Ads by Google Ads by Google

Fuafua le Ofisa o Turisi e fa’alauiloa suiga i ana ta’iala


Turisi mai Saina na malaga mai i le va’a meli o le Costa Atlantica i le taimi na latou asia ai pisinisi eseese i totonu o le taulaga i Fagatogo i le taeao nei. [ata AF]
ausage@samoanews.com

Ua fa’alauiloa e le Ofisa o Turisi a le malo o Amerika Samoa ni isi o ana fuafuaga mo le isi 5 tausaga, e ala lea i le fa’alauiloa o suiga i ana ta’iala ina ia mafai ai ona saga fa’amausali lana tautua e ala lea i le fa’alauiloaina o Amerika Samoa i atunu’u i fafo.

 

Ina ua maua le avanoa o le Sui Fa’atonusili o le Ofisa o Turisi ia Vaito’a Hans Langkilde i le fonotaga mulimuli a le Kapeneta i le vaiaso nei, na ia fa’ailoa ai loa i le afioga i le ali’i kovana ni isi o fuafuaga ua sauni le Ofisa e fa’ataunu’u i le lumana’i.

 

O ni isi o ia fuafuaga e aofia ai le fuafua lea o se feiloaiga ma le afioga i le ali’i kovana ia Lolo Matalasi Moliga, ma fa’ailoa i ai ta’iala fou ua fuafua le Ofisa e fa’ataoto ina ia fa’amalosia ai pea la latou galuega o le fa’atosina mai lea o tagata tafafao mai fafo i Amerika Samoa.

 

Na taua atili e Vaito’a le fa’aauau lea o feutanaiga a le Ofisa o Turisi a le malo ma le kamupani va’alele a le Hawaiian Air, mo se auala e mafai ai ona fa’atulaga se pasese tumau e mafai ona totogi e tagata turisi e ulufale mai ai i Amerika Samoa.

 

O lea pasese tumau e pei ona fa’aauau ai pea talanoaga i le taimi nei, o le a aofia ai i totonu o le pasese e lele mai ai le turisi mai setete eseese o le malo tele o Amerika i Amerika Samoa ma toe fo’i atu, ae aofia ai i totonu le tau o le hotel e nofo ai mo le 2 po, pe sili atu fo’i, e aofia ai fo’i i totonu ma le totogi o le ta’avale (rental car) e fealua’i ai le turisi ao i ai i le atunu’u.

 

“E ui e lei fa’amautuina e itu e lua tuutuuga o lenei fuafuaga, peita’i o lo o fa’aauau pea talanoaga ma le fa’amoemoe e tatau ona oo atu i le tausaga fou ua maua se tali mautu, ma amata ai loa ona fa’aaoga lenei pasese mo tagata tafafao mai fafo e fia ulufale mai i le atunu’u”, o le saunoaga lea a Vaito’a i luma o le Kapeneta.

 

Sa ia taua atili fo’i e fa’apea, o loo vaavaai fo’i itu e lua i taimi e fesuia’i ai le totogi o pasese i taimi eseese o le tausaga, ina ia mautinoa e talafeagai mo tagata femalagaa’i.

 

“O feutanaiga o loo matou faia i le taimi nei, o loo aofia ai le kamupani va’alele a le Hawaiian Air fa’apea ai ma isi pisinisi i le atunu’u e pei o fale talimalo ma kamupani ta’avale mautotogi, ina ia fa’afaigofie ona fa’amautu tuutuuga ma ofo atu ai ni tau taugofie mo tagata e ulufale mai i le atunu’u”, o le saunoaga lea a Vaito’a.

 

I le fonotaga a le kovana ma lana kapeneta i le masina o Novema na te’a nei, na fautuaina ai e le tofa i le tootoo ia Lolo le afioga a Vaito’a ina ia toe silasila toto’a i fuafuaga fa’ataoto a le Ofisa o Turisi mo le 5 tausaga, ina ia mautinoa o loo aga’i sa’o a latou taumafaiga ma fa’anaunautaiga o ta’ita’i o le malo i auala e atina’e ma fa’aleleia ai tulaga tau turisi i Amerika Samoa.

 

“E taua tele la outou pito laau o loo faatinoina nei, e le gata o le fa’alauiloa o Amerika Samoa i atunu’u i fafo, a ia mafai fo’i ona maua auala e mafai ai ona fa’atosina mai turisi i le atunu’u”, o le saunoaga lea a le ali’i kovana.

 

“O le talitonuga o Tama o loo i le Fono Faitulafono, o se tasi o itu e tatau ona ave i ai la outou fa’amuamua, o le fa’aolaola lea o atina’e i totonu o afioaga ta’itasi i le atunu’u ina ia ulufale mai turisi ae o loo matagofie tua i afioaga. E tatau ona toe amata polokalame e teuteu ma fa’amatagofie ai nu’u uma i le atunu’u, ia i ai ni polokalame e pei o ausiva ma fa’afiafiaga faa Samoa i tua i nu’u e ulufale mai turisi ma fiafia e maimoa ai, ona oso ai lava lea o le naunau e toe fia ulufale mai i Amerika Samoa i isi tausaga o i luma”.

 

“E tatau ona toe silasila toto’a la outou Ofisa i itu e pei ona ou taua ina ia mautinoa e o fa’atasi a outou gaioiga ma le finagalo o Tama o le Fono Faitulafono, aua o iina tonu lea e mafua ai ona tula’i mai fete’enaiga i le va o outou ma le Fono”, o le saunoaga lea a Lolo.

 

O se tasi o mataupu e fa’atatau i le Ofisa o Turisi e le o nofo lelei i finagalo o afioga i Senatoa ma Faipule, o le mataupu lea e fa’atatau i le totogi o le ali’i Fa’atonu o le Ofisa ia David Vaeafe, lea na fa’atulaga ma pasia e sui e to’alua o le Komiti Fa’afoe tuai.

 

O lea totogi e silia i le $100,000, lea e aofia ai le totogi ma penefiti eseese o loo agava’a ai le susuga a Vaeafe e pei o le tupe e totogi ai le fale o loo nofo ai, o le totogi mo ana talavai fa’apea ai pasese ma isi penefiti mo ana malaga i fonotaga i atunu’u i fafo.

 

O le talitonuga o le Fono Faitulafono i tausaga e 2 ua mavae atu sa latou suesue ma iloilo ai le paketi a le Ofisa o Turisi, e foliga mai ua tele le tupe a le Ofisa ua alu i le totogiina o tagata aemaise lava i le totogi o le susuga Vaeafe, ae laititi le tupe e fa’atino ai fuafuaga e fa’atosina mai ai turisi i le atunu’u.

 

O loo naunau fo’i le Fono Faitulafono latou te fia maua se ripoti mai le Ofisa o Turisi, i le aofa’i o se tupe ua maua e le malo o Amerika Samoa mai turisi sa ulufale mai i le atunu’u i le 5 tausaga talu ai.

 

Na taua e ni isi o turisi i le taimi latou te asia ai le atunu’u e fa’apea, o se tasi o itu latou te fiafia ai e malaga asiasi mai i Amerika Samoa, e le gata e matagofie lanu lau’ava o ona atumauga ma laufanua, ae laufofoga fiafia o ona tagata ma fiafia e fa’auo atu i isi tagata.