I le to’atele ai o le atunu’u sa tu’u fesili i le mataupu e pei ona alia’e mai i le Ofisa o Ta’avaleafi a le malo i Tafuna (OMV), i le maualuga o le tupe e totogi pe a toe fa’afou le lesitalaina o ta’avaleafi, o le vaiaso na te’a nei na fa’amanino ai e le Komesina o Leoleo i luma o le maota o sui tulaga uma e uiga i lenei mataupu.

O le afioga i le ali’i faipule ia Manumaua Wayne Wilson, o ia fo’i lea o le Ta’ita’i o le Komiti o le Puipuiga o le Saogalemu Lautele a le maota o sui na taitaia le iloiloga, lea na molimau ai le afioga i le Komesina o Leoleo ia Le’i Sonny Thompson ma sui o lona Ofisa, e aofia ai le Pule o le Ofisa o Ta’avaleafi ia Mary Putuga, o le Sui Komesina ia Vaimaga Maiava, ma ali’i Leoleo Lutena ia Lt. Tua Pele Uia o lo o galue i le vaega e pasi ai ta’avale.

Na fa’amanino e le tofa i le Tootoo ia Le’i le fa’aauau pea lea ona mulimulita’i o le Ofisa o Ta’avaleafi i le tulafono ua tele tausaga o i ai, e fa’atinoina ai lana auaunaga i le atunu’u, aemaise lava i le tulaga o le lesitalaina lea o ta’avaleafi.

I le fiamalamalama ai o ni isi o afioga i Faipule i lea mataupu, na fa’amanino ai e Le’i e fa’apea, o se vaega o le tulafono faalotoifale 22-1002 e fa’atatau i le lesitalaina o ta’avaleafi, o lo o manino mai ai le totogi e $32 mo le lesitalaina o se ta’avale, fa’atasi ai ma le $12 i le tane (ton), ae afai loa e toe fa’afou le lesitalaina o le ta’avale, e na o le $32 o lo o fai mai le tulafono e totogi.

Mai le tele o tausaga ua mavae e pei ona saunoa Le’i, sa fa’aauau pea ona totogi e tagata le $12 mo le tane pe a toe fa’afou le ta’avaleafi, e ui e le o i ai se vaega fa’apena i le tulafono.

Na fesili afioga i Faipule ia Le’i, po o i ai la se fuafuaga a lona Ofisa mo le toe totogiina atu o tupe a tagata sa totogi mo le toe fa’afouina o a latou ta’avaleafi, pe afai o lea ua manino e le o i ai se vaega fa’apena i totonu o le tulafono, ae na saunoa Le’i, “E leai se fuafuaga a lo’u Ofisa mo le toe totogiina atu o tupe a tagata o le atunu’u sa totogi mai le tele o tausaga ua mavae, sa ma talanoa fo’i ma le Loia Sili e uiga i le mataupu lea, o lana fo’i lea saunoaga sa tu’uina mai”.

Na fesili le afioga i le ali’i faipule ia Timusa Tini Lam Yuen ia Le’i poo i ai se fuafuaga a lona Ofisa e toe totogi tupe a tagata, ae na saunoa le Komesina, “E le i faia lava sa’u tala e fa’atatau i le toe totogiina atu lea o tupe a tagata, e le o se mataupu fo’i lena e tauave e lo’u Ofisa, o le mataupu e fitoitonu i le faigamalo”.

I le tau sailiina ai la o se auala e foia ai le toe tula’i mai o lenei fa’afitauli, na fa’amaonia ai e Le’i i luma o le komiti, le galulue o lona Ofisa ma le Ofisa a le Loia Sili e fa’atulaga le tulafono e tu’uina atu i luma o le Fono Faitulafono, e talosagaina ai suiga mo le toe fa’aauauina o le totogiina o le $12 i le tane mo ta’avale ta’itasi, ina ia mafai ai ona fesoasoani i le malo.

Na fa’afetaia e le afioga a Manumaua fuafuaga uma e pei ona fa’amanino e le ali’i Komesina o Leoleo, atoa ai ma le tele o suiga ua molimauina i le tautua a le Matagaluega i le taimi nei.

I le tulaga o le tele o le tupe o lo o maua mai e le malo e ala i le galuega a ali’i ma tama’ita’i Leoleo, e pei o tupe o lo o totogi e tagata i le fale fa’amasino pe a ta’usala i le soliina o tulafono i luga o le alatele, atoa ai ma tupe o lo o totogi mo le lesitalaina o ta’avale, na fautuaina ai e Faimealelei Anthony Fu’e Allen le afioga i le Komesina ina ia silasila i se auala e mafai ai ona maua e le Ofisa o Leoleo se isi vaega tau feololo e fesoasoani ai i le fa’atupeina o lana tautua aemaise ai le fa’aleleia o totogi a le aufaigaluega.

Mo se fa’ata’ita’iga e pei ona saunoa Faimealelei o salatupe o lo o tuuina atu e le fa’amasinoga i tagata e ta’usala i le soliina lea o tulafono i luga o le alatele, o se tulaga manaia pe a ta’i 50-50 le fa’amasinoga ma le Ofisa o Leoleo, na i lo le maua uma e le fa’amasinoga o le salatupe, se’i vagana ai le $10 o le fa’amalosi tulafono o lo o alu i le Ofisa o Leoleo.