Ads by Google Ads by Google

Fuafua le tatalaina o le Falepuipui fou i le vaiaso fou

Se tasi o vaega o le falepuipui tuai o lo o i ai i Tafuna i le taimi nei.  [ata AF]
Fuafua le tatalaina o le Falepuipui fou i le vaiaso fou
ausage@samoanews.com

O le tatalaina ai o le Falepuipui fou a le malo i Tafuna i le aso Tofi o le vaiaso fou, e pei ona fa’amaonia i le fonotaga a le Kapeneta sa usuia i le vaiaso nei i le potufono a le Ofisa o Fa’atoaga a le malo i Tafuna, o le a mafai ai ona foia ni isi o fa’afitauli ua tele tausaga o fetaia’i ma le Matagaluega o le Puipuiga o le Saogalemu Lautele, e pei o le sosola i tua o pagota, aemaise ai o le sao atu i totonu o le toese o ni isi o mea faitino e le tatau ona umia e pagota e pei o telefoni ma fualaau fa’asaina.

 

O le itula e 10:00 i le taeao o le aso Tofi o le vaiaso fou lea ua fa’atulaga e tatala aloaia ai le falepuipui fou a le malo, lea ua fa’amoemoe e nonofo ai pagota ali’i o lo o tuli a latou fa’asalaga fa’a falepuipui.

 

O lenei fuafuaga sa fa’amaonia e le Komesina o Leoleo ia Save Liuato Tuitele i luma o le fonotaga a le Kapeneta, lea fo’i na toe saunoa i ai le afioga i le ali’i kovana ia Lolo Matalasi Moliga e fa’amautu atili le polokalame ma le fuafuaga a le malo e uiga i lenei mataupu.

 

I se fa’atalatalanoaga a le Samoa News ma Save i le masina ua mavae atu e uiga i lenei mataupu, na taua ai e le afioga i le ali’i Komesina lona agaga fiafia ina ua maua se vaega tupe e fausia ai se falepuipui fou i Tafuna.

 

Sa ia taua atili e fa’apea, o le tele o fa’afitauli o lo o tutupu mai i le toese i Tafuna, o lo o a’afia ai pagota ali’i, o le mafua’aga fo’i lea na pulunaunau ai lava le Ofisa o Leoleo i le tele o tausaga ua mavae atu, ina ia fausia se falepuipui fou e tu’u uma i ai pagota, ina ia taofia ai fa’afitauli e pei ona tutupu so’o mai i le toese i tausaga ua mavae.

 

O le falepuipui fou o le a tatalaina mo le vaega o pagota ali’i, sa fausia lea i se vaega tupe e lata i le $4 miliona mai le Ofisa o le Initeria, tauala mai i lalo o le polokalame o Galuega ma Atina’e Tetele a le malo (CIP).

 

Na taua e le Pulesili o le toese i Tafuna ia Fo’ifua Fo’ifua Jr i le masina na te’a nei e fa’apea, e ui o lo o sologa lelei pea le nofoaga o le toese i Tafuna i le taimi nei, ae o le a sili atu ona saogalemu ma sologa lelei mo pagota o lo o tuli ai a latou fa’asalaga, pe afai ae tatala le nofoaga fou lea ua mae’a ona fausia.