O le taeao ananafi na amata aloaia ai i luma o le Vaega Iloilo o le Fa’amasinoga Maualuga a Amerika Samoa, le iloiloina o le mataupu i le va o le Ekalesia Faapotopotoga Kerisiano i Amerika Samoa (EFKAS), ma le susuga i le ali’i Faifeau lea ua fa’amalolo, susuga Rev. Elder Amaama Tofaeono ma lona faletua ia Joan Aleluia Tofaeono, e mafua mai ina ua le usitaia e Rev. Tofaeono le fa’aiuga a le Komiti a le Au Toeaiina o le Ekalesia e tula’i ese ai mai le fale o le Ekalesia ma lona aiga.

O le afioga i le ali’i fa’amasino ia Elvis P. Patea o lo o fa’atautaia le iloiloina o lenei mataupu (bench trial), fa’atasi ai ma le lagolagosua a afioga i Fa’amasino Lagolago ia Su’apaia Pereira ma Satele Lili’o Satele.

O le tama’ita’i loia ia Gwen Tauiliili-Langkilde o lo o tula’i mo le itu a le Ekalesia Aoao, o i latou fo’i ia o lo o tagi i lenei mataupu, ae o le ali’i loia ia Tasi Tuiteleleapaga o lo o tula’i mo le susuga a Rev. Tofeaono ma lona faletua, o i laua ia o lo o fa’asaga i ai le tagi a le Ekalesia Aoao.

E tusa ai ma fa’amaumauga a le fa’amasinoga maualuga, o lenei mataupu na tofu ai i le fa’amasinoga ina ua le usitaia e Rev. Tofaeono ma lona aiga le fa’aiuga tusitusia a le Komiti a le Au Toeaiina sa tu’uina atu i le aso 22 Mati 2017, e fa’atonuina ai le tuua o le maota o le Ekalesia sa la aumau ai ao avea i laua ma Failautusi Aoao o le Ekalesia.

E tusa ai o le fa’aiuga tusitusia a le Komiti a le Au Toeaiina o le Ekalesia e pei ona avea nei ma se tasi o mau fa’amaonia o lenei mataupu, ia oo atu i le aso 31 Mati 2017 ua tuua e Rev. Tofaeono ma lona aiga le maota o le Ekalesia.

Ae tusa ai o le molimau a le Sui Taitaifono o le Ekalesia EFKAS ia Rev. Elder Faaeteete Saifoloi sa tu’uina atu i luma o le fa’amasinoga maualuga i le taeao ananafi, e le gata e lei usitaia e Rev. Tofaeono ma lona aiga le fa’aiuga, ae e o o mai lava i le taimi nei o lo o latou nofoia pea le maota o le galuega i totonu o le nofoaga autu o le Ekalesia i Kanana Fou.

O le fa’aiuga a le Komiti a le Au Toeaiina na faia ina ia tula’i ese Rev. Tofaeono ma lona aiga mai le maota o le Ekalesia, na afua mai lea i le ulua’i fa’aiuga sa faia e fa’amalolo ai le tofi Faifeau Toeaina o Rev. Tofaeono mo le tasi le tausaga, ae fa’amalolo le tofi Faifeau a lona faletua ia Joan Aleluia Tofaeono mo le 3 tausaga.

O le fa’amalolo ai o le tofi Faifeau Toeaina o Rev. Tofaeono, na otomeki ai ona aveesea ma lona tofi o le Failautusi Aoao o le Ekalesia EFKAS, ona i lalo o le Fa’avae o le Ekalesia, o se Faifeau Fa’au’uina e tatau ona ia umia le tofi o le Failautusi Aoao.

O le mataupu e pei ona fetineia’i ai le va o le Ekalesia EFKAS Aoao ma le susuga i le ali’i Faifeau ua fa’amalolo ia Rev. Tofaeono ma lona aiga, na alia’e mai i se fa’aiuga na faia e le Komiti a le Au Toeaiina a le Ekalesia Aoao, e fa’amalolo ai le tofi Faifeau o Rev. Tofaeono ma lona Faletua, ona o se mataupu na tula’i mai i le lotoifale o le la aiga na mafai ona oo atu i luma o le Komiti a le Au Toeaiina.

O lea mataupu e pei ona taua e Rev. Elder Saifoloi i lana molimau, o tu’uaiga e fa’atatau i se mafutaga fa’alilolilo sa faia i le va o Rev. Tofaeono ma se isi “fafine”, ao aumau ai le faletua o Rev. Tofaeono i Niu Sila mo le sailiina o lona Fa’ailoga Foma’i i tulaga tau a’oa’oga.

A o aumau ai le faletua ia Aleluia i Niu Sila ma si ana tama e pei ona taua i le molimau a le Ekalesia, sa ia maua atu ai mai ni isi o “ana uo fa’atuatuaina” i Amerika Samoa nei ni fa’amatalaga e faatatau i se mafutaga fa’alilolilo a lona to’alua (Rev. Tofaeono) ma se tasi o fafine.

O le fa’ateia tele o le ali’i faiteau i le malaga fa’afuase’i mai o le Tina o le galuega ma lona afafine, na mafua ai loa ona tula’i mai se vevesi i le lotoifale o le la aiga, ma i’u ina lalafo ai e le ali’i faifeau le tele o upu mamafa e ono save’u ai le lotoifale o le la aiga.

O le fia maua e le Tina o le galuega o se fesoasoani, na sulu ai loa i le ofisa o le Sui Taitaifono o le Ekalesia Aoao ia Rev. Saifoloi, ma fa’ailoa uma ai tulaga e pei ona tula’i mai i le la aiga, ma talosagaina ai loa le Ekalesia Aoao mo se fesoasoani i lo la aiga.

Ao lei gaioi le Ekalesia mo se fesoasoani, na faifai tetele le mataupu ina ua alu le Tina o le galuega i le ofisa o le fafine o loo ta’u ai le igoa o le ali’i faifeau ma fesili i ai pe moni tala ua ia fa’alogo i ai, ma i’u ai loa ina fa’ao’olima le Tina o le galuega i le fafine lea, e ala i lona titina o lona ua ma toetoe ai lava ina oti e pei ona taua e Rev. Saifoloi i lana molimau, ae fa’afuase’i ai loa ona taunu’u atu le ali’i faifeau ma fa’afilemu le mataupu.

O le aafiaga o le Ekalesia i lea mataupu e pei ona taua e le Sui Taitaifono o le Ekalesia Aoao i lana molimau, e le gata ua faila le ripoti i le Ofisa o Leoleo, ae ua silafia uma e le to’atele o tagata Ekalesia.

Ao lei fono le Komiti a le Au Toeaiina faapea ai le Laulauafono a le Ekalesia Aoao mo le talanoaina o se fa’aiuga i lenei mataupu, na maua le avanoa e talanoa muamua ai le Sui Taitaifono o le Ekalesia ma Rev. Tofaeono e uiga i lenei mataupu, ma ia ioeina ai mea uma sa tutupu e pei o le vevesi i le lotoifale o le la aiga ma le Tina o le galuega.

“Talu ai le ogaoga o lenei mataupu ma a’afia ai olaga fa’aleagaga o le aufaigaluega, tagata lotu atoa ai ma tagata galulue o le Ekalesia Aoao, sa ou fa’ailoa ai loa ia Rev. Tofaeono ma lona faletua ia Aleluia, o le a ou le natia le mataupu, ae o le a ou logoina le Ta’ita’ifono o le Ekalesia Aoao faapea ai ma le Komiti a le Au Toeaiina mo se fa’aiuga”, o se vaega lea o le molimau a Rev. Saifoloi.

O le ulua’i fonotaga e talanoaina ai se fa’aiuga i lenei mataupu sa faia lea i le aso 27 Tesema 2016, ma faai’uina ai le fa’amalolo o le tofi Failautusi Aoao mai ia Rev. Tofaeono mo le 4 vaiaso, ma ia tuua loa le maota o le Ekalesia e aua nei toe solia.

O sui e to’afa sa faia le fa’aiuga lea e aofia ai le Ta’ita’ifono Aoao o le Ekalesia ia Rev. Elder Mamoe Jr, Sui Taitaifono ia Rev. Elder Saifoloi, o Rev. Elder Fiti Aofia ma Rev. Elder Leatulagi Fa’alevao.

O le aso 5 Ianuari 2017 i le taimi o le Fonotaga a le Komiti Galulue a le Au Toeaiina, na latou tauaaoina ai se tali tusitusia mai ia Rev. Tofaeono e uiga i lenei mataupu, ma fa’ailoa ai lona taliaina o isi vaega uma o le fa’aiuga, sei vagana ai le fa’aiuga e fa’atatau i le tuua o le maota o le Ekalesia na te lei talia, ona sa ia taua lona fia nofo pea i le maota o le Ekalesia, e leai se mea e o i ai ma lona aiga.

O le aso 22 Mati 2017 na fa’atoa usuia ai le fono a le Au Toeaiina lea e tatau ona usuia i le masina o Ianuari o tausaga ta’itasi, le taimi tonu lea o le mafutaga ma le Au Toeaiina mai Samoa, lea fo’i na auai mai ai ma le Au Toeaiina mai Niu Sila, Ausetalia, Hawaii ma Amerika, ma fa’amautuina ai loa le fa’aiuga tusitusiga fa’asaga ia Rev. Tofaeono ma lona faletua.

O lea fa’aiuga e pei ona taua, o le a fa’amalolo le tofi faifeau o Rev. Tofaeono mo le tausaga e tasi, ae o le a 3 tausaga e fa’amalolo ai le tofi faifeau a lona faletua, o le a tuua fo’i le maota o le Ekalesia ia le silia ma le aso 31 Mati 2017.

O lo o fa’aauau pea lenei mataupu i luma o le Fa’amasinoga Maualuga i le taeao nei.