Ads by Google Ads by Google

Falepuipui ali’i 19 tausaga le matua mo le 28 masina

tusia Ausage Fausia

O le ali’i e 19 tausaga le matua lea ua ta’usala e le fa’amasinoga maualuga i le gaoi, e mafua mai i le fa’alavelave lea na la osofaia ai ma lona tausoga se faleoloa i Malaeimi ae ave fa’amalosi le tinoitupe sa i totonu o le masini tupe, ua fa’asala nei o ia i le falepuipui mo le umi e 28 masina.

Na ulua’i tu’uaia e le malo ia Faasii Aupaau i le moliaga pito sili ona mamafa o le faomea i le tulaga muamua, ae i lalo o se maliliega na sainia e le ua molia ma le malo, na malie ai le malo o le a latou faia se suiga i le moliaga e ta’usala ai le ua molia, ina ia sui le moliaga o le faomea i le moliaga feololo ane o le gaoi.

I le tali ioe ai o Aupaau i le moliaga e pei ona toe suia e le malo, na ia ta’utino ai i luma o le fa’amasinoga e fa’apea, i se taimi o le po o le aso 13 Tesema 2016, na la ulufale fa’amalosi ai ma le ali’i o David Fo’a i totonu o se faleoloa i Malaeimi ma le fa’amoemoe e talepe ae fao fa’amalosi mai ai ni meatotino mai totonu.

Na ufi foliga o Aupaau ma Fo’a i le taimi na la ulufale ai i totonu o le faleoloa, ona fa’alala lea e Fo’a o le fana e fa’afefe ai le fa’atauoloa ae fao fa’amalosi e Aupaau le masini tupe o lo o i ai le $260 i totonu ma la o loa ma laua.

O se tasi o tuutuuga i le maliliega a Aupaau ma le malo, o le a ia molimau ma le fa’amaoni mo le itu a le malo, i le fa’amasinoga autu a le ali’i o Fo’a, lea o lo o tu’uaia i lona osofaia o isi faleoloa e 8 i vaega eseese o le atunu’u.

O Fo’a o lo o tu’uaia e le malo i le tele o moliaga e aofia ai moliaga mamafa e 9 o le talepe fale i le tulaga muamua, ma moliaga mamafa e 5 o le gaoi. O lo o tu’uaia fo’i o ia i moliaga mama e 2 o le fa’aleaga meatotino i le tulaga tolu.

A o le i tu’uina atu le fa’asalaga a le fa’amasinoga mo Aupaau i le aso Faraile na te’a nei, na maua le avanoa e fa’atoese ai lona tama, ma ia talosagaina ai se isi avanoa mo lona atali’i e fo’i atu ai i le aiga latou te mafuta.

A o le i aafia Aupaau i le mataupu e pei ona fa’asala ai o ia i le falepuipui, na taua e lona Tama e fa’apea, o ia o se ali’i usita’i ma fa’alogo, e fiafia fo’i e fesoasoani ia te ia i galuega e atina’e ai le aiga.

Na talosaga le Tama i le fa’amasinoga mo se avanoa e tatala atu ai i tua lona atali’i latou te mafuta, ma se’i toe fesoasoani ai i lona olaga ua a’afia ona o le solitulafono sa ia fa’atinoina.

Na fesili le afioga i le ali’i fa’amasino sili ia Michael Kruse i le Tama, pe na te iloa se mafua’aga ua ala ai ona tupu lenei lagona i lona atali’i e alu i le faleoloa i le leva o le po ma ona foliga o loo fusi, ona fa’alala lea o le fana ae fao fa’amalosi le masini tupe.

“Ou te fia iloa pe aisea na faia ai e lou atali’i lenei solitulafono, pe sa fia ‘ai o ia ae e te lei fafagaina,” o le fesili lea a Kruse i le Tama.

Na taua e le Tama e fa’apea, ua mafua ona a’afia lona atali’i i lenei solitulafono, ona o fa’aosoosoga uma a lona tausoga o Fo’a, ae o lona atali’i, o se tamaititi e usita’i ma fa’alogo ia te ia.

Ae na toe saunoa Kruse e faapea, ua tau nunumi lona mafaufau i le fa’amatalaga lea fai mai o Aupaau o se atali’i usita’i, a o lea ua alu ma fai nei uiga le manuia, ma ua le iloa la poo ai e usita’i i ai, poo ona matua poo lona tausoga o Fo’a.

I le fa’atoesega a Aupaau, sa ia taua ai lona matua salamo moni e tusa ai o lana solitulafono sa faia, ma ia talosagaina ai se isi avanoa mo ia. Sa ia taua lona aoaoina o se lesona taua ao i ai i le falepuipui, ma ua ia lagona ai e le o se nofoaga lelei lea mo lona lumana’i.

Na talosaga le loia fautua a Aupaau ia Douglas Fiaui mo se faasalaga faanofovaavaaia mo le ua molia, e aofia ai le maua o lona avanoa e toe fo’i atu ai i lona aiga e tausi ona matua ma saili sona lumana’i.

Na taua e Fiaui e fa’apea, e ui i le matuia o le solitulafono ua ta’usala ai le ua molia, ae o ia o se ali’i talavou lava lona olaga, e na o le 19 ona tausaga, ae na mafua fo’i ona a’afia o ia i lenei solitulafono, ona o faaosoosoga uma a Fo’a, ae le i taitai malamalama lona mafaufau i le faigata ma le leaga o le olaga o le nofo i le falepuipui.

Na taua e le loia a le malo ia Robert Morris e fa’apea, o le vaega e pito sili ona mata’utia o le mataupu lenei, o le fa’aaoga lea o se aupega mata’utia e fa’afefe ai le fa’atauoloa, ae fao fa’amalosi le masini tupe.

Na ioe Morris i le tatau lea ona faasala Aupaau i se fa’asalaga faanofovaavaaia, peita’i i lona talitonuga, e le o le ituaiga olaga lea e tatua ona naunau o ia e mulimuli ai, o le avea lea ma tagata faomea toe solitulafono mata’utia.

Saunoa Kruse e fa’apea, o lo o faigata pea i le finagalo o le fa’amasinoga ona iloilo se fa’asalaga talafeagai mo le ua molia, ona o isi fo’i mataupu fa’apea ia sa oo mai i luma o le fa’amasinoga, ma faia ai loa le faaiuga a le fa’amasinoga e faa falepuipui i latou ia i le ta’i 40 masina.

O tuutuuga o le nofovaavaaia a Aupaau e 7 tausaga lea ua tuuina atu e le fa’amasinoga, o le tuli o masina e 28 i le falepuipui, totogi le salatupe e $1,000, ma aua ne’i toe pipii’i i lona tuagane o Fo’a, a ia avea o ia ma tagata talavou e usita’i i tulafono a le malo i soo se taimi.