Ads by Google Ads by Google

Fa’apuipui le ali’i na ia fa’ao’olima i lona tuafafine

ausage@samoanews.com

O le ali’i lea na ia fa’aaoga le au laupapa ua gau o se samala e ta ai lona tuafafine ao si’i e lona tuafafine lana pepe e le i atoa se tausaga le matua, ua poloaina e le Fa’amasinoga Fa’aitumalo le taofia o ia i le toese mo le umi e 14 aso, o se tasi lea o tuutuuga o lana nofovaavaaia e 24 masina.

 

O moliaga mama e 3 na ta’usala ai e le fa’amasinoga fa’aitumalo le ali’i o Nicholas Nauer i le taeao ananafi e aofia ai le fa’atupu vevesi i totonu o lona aiga, fa’ao’olima i le tulaga tolu, atoa ai ma lona faia o se gaioiga e ono lamatia ai le saogalemu o fanau e laiti i lalo o le tulafono.

 

O lenei fa’alavelave na tula’i mai ina ua fa’aaoga e Nauer le au laupapa ua gau o le samala e ta ai lona tuafafine a o si’i e lona tuafafine lana pepe, e mafua mai i lona ita i le leaga o le auala o lo o a’oa’o ai e lona tuafafine lana pepe.

 

E 22 tausaga le matua o le tuafafine a le ua molia na a’afia i lenei fa’alavelave, lea e nonofo fa’atasi uma lava ma o latou matua i le fale na tula’i mai ai le fa’alavelave.

 

Na umi se taimi o tu’i fesili e le afioga i le ali’i faamasino ia Fiti Sunia le ali’i o Nauer, i le taumafai lea o le fa’amasinoga e saili le mafua’aga autu o le fa’alavelave, aemaise ai le mafua’aga na ala ai ona ita le ua molia ma fasi lona tuafafine ona o lana pepe, ae na taua e Nauer e fa’apea, o lona ita i le tele o taimi e tagi ai le tama a lona tuafafine ae vaaia le nofonofo o lona tuafafine e le tago e faana lana pepe ma, e foliga mai e le o manatu mamafa o ia i le auala e a’oa’o ai lana pepe ina ia matua ane ae ua poto ma atamai, na mafua ai loa ona ia taina o ia i le aso na tula’i mai ai le fa’alavelave.

 

E ui na finau Nauer i le fa’amasinoga e lei siia e lona tuafafine lana pepe i le taimi na ia fa’ao’olima ai ia te ia, peita’i na fa’amaonia e le loia a le malo ia Woodrow Pengelly i le fa’amasinoga, sa si’i e le tama’ita’i na a’afia lana pepe i le taimi na ulufale fa’amalosi atu ai le ua molia i totonu o le potu ma ta o ia i le au laupapa o le samala.

 

Saunoa Sunia e fa’apea, e malamalama lenei le fa’amasinoga i le ituaiga auala Fa’a Samoa lea o lo o taumafai matua ma aiga e a’oa’o ma fa’afitauli ai fanau ma nai o latou tei, peita’i o le mataupu e pei ona tula’i mai, e foliga mai ua aia le ua molia i le auala o lo o a’oa’o ai e lona tuafafine lana tama.

 

“E leai sau feau e te aia ai fua i le auala o lo o a’oa’o ai e lou tuafafine lana pepe, atonu e mafai ona e fautua i ai i se auala filemu, ae le mafai ona e fa’aaoga le au o le samalama e momoli ai lou lagona i lou tuafafine”, o le fautuaga lea a Sunia fa’asaga ia Nauer.

 

Na talosaga le loia a Nauer ia Kate Hannaher i le fa’amasinoga mo se fa’asalaga fa’anofovaavaaia, ina ia mafai ai ona fa’aauau le tautua a le ua molia i lona aiga, ae afai e finagalo le fa’amasinoga e tu’u atu i ai se fa’asalaga fa’a falepuipui, na talosaga le tama’ita’i loia ina ia fa’amama se fa’asalaga fa’a falepuipui.

 

Ae mo le itu a le malo, na finau ai le ali’i loia ia Pengelly ina ia fa’asala Nauer i se fa’asalaga fa’a falepuipui, ona o le matuia o le gaioiga sa ia faia, o lona fasi lea o lona tuafafine ao si’i e lona tuafafine lana pepe e lei atoa se tausaga.

 

O le tausaga e 2015 na fa’anofovaavaaia ai e le fa’amasinoga fa’aitumalo ia Nauer mo le 18 masina, ina ua ta’usala o ia i le moliaga o le fa’aoolima ma le fa’atupu vevesi i nofoaga faitele, toe lava o ni nai aso mae’a lana fa’anofovaavaaia e 18 masina, ae alia’e loa le mataupu e pei ona ta’usala ai o ia ina ua ia fa’ao’olima i lona tuafafine i le masina o Me na te’a nei.

 

O ni isi o tuutuuga o le nofovaavaaia e 24 masina a Nauer, o le faasa lea ona ia toe soli se tulafono pe tagofia le ava malosi poo fualaau faasaina, a ia avea o ia ma tagatanu’u lelei e tausisi i tulafono a le malo.

 

Ua poloaina fo’i o ia na te tuliina aso e 15 i le toese i Tafuna, e aofia ai ma aso ia na taofia ai o ia ao fa’agasolo lana mataupu. O le aso Lua o le vaiaso fou, Iulai 4, 2017 ua fa’amoemoe e mae’a ai le fa’asalaga fa’a falepuipui a Nauer ma magalo ai i tua.