E le o toe mamao ae amataina loa le galuega mo le fausiaina lea o le Maota Fono fou a le atunu’u, i le nofoaga tuai lava o lo o i ai le Fale Fono tuai i Fagatogo, fa’afesaga’i ma le Malaeoletalu.

I le silia ai i le 50 tausaga talu ona fa’avaeina mai le maota fono tuai lenei a le atunu’u, o le masina na te’a nei na amata tapena e se ai e le aufaigaluega a le fono faitulafono, meafale sa i totonu o lenei maota ae sauni ai mo le galuega fou.

O totonu uma o maota fono e lua a le Senate ma le Maota o Sui, ua mae’a ona tapena ese uma laulau ma nofoa sa fa’aaoga e Senatoa ma Faipule, e oo lava fo’i i Ofisa sa fa’aaogaina e le aufaigaluega ua mae’a uma ona tapena ese.

Na taua e ni isi o le aufaigaluega a le Fono i le Samoa News e fa’apea, o le tele o nofoa ma laulau sa i totonu o Ofisa a afioga i Senatoa ua la’u uma i aiga o afioga i Senatoa, se’i vagana ai kesi ma laulau mai le maota o sui ua mae’a ona la’u i le isi vaega o le Fale Laumei i Utulei, o iina lea ua fa’amoemoe e fa’aaogaina e le maota o sui pe a toe tauaofia ana galuega masani i le masina o Iulai o le tausaga nei.

E o o i le vaega o le maota fono tuai lea sa fa’apipi’i uma ai ata o i latou sa avea ma senatoa ma faipule i nofoaiga e tele ua mavae, ua leai uma ni ata ona ua tele ina la’u e ni isi o tagata faigaluega, o faipule ma senatoa i o latou aiga.

Sa molimauina e le Samoa News i le aso mulimuli o galuega a le Fono Faitulafono i le masina o Aperila na te’a nei, ni isi o afioga i Senatoa ma Faipule sa latou la’u ata o latou tuaa sa fa’apipi’i i totonu o le maota fono ma ave i o latou aiga.

Na fa’aalia e ni isi o le atunu’u lagona le fiafia ma le fa’asea, i le aveese fua o ata sa fa’apipi’i i totonu o le maota fono, o tulaga ia e fai ma mata’aga mo tagata mai fafo e aga’i mai ma maimoa i le maota fono a le atunu’u, ma silasila ai i tagata sa tautua i le Fono Faitulafono a le atunu’u i le tele o nofoaiga ua mavae.

Na fa’aalia e le afioga i le Fofoga Fetalai o le maota o sui i le Samoa News, tofa Savali Talavou Ale e faapea, e le o mautinoa le taimi tonu e aloaia ai le tatalaina i lalo o le maota fono tuai, e le o mautu fo’i i le taimi nei le Konekarate latou te fa’atinoina le galuega.

O le vaega tupe e tusa ma le $1.5 miliona lea na maua mai i le nonogatupe o le Pone a le malo, o le vaega tupe lea ua fuafua e fa’atupe ai le galuega, ae na taua e ni isi o tagata faigaluega sinia o le Fono e i ai lo latou agava’a i galuega kamuta, e i ai le talitonuga e sili atu le tupe e moomia i le galuega nai lo le tupe ua mae’a ona fuafuaina.

I le vaiaso mulimuli a o le i tapunia galuega a le Fono Faitulafono mo lana ulua’i tauaofiaga i le masina na te’a nei, na fautuaina ai e ta’ita’i o maota e lua afioga i Senatoa ma Faipule e tusa ai o fuafuaga mo le fausiaina o le maota fono fou a le atunu’u, atoa ai ma le tatau lea ona amata tapena ese meafale uma mai totonu o le maota fono tuai.

E le o mautu mai fo’i i le taimi nei fuafuaga a ta’ita’i o le fono i le nofoaga e fa’ataunu’u ai galuega a le Fono Faitulafono, pe afai ae toe tauaofia i lana tauaofiaga lona lua i le masina o Iulai, peita’i na taua e ni isi o le aufaigaluega a le fono e fa’apea, o fuafuaga e pei ona fa’ailoa atu e ta’ita’i fono, o le a fa’aaoga a le Senate le Fale Samoa mo ana galuega fa’atino, ae o le maota o sui i le maota o loo i le itu i sasa’e o le Fale Laumei i Utulei.