E tusa ai o le lisi o galuega tetele a le malo lea ua mae’a ona fa’alauiloa mai mo lenei tausaga, o loo fa’atulaga mai ai le ave o le fa’amuamua a le malo i le fausiaina lea o galuega atina’e mo le Ofisa o Aoga, lea e tusa ma le $22.9 miliona lona tau aofa’i, o lo o fa’atupe mai i tupe fesoasoani mai le malo tele i lalo o le polokalame mo Atina’e Tetele (Capital Improvement Projects).

O lea aofaiga e aofia ai le $14.6 miliona mo galuega tetele a le Ofisa o Aoga, ae $8.3 miliona mo galuega atina’e a le Kolisi Tu’ufa’atasi o loo fa’agasolo i le taimi nei.

O ia galuega tetele e aofia ai faleaoga fou mo aoga tulaga muamua, faleaoga fou mo le aoga maualuga ma aoga tulaga muamua, Ofisa fou mo le polokalame a le ERATE, pasi aoga ma meafale mo aoga e aofia ai nofoa, kesi ma laulau mo fanau aoga ma ofisa.

Na taua e le Fa’atonusili o Aoga ia Dr. Ruth Matagi-Tofiga i se pepa o fa’amatalaga i le Samoa News i le vaiaso na te’a nei, lona fa’afetaia o le afioga i le kovana ia Lolo Matalasi Moliga ma le faigamalo, ona o le naunau e ave le fa’amuamua i le fa’aleleia o atina’e tau i aoaoga, ina ia mautinoa e tulaga manuia le lumana’i o fanau aoga a le atunu’u.

I se tusi sa tu’uina atu e le susuga Jerome Ierome, o ia lea o loo fa’auluulu i ai le Ofisa o loo Vaavaaia Polokalame Faapitoa a le Kovana, atoa ai ma le Vaavaaia o Tupe mo Galuega Tetele sa tu’uina atu i Fa’atonusili ma Fa’auluuluga o Matagaluega ma Ofisa uma a le malo, sa ia fautuaina ai le tatau lea ona toe asiasi tulaga o galuega ma atina’e e tatau ona ave i ai le fa’amuamua a le malo mo le fa’atinoina.

Sa ia fautuaina fo’i le tatau lea ona tu’u fa’atasia o se lisi o galuega tetele uma ua fa’amoemoe e amataina i se taimi lata mai, ina ia mautinoa e fa’atulaga lelei fa’amaumauga e sauniuni ai i ni suiga e ono tu’uina mai i le konekeresi, ona o suiga o lo o fa’aauau pea ona fa’agasolo i lalo o le faigamalo fou a le ali’i peresetene ia Donald Trump.

E ese mai i galuega tetele mo le Ofisa o Aoga, o loo lona lua i le lisi o galuega o loo ave i ai e le malo le fa’amuamua galuega atina’e mo le Soifua Maloloina i le tau aofa’i e $44.9 miliona.

Mai le aofaiga atoa, e $14.2 miliona le tau atoa o galuega fa’atino mo le Matagaluega o le Soifua Maloloina, ae $30.7 miliona mo le Falema’i i Faga’alu.

O ni isi o galuega o loo lisiina mo le Matagaluega o le Soifua Maloloina, o lo o aofia ai se Falema’i (First Aid Station) i le tau e $150,000, ma se va’a e la’u mai ai gasegase mai le motu i le tau e $400,000.

O isi galuega mo le Soifua Maloloina e aofia ai le fausia o se fale e nonofo ai foma’i i Ta’u, Manu’a, fa’apea ai ma le toe fausiaina o le falema’i i Ta’u i lona nofoaga fou e tata ona i ai, ina ia aveese mai i le nofoaga o loo i ai nei, lea e faigofie ona lamatia i galulolo.

O galuega tetele mo le LBJ e aofia ai le toe fa’afouina o isi lala o le falema’i mai fale tuai o loo i ai, ina ia lelei nofoaga e fa’atinoina ai ana tautua eseese.

O lo o lona tolu i le lisi o galuega e tatau ona ave i ai le fa’amuamua a le malo galuega mo le atina’e atoa ai ma le tamaoaiga o le malo, aemaise lava i le Ofisa o Uafu ma Malaeva’alele.

Mai le tele o galuega toe fa’aleleia i uafu ma malaeva’alele, o le galuega pito taua o loo aofia i le lisi o le fausiaina lea o se Olo na te fa’atonutonuina femalagaaiga a Va’alele i le atunu’u (Air Traffic Control Tower) i lona tau e $15 miliona.

O le agaga atoa o le malo e pei ona fa’alauiloa i le lisi o galega tetele ma atina’e, ia maua pea le avanoa e fa’asolosolo malie ai le fa’atinoina o ana galuega tetele nei, fuafua lava i le tupe e fa’amatu’u mai e le malo fetarale mo Amerika Samoa.