Ua taoto i luma o le Fa’amasinoga Maualuga se talosaga na fa’aulu e ali’i e to’afa ia o lo o tu’uaia i le tafanaina o le Ofisa o Leoleo i Leone ma a latou loia i le vaiaso nei, mo se poloaiga a le fa’amasinoga e aveese ai ni isi o mau fa’amaonia ua fuafua le malo e tu’uina atu i le taimi e fa’ataunu’uina ai le fa’amasinoga autu o lenei mataupu.

O le itula e 9:00 i le taeao o le aso Lua o le vaiaso fou, Tesema 6, 2016 ua fa’atulaga e amata aloaia ai le fa’amasinoga iloilo a i latou e to’afa o lo o tu’uaia i lenei mataupu.

O i latou e to’afa o lo o tu’uaia e aofia ai Manu Lefatia, Sinapati Tu’ufa’anatu, Tuliese Taliu ma Mosegi Solia Jr.

O le aso Tofi o le vaiaso nei na fa’afofoga ai ali’i fa’amasino i fa’afinauga a itu e lua o lenei mataupu, i le taimi na finauina ai e loia o lo o tula’i mo i latou e to’afa o lo o molia le talosaga ina ia fa’atonu le malo e aveese isi fa’amatalaga ia ua latou fa’amoemoe e avea ma a latou mau e lagolagoina ai le tagi o lo o faia fa’asaga i ali’i e to’afa o lo o molia.

O ni isi o fa’amatalaga o lo o finau le itu tete’e e aveese, o fa’amatalaga ia o lo o faia fa’asaga i le ali’i o Lefatia atoa ai ma le mafua’aga o lo o manatu le malo na mafua ai ona alia’e mai le fa’alavelave ua mafua ai ona molia i latou nei e to’afa.

Mo se fa’ata’ita’iga o fa’amatalaga o lo o finau le itu tete’e e aveese, o le fa’amatalaga lea o lo o finau mai ai le malo fai mai, na mafua ona tafana e i latou ua molia le Ofisa o Leoleo i Leone i le po o le aso 1 Novema 2014, ina ua loka ma molia e le malo le tuafafine a le ali’i o Manu Lefatia, le tama’ita’i o Elsarina Lefatia.

Na taua e le loia a Manu Lefatia ia Sharron Rancourt i lana fa’afinauga e fa’apea, e leai ma ni mau fa’amaonia e lagolago ai e le malo le fa’amatalaga lea ua latou faia, aemaise ai fo’i, ua mafua ona faia e le malo nei mau fa’amatalaga, ina ia fai ma auala e ta’u leagaina ai i latou ua molia, ma fa’apea ai le vaega iloilo iuga, o i latou o ni tagata e pito sili ona leaga.

“E le o i ai se vaega o le ripoti a Leoleo o taua mai ai le avea o le taofia e Leoleo o Elsarina ma mafua’aga o le tafana o le Ofisa o Leoleo i Leone, o nei mau tala ua na o ni tala ua fa’atupu, ma ua atagia mai ai fo’i le tulaga lea, ua muamua ona fa’alele le mau tala ae le o mafai ona fa’amaonia”, o le fa’afinauga lea a le loia a Manu Lefatia ia Rancourt.

Na finau atili Rancourt e fa’apea, e leai se fesootaiga o le mataupu na taofia ma molia ai e le malo ia Elsarina ma le fa’alavelave lea na tafana ai le Ofisa o Leoleo i Leone, lona uiga fo’i la, o fa’amatalaga ua sauni le malo e fa’aaoga e fai ma a latou a’upega mo lenei mataupu, e le o talafeagai, e le o mafua’aga fo’i lena o le fa’alavelave.

Sa ia taua atili i lana fa’afinauga e fa’apea, o Elsarina sa ta’usala e le fa’amasinoga i le moliaga o le umia o fualaau fa’asaina, peita’i o le mataupu o lo o tu’uaia ai i latou nei e to’afa, e le o aofia ai ni tu’uaiga fa’asaga i le umia fa’asolitulafono o fualaau fa’asaina.

O isi fa’amatalaga o lo o finau le itu tete’e e aveese, o fa’amatalaga e fa’atatau i le moliaga sa tu’uaia muamua ai e le malo Manu i tausaga ua mavae ao le i alia’e mai le mataupu lea o lo o tu’uaia ai o ia, e mafua mai i se fa’alavelave sa a’afia ai tulaga o le umia ma le tagofia e Manu o fana.

Ona o lea mataupu, o lo o finau mai ai le malo e fa’apea, ua lava le mataupu muamua na a’afia ai Manu i le umiaina o fana ma auala e mafai ai ona latou lagolagoina lona auai i le tafanaina o le Ofisa o Leoleo.

Na finau fo’i Rancourt i le fa’amasinoga ina ia aveese le isi fa’amatalaga lea o lo o manatu le malo e fai ma mau i le latou tagi, fai mai sa fa’ailoa e Manu i se tasi o molimau lana fuafuaaga o lo o i ai, i lona fanaina lea o se ali’i Leoleo.

E talitonu le itu tete’e, o fa’amatalaga uma ia ua manatu le malo e fa’aaoga e lagolagoina la latou tagi, o ni fa’amatalaga o lo o faia ma le manatu e fa’aleaga ai igoa ta’uleleia o i latou e to’afa o lo o tu’uaia i lenei mataupu.

Na lagolagoina e isi loia a le itu tete’e ia Michael White ma Karen Shelly le talosaga a Rancourt ua tu’uina atu i luma o le fa’amasinoga, peita’i na finau le loia a le malo ia Gerald Murphy e fa’apea, o lo o i ai a latou mau fa’amaonia e lagolagoina ai fa’amatalaga o lo o manatu le itu tete’e e aveese.

I le mafua’aga na tafana ai le Ofisa o Leoleo i Leone, na taua e Murphy le i ai o molimau ua sauni le malo e tu’uina atu i luma o le vaega iloilo iuga, e lagolago ai la latou mau lea, e o o lava fo’i i tu’uaiga i fanau ma pulufana, ua sauni fo’i le malo e tu’uina mai le latou molimau e i ai lona agava’a i tulaga o fana ma pulufana, na te fa’amaonia i luma o le vaega iloilo iuga le ituaiga a’upega sa fa’aaoga i le taimi o le osofaiga.

Na taua e Murphy e fa’apea, e i ai le molimau a le malo o le a ia fa’amatala i luma o le fa’amasinoga, le fana sa ia vaai o u’u e ni isi o i latou ia e to’afa i le po tonu na tula’i mai ai le fa’alavelave, ma o le a feso’ota’i lena molimau ma le molimau a le sui o le Vaega Su’esu’e a le Feterale (FBI), lea ua i ai lona tomai fa’apitoa e fa’ailoa mai ai ituaiga pulu fana sa fa’aaoga i le fa’alavelave, lea e feso’ota’i ma le fana sa vaaia e le molimau o amo e i latou nei i totonu o le ta’avale.

Na taua atili fo’i e Murphy le sauni o le malo e tu’uina atu i le fa’amasinoga a latou molimau e to’alua, lea o le a la molimau e fa’atatau i le latou talanoaga ma Manu sa faia i le vaiaso ao lumana’i le fa’alavelave, e fa’atatau i lana fuafuaga i le fanaina lea o le Leoleo.

“O ia fa’amatalaga uma, e talitonu atoatoa le malo e feso’ota’i uma lava i le autu ma le mafua’aga na ala ai ona tula’i mai lenei fa’alavelave, ina ua loka ma taofia e Leoleo le tuafafine a le ali’i o Manu Lefatia.

O le tama’ita’i o Elsarina na ta’usala e le fa’amasinoga maualuga i le moliaga o lona umia fa’asolitulafono o vaega o le pauta fa’asaina o le aisa, ma poloaina ai loa le taofia o ia i le toese mo le umi e 20 masina, o se tasi lea o tuutuuga o lana nofovaavaaia e 5 tausaga.