Ads by Google Ads by Google

Fesiligia pea le isi sui Senatoa o le Itumalo o Manu’a #1

ausage@samoanews.com

E tapunia galuega a le malo i le aso Faraile na te’a nei, Tesema 30, 2016, ua atoatoa uma suafa o Senatoa mai Itumalo eseese ua sauni mo le fa’atautoina i le itula e 12:00 i le aoauli nei, se’i vagana ai le isi sui e to’atasi o le Itumalo o le Manu’a #1 o lo o fesiligia pea, e pei ona fa’amaonia mai e le Ofisa o Mataupu Tau Samoa i le Samoa News.

 

Na ripotia e le Samoa News i le masina o Novema na te’a nei, o sui e to’alua mo le Itumalo o Manu’a #1 e aofia ai le afioga a Galea’i M. Tu’ufuli ma le afioga ia Nuanuaolefeaiga S. Nua, o i laua ia ua toe filifilia e le itumalo la te toe fa’aauauina tofi mo le isi 4 tausaga.

 

Ae ina ua fesiligia le Ofisa o Mataupu Tau Samoa i le vaiaso na te’a nei, na fa’amaonia mai ai le mae’a lea ona toe tu’uina atu e le Failautusi o le Ofisa o Mataupu Tau Samoa o se fautuaga i le itumalo o Manu’a #1, ina ia toe filifili fa’alelei mai so latou sui, ona o loo i ai ni isi o loo fa’atuiese i le toe filifilia o le afioga a Nua na te toe fa’aauauina le nofoa.

 

Na taua e ni sui o le itumalo i le Samoa News i le vaiaso lava na te’a nei e fa’apea, o le nofoaga lea ua toe filifilia i ai le afioga Nua, o le nofoa lea e le o maua i ai se tasi, ona o lo o finau fo’i se tasi sa avea muamua ma Senatoa o le itumalo i tausaga ua mavae e toe fia alu i le nofoa.

 

Talu mai la le aso Faraile na te’a nei, e na o le to’a 17 senatoa fou ua fa’amaonia ma alaoia e le Ofisa o Mataupu Tau Samoa, o i latou fo’i ia ua mae’a ona tapena tusi fa’amaonia e tauaao atu i le ofisa o le Senate, e fa’amaonia ai le fa’atautoina o i latou e avea ma sui o latou itumalo mo le isi 4 tausaga o loo lumana’i nei.

 

O le mae’a ai o le fa’atautoina o afioga i Senatoa, ona sosoo ai loa lea ma le sailia o se Peresetene, Failtusi ma le Satini.

 

E pei ona taua e se molimau fa’atuatuaina i le Samoa News, toeititi lava o senatoa uma lea ua latou lagolagoina le toe tula’i mai o le afioga a Gaoteote i le tofi Peresetene o le maota.

 

Mo le Maota o Sui, o se sui mai le Ofisa o Palota ua fa’amoemoe na te tauaaoina atu tusi pasi e aloaia ai le avea o i latou ma sui filifilia o latou itumalo mo le isi 2 tausaga, ao lumana’i ai le sauniga o le fa’atautoina o i latou.

 

O le mae’a ai o le sauniga e fa’atauto ai afioga i Faipule, ona sosoo ai loa lea ma le filifilia o se Fofoga Fetalai, Failautusi o le maota, atoa ai ma le Satini.

 

O se fonotaga fa’apitoa sa faia i le laoa o le tofa i le Tau Tootoo ia Savali Talavou Ale i le masina o Novema na te’a nei, na fa’ailoa ai le fulisia uma o Faipule e lagolago le toe avea o Savali ma Fofoga Fetalai o le maota mo le isi nofoaiga o loo sosoo nei.

 

Lisi la lea o suafa o Senatoa fou o le a fa’atautoina i le itula e 12:00 i le aoauli o le aso.

 

Manu’a #1      Galea’i M. Tu’ufuli

 

Manu’a #1      O loo fesiligia

 

Manu’a #2      Misaalefua J. Hudson

 

Saole #3        Taua’a Sam Vaouli

 

Vaifanua #4    Gaoteote P. Tofau

 

Sua #5           Fa’amausili Mau Jr

 

Sua #5           Muagututia M. Tauoa

 

Maoputasi #6 Tilo Vasaga

 

Maoputasi #6 Tuaolo M. Fruean

 

Maoputasi #6 Fano S. Fano

 

Itu’au #7         Levu Solaita

 

Itu’au #7         Alo Fa’auuga

 

Tualauta #8    Magalei Logovi’i

 

Tualauta #8    Fonoti A. Tafa’ifa

 

Leasina/Atiulagi #9 Tuiagamoa Tavai

 

Tualatai #10   Satele G. Satele Sr.

 

Fofo #11        Fa’iivae Godinet

 

Alataua #12   Paepae I. Fai’ai