Ads by Google Ads by Google

Fa’atali pea Asosi Faifa’atoaga i se tali mai le CPO

ausage@samoanews.com

O lo o fa’atali pea sui o le Asosi a le Aufai Fa’atoaga a le atunu’u i se tali aloaia mai le Fa’atonusili o le Ofisa e Pulea Oloa a le malo (Chief Procurement Officer), mo sana tali e tusa ai o le latou tusi sa tu’uina atu i ai i le masina o Oketopa na te’a nei, i le le talafeagai lea o le fa’aiuga ua faia e le CPO, e tu’u atu ai le manumalo i le aufai fa’atoaga Asia latou te sapalaiina fualaau’aina mo le polokalame o Taumafa a fanau aoga (School Lunch).

 

E fa’alua ona taumafai le Samoa News e saili se avanoa mo le afioga i le Tama’ita’i Fa’atonusili ia Dr. Oreta Mapu Crichton mo sona finagalo e tusa ai o le fa’atalauula atu a le Asosi a le Aufai Fa’atoaga, peita’i sa le i manuia ia taumafaiga, ae na taua e se sui sinia mai lona Ofisa e le i finagalo e fa’ailoa lona suafa e fa’apea, ua mae’a ona tauaao e le Tama’ita’i Fa’atonusili le tusi mai le Asosi a le Aufai Fa’atoaga, ma o lo o fa’aauau pea i le taimi nei feutanaiga a le Ofisa ma le afioga i le ali’i Kovana ia Lolo Matalasi Moliga, fa’apea ai ma le Ofisa o Fa’atoaga a le malo e uiga i lenei mataupu.

 

Talu mai le aso 14 Oketopa 2016 na tu’uina atu ai le tusi a le Asosi a le Aufai Fa’atoaga ia Dr. Crichton, e o o mai lava i le taimi nei e le i maua mai lava se tali.

 

Na taua e le Peresetene o le Asosi a le Aufai Fa’atoaga i le Samoa News i le vaiaso na te’a nei lo latou fa’atali pea i se tali e tusa ai o le latou tusi.

 

Na taua e ni isi o sui o le aufai fa’atoaga a le atunu’u i le Samoa News le taua tele o se tali e tatau ona tu’uina mai i le afioga e Dr. Crichton, ina ia mafai ai ona iloa pe maua so latou avanoa e la’u ai fua o a latou fa’aeleeleaga e pei o le fa’i, taro ma ituaiga fualaau’aina ia o loo tausi ma fa’afailele i totonu o fale e fa’atau i le polokalame o Taumafa a fanau aoga.

 

“E taua tele le tu’uina mai o se tali a le Fa’atonusili, ina ia matou iloa ai po o amanaia mai le leo o le aufai fa’atoaga, o le taimi nei, o lo o manaomia lava le la’u atu o fua o a matou fa’atoaga e fa’atau ina ia maua ai tupe e fesoasoani ai i le atina’eina o aiga ma pisinisi”, o le saunoaga lea a le susuga ia Aiono Fuamanatu, o se tasi o Tama fai fa’atoaga mai Aoloau i le Samoa News.

 

Na taua e le Faatonusili le Tumau o le Ofisa o Fa’atoaga a le malo ia Peter Gurr i le Samoa News i le vaiaso na te’a nei, le tumau pea lea o le fa’aiuga ua mae’a ona ia tu’uina atu i le tama’ita’i Faatonusili fa’atasi ai ma sui o le aufai fa’atoaga ua fa’aalia le manumalo i le Tauofoga lona 2 sa faia, i le le aloaia lea o le fa’aiuga ua tu’uina mai e le Ofisa e Pulea Oloa a le malo.

 

“O lo o tumau pea le fa’aiuga ua mae’a ona ou tu’uina atu, e le aloaia ai tagata fai fa’atoaga ua fa’alauiloa mai le manumalo i le tauofoga lona lua mo taumafa o le School Lunch, ua mae’a fo’i ona ou logoina le afioga i le ali’i kovana e fa’atatau i lenei mataupu, ma o lo o fa’aauau ai pea a matou feutanaiga i le taimi nei”, o le saunoaga lea a Gurr i le Samoa News i le vaiaso na te’a nei.

 

E pei ona taua i se ripoti sa lomia e le Samoa News i le vaega o Le Lali i le amataga o le masina lenei, o le aufai fa’atoaga e to’a 5 ua tu’u atu i ai le manumalo latou te sapalaiina taumafa mo le School Lunch e aofia ai Helen Young ma ni isi o tagata fai fa’atoaga Asia e to’afa.

 

Ae i se vaega o le tusi a Dr. Crichton sa tu’uina atu i le faletua ia Young i le aso 5 Oketopa 2016, o lo o ia fa’ailoa atu ai ia Young e fa’apea, o le fa’aiuga e tu’u atu ai ia te ia ma isi tagata faifa’atoaga e to’a 4 le manumalo ma le tauofoga lona 2 sa faia, na afua mai lea i se fa’aiuga sa faia e le Komiti Iloilo (Source Evaluation Board) sa latou iloiloina le fa’aiuga, “lea fo’i na fa’amaonia mai e le Matagaluega o Fa’atoaga” a le malo.

 

Na taua e Gurr i le Samoa News i le vaiaso na te’a nei e fa’apea, “E leai se vaega a le Ofisa o Fa’atoaga na faia i le fa’aiuga ua tu’uina mai e le Ofisa e Pulea Oloa a le malo, matou te lei asia fo’i fa’atoaga a i latou ua taua le manumalo i le taimi a o le i tu’uina mai lenei fa’aiuga, o le mafua’aga lena e le aloaia ai e le Ofisa o Fa’atoaga lenei fa’aiuga”.

 

Na taua e se sui sinia mai le Matagaluega a le Soifua Maloloina a le malo le fa’aauau pea o a latou asiasiga ma isi Ofisa o le malo ua tofia e le Kovana mo le asia o Fa’atoaga, ina ia mautinoa e saogalemu auala o lo o tausi ma teu ai fa’atoaga, a o le i toe tu’uina mai le fa’aiuga e toe fa’ataga ai le taliaina o fualaau’aina i le polokalame o le School Lunch.

 

O le fa’aiuga o le masina lenei ua fa’amoemoe le Ofisa o Fa’atoaga e tatau ai ona tu’uina atu aloaia sa latou ripoti i le afioga i le ali’i Kovana, e tusa ai o le tulaga ua i ai fa’atoaga eseese ua mae’a ona latou asia talu mai le 3 vaiaso ua tuana’i, pe ua saogalemu mo le fofoga taumafa o le atunu’u, talu ona taofia le toe taliaina i le fa’aiuga o le masina na te’a nei o Oketopa.