia aua fo’i nei o latou toe solia se tulafono.