Ads by Google Ads by Google

Fa’asala Fa’amasinoga ia Reggie Va’avale taofia toese mo le 7 tausaga

ausage@samoanews.com

E 7 tausaga lea ua fa’asala ai e le fa’amasinoga maualuga le ali’i o Reggie Va’avale e taofia ai o ia i le toese i Tafuna, ina ua ta’usala e le fa’amasinoga maualuga o ia i le moliaga mamafa o le gaoi, e mafua mai i le fa’alavelave lea na gaoia ai se laptop a se Tamaloa papalagi na alu atu e fa’atau i se faleoloa, i le mae’a ai lea ona ia fa’ao’olima ia te ia.

 

Na fa’atoese Va’avale i le fa’amasinoga e tusa ai o lana solitulafono, ma ia talosagaina ai ali’i fa’amasino mo se avanoa se’i toe fo’i atu ai i tua e tausi ona matua ma fai sona aoga i lona nu’u, aiga ma le Ekalesia.

 

E lei fa’atoese Va’avale i le Tamaloa palagi na a’afia, se’i vagana ai lona ta’utino i le fa’amasinoga e faapea, o masina e 10 lea sa taofia ai o ia i le toese e fa’atalitali ai le aso e lau ai lona fa’asalaga, ua mafai ai ona ia a’oa’oina se lesona taua mo lona olaga, ma ua ia iloa fo’i ua fai lea ma auala e toe fuata’ina ai lona mafaufau ina ia fai mea lelei i le lumana’i.

 

Na valaau e le loia a Va’avale ia Douglas Fiaui le Tama a le ua molia, mo le tu’uina atu o sana molimau i luma o le fa’amasinoga e uiga i lona atali’i, lea na ia talosagaina ai le fa’amasinoga mo se isi avanoa e tatala atu ai i tua lona atali’i se’i o latou mafuta, ae ua lava lea umi na taofia ai o ia i le falepuipui e fai ma a’oa’oga mo lona olaga.

 

Na finau Fiaui i le fa’amasinoga ina ia mulimulita’i i le fautuaga a le Ofisa Fa’anofovaavaaia lea ua tu’uina mai i le latou ripoti, ina ia fa’anofovaavaaia le ua molia, ina ia maua ai le avanoa e auai o ia i aoaoga fa’afaufautua e fesoasoani ai i le tulaga o le ita ma le solitulafono so’o.

 

“O masina e 10 lea na taofia ai o ia i le toese i Tafuna, ou te iloa ua lava lea ma totoe na te a’oa’oina ai se lesona aoga mo lona olaga, ma ua tatau fo’i ona ia iloaina, e le o ia o se tamaititi ae o ia o le tagata ua matua, ua tatau fo’i ona fa’amatua lona mafaufau ma fai filifilia sa’o i le lumana’i”, o le saunoaga lea a Fiaui.

 

Ae na taua e le loia a le malo ia Gerald Murphy e fa’apea, o se tasi lenei o mataupu pito sili ona matuia ua ia taulimaina, le mataupu e pei ona ta’usala ai le ali’i o Va’avale. E pei ona taua e Murphy, o le fa’alavelave na tula’i mai ina ua alu atu le Tamaloa palagi e fai lana fa’atau, ae o loo i ai ma Va’avale i totonu o le faleoloa i le taimi lea.

 

Na aga’i atu le ua molia ma talanoa i le tamaloa mo sina taimi, e lei umi ae vaaia loa le tu’i e le ua molia o le Tamaloa palagi na a’afia e aunoa ma se mafua’aga tatau, ma tifa ai le Tamaloa i le isi itu o le faleoloa, ae aapa atu le ua molia se’i ese mai lana masini laptop ma togi atu i le isi ali’i sa la to’alua, ma alu ai loa i le atoa le ali’i lea ma la laptop.

 

E 3 moliaga na ulua’i tu’uaia ai e le malo ia Va’avale, ae i lalo o le maliliega lea na latou sainia ma le malo ma talia e le fa’amasinoga, na ia tali ioe ai i le moliaga mamafa o le gaoi, ae solofua e le fa’amasinoga moliaga mama e lua sa totoe ai i le pepa o tagi sa fa’aulu e le malo, le moliaga o le fa’ao’olima i le tulaga tolu atoa ai ma le fa’atupu vevesi i nofoaga faitele.

 

Na finau Murphy i le fa’amasinoga ina ia fa’asala Va’avale i le umi e 28 masina, o le tasi vae tolu lea o le 7 tausaga o loo fa’atulaga mai e le tulafono e fa’asala ai se tasi e ta’usala i le moliaga o le gaoi.

 

Sa ia taua atili fo’i e fa’apea, e le o se taimi muamua lenei ua tu’uaia ai e le fa’amasinoga ia Va’avale i le moliaga o le fa’ao’olima, ona o lea fo’i sa tu’uaia o ia i le mataupu lea na manu’a tigaina ai se ali’i pagota i totonu o le toese i le fa’aiuga o le tausaga na te’a nei.

 

Na taua e Murphy e fa’apea, o le mataupu lea na manu’a ai le ali’i pagota, na tula’i mai ina ua fa’ao’olima i ai Va’avale ma le isi ali’i pagota, peita’i na finau le loia a Va’avale ia Fiaui e fa’apea, o le mataupu lea o loo finau mai ai le malo ua mae’a ona solofua e le fa’amasinoga fa’aitumalo.

 

O le fa’alavelave lea na manu’a ai le ali’i o Muaiga Siatiu poo Povi e pei ona iloa ai e le to’atele ao taofia i le toese, na mafua mai ina ua fa’ao’olima i ai ia Va’avale ma le ali’i o Mosegi Solia Jr, e ala i lo la fa’aaoga o se nofoa u’amea e sasa ai lona ulu ma ona foliga ma i’u ina manu’a tigaina ai lea ali’i, ma tu’uaia ai loa i laua e le malo i moliaga mamafa o le fa’ao’olima i le tulaga lua, fa’apea ai ma le moliaga mama o le fa’atupu vevesi i nofoaga faitele.

 

Ae i lalo o se maliliega na sainia e le malo ma Va’avale i le mataupu lea na tu’uaia ai o ia i le fa’ao’olima i le ali’i pagota, o le a ia tali ioe i le moliaga o le gaoi e pei ona ta’usala ai o ia i le mataupu lea ua fa’asala ai mei o ia, ae o le a solofua moliaga o loo totoe i le pepa o tagi sa fa’aulu fa’asaga ia te ia, e aofia ai le solofua e le fa’amasinoga o moliaga na afua mai i le mataupu lea na tu’uaia ai o ia i lona fa’ao’olima i le ali’i pagota.