Ads by Google Ads by Google

Fa’asea Faipule Manu’a i le tele o tulafono a le US Coast Guard

ausage@samoanews.com

O le tele o tulafono a le Vaega o le Puipuiga o le Gataifale a le malo tele (US Coast Guard) o lo o fa’atonutonu ai femalagaaiga mo Manu’a, na mafua ai ona fa’asea Faipule o le Itumalo, ona ua avea nei mau tulafono ma auala e fa’alavelave ai i taimi o femalagaaiga.

 

Mo se fa’ata’ita’iga e pei ona saunoa le afioga i le ali’i Faipule ia Vesi Talalelei Fautanu Jr e fa’apea, o le tulafono lea e lima ta’ita’iina ai le auina atu o kalone kesi mo Manu’a, e le mafai ai ona fa’aaoga ni isi lava auala se’i vagana kalone ua mae’a ona pasia mai e le USCG.

 

Saunoa Vesi e fa’apea, e foliga mai ua tele naua tulafono a le USCG ua amata ona pulea ai tulaga o femalagaaiga mo le itumalo, ma avea ai ma itu e fa’a faigata ai feoaiga ma le la’uina o uta e tautua ai tagata i Manu’a.

 

“O le itu e sili ona fa’anoanoa ai lo’u sui, ona ua avea tulafono nei a le USCG ma auala ua taitaiina atu ai ma Ofisa a le malo o loo o ofoina atu le tautua mo le itumalo,” o le saunoaga lea a Vesi i le iloiloga ma sui o le Ofisa o Galuega Lautele i le vaiaso na te’a nei.

 

E ui o le iloiloga ma le Sui Fa’atonusili o le Ofisa o Galuega Lautele a le malo, sa autu lea i tulaga o auala i le atunu’u, ae na maua ai ma le avanoa e fesiligia ai e Vesi le tautua a le Ofisa mo Manu’a, i le la’uina lea o le kesi mo tagata i le itumalo.

 

Na toe fesiligia fo’i e Vesi le mataupu lava fo’i lenei ina ua maua le avanoa e molimau ai le Fa’atonusili o le Ofisa o Taulaga ma Malaevaalele, afioga Taimalelagi Dr. Claire Poumele, i le iloiloga e fa’amanino ai fa’atau ese ina atu e le malo o va’a toso va’a e 2 atoa ai ma lagisi e 2 i le malo o Samoa.

 

O le fa’afitauli i le fa’aaogaina o kalone e la’u ai le kesi i Manu’a, o le tele o taimi e tau saili solo ai e tagata ni kalone, ae afai e i ai se isi auala fa’a faigofie e pei o se ta’avale fa’apitoa na te la’uina le kesi i le itumalo, atonu e sili atu lena ma faigofie.

 

Na fa’amanino e Taimalelagi e fa’apea, e tasi lava le auala e saogalemu ai le la’uina o le kesi i Manu’a, e na o le fa’aaoga lea o kalone e ave ai.

 

O le fautuaga ina ia fa’aaoga se ta’avale faapitoa e la’u ai le kesi, na taua e Taimalelagi e faapea, e le taliaian e le USCG, ona o le tulaga i le saogalemu o le auva’a pe a malaga i Manu’a.

 

Na lagolagoina e le sui fofoga fetalai, afioga Fetui Fetu Jr le mataupu e pei ona fesiligia e lona soatau, ma ia talosagaina ai le afioga a Taimalelagi ina ia silasila toto’a i auala e fesoasoani ai i le la’uina o le kesi i Manu’a, ina ia faigofie ma lelei mo le itumalo.

 

O se tasi o fa’afitauli pe a taunu’u le va’a ma le uta o kalone kesi i Manu’a, o le leai lea o se lifi (fork-lift) na te la’uina kalone suauu i fafo ma le va’a.

 

Na fesiligia e le afioga i le ali’i faipule ia Toeaina Faufano Autele le tama’ita’i Fa’atonusili, i le mafua’aga e malaga ai sui o lona Ofisa e ao tupe o totogi o uta mai Manu’a, ae le fa’aaoga tagata faigaluega o lo o galulue i Manu’a i le taimi nei e fa’atino lea galuega.

 

Sauona Toeaina e fa’apea, e foliga mai ua le talitonuina le tautua o lo o ofoina mai e tagata faigaluega i Manu’a, ua mafua ai ona faia lea tulaga. Ae na fa’amanino e Taimalelagi e fa’apea, e le o toe malaga sui o le aufaigaluega mai Tutuila nei i Manu’a e fa’atino lea tulaga, ae ua fa’atinoina lava e le aufaigaluega o lo o i Manu’a.

 

E ui i tulaga e pei ona fesiligia ai le fa’atinoina o le tautua mo Manu’a, o le tala fiafia e pei ona fa’alauiloa e le tama’ita’i Fa’atonusili i le vaiaso na te’a nei, ua toe fa’aitiitia le tau mo uta e la’u i Manu’a mai le $8 sa i ai i le $2.