Ads by Google Ads by Google

Fa’amanuiaga tau tupe mo le aufai fa’atoaga a le atunu’u


[ata: foa'i]
ausage@samoanews.com

Ua amataina nei le lesitalaina o suafa o le aufai fa’atoaga a le atunu’u ua i ai laisene, e agava’a ai i fa’amanuiaga tau tupe mai le Ofisa o Fa’atoaga a le malo tele i Amerika Samoa (USDA), e fesoasoani ai i le toe fa’atumuina o se vaega o tupe na latou fa’aalu i le tausia atoa ai ma le fa’aleleia o a latou fa’atoaga.

 

I se fa’atalatalanoaga ma le sui o le Vaega o Faatoaga a le Ofisa o Fa’atoaga a le malo tele i Pago Pago, Josephine Malepeai Lealasola, sa ia taua ai i le Samoa News le taua tele o lenei polokalame, e maua ai e le aufai faatoaga a le atunu’u ni nai fa’amanuiaga tau tupe e fesoasoani ai mo a latou atina’e.

 

“O le polokalame lenei e fa’atoa amata pe a maua mai se tupe mai le malo tele e fa’atupe ai, o le taimi lava fo’i e maua mai ai lea vaega tupe, o le taimi foi lena matou te logoina ai loa le aufai faatoaga ua lesitala (commercial farmers), ina ia aga’i mai e lesitala o latou suafa mo le polokalame”, o le saunoaga lea a Lealasola.

 

O le aso 17 Iulai e oo atu i le aso 8 Setema 2017 le umi lea ua fa’amoemoe e fa’agata ai le lesitalaina o suafa o le aufai fa’atoaga e agava’a, a o le i iloiloina e le Ofisa a latou pepa fa’atumu ma tu’uina atu loa vaega tupe e agava’a ai i latou.

 

E pei ona taua i se pepa o fa’amatalaga mai le Ofisa o Fa’atoaga a le malo tele e fa’apea, o le polokalame lenei, e fesoasoani ai i le aufai fa’atoaga uma lava i totonu o setete ma teritori e mamao mai nofoaga o lo o i ai auaunaga ma sapalai mo vaega e moomia i le fa’aleleia o fa’atoaga e pei o vailaau, mea faalelei eleele, mea faigaluega e fa’aleleia ai le fa’atoaga, e aofia ai foi ma le kesi o le ta’avale e la’u ai sapalai e fa’atau i faleoloa, maketi poo le polokalame a le school lunch.

 

E $8,000 le maualuga o le tupe e mafai ona agava’a i ai le fai fa’atoaga mo le toe fa’afo’iina atu, pe afai e mae’a ona tauaao lisiti e faamaonia ai vaega uma sa fa’atau mo le fa’aleleia o le fa’atoaga.

 

Saunoa Lealasola e fa’apea, e ui e le toe maua mai le tupe atoa sa fa’aalu e le fai fa’atoaga mo le tausiga o lana fa’atoaga, peita’i o le itu taua o lenei polokalame, ua mafai ai ona maua sina vaega tupe e toe fa’atumu atu ai le vaega tupe sa fa’aalu mo le fa’atoaga.

 

“O le itu lena e taua ai le tatau i le aufai fa’atoaga ona teu fa’alelei a latou lisiti mai fa’atauga sa faia mo le fa’atoaga, ina ia mafai ona fa’amaonia ai a latou gaioiga sa faia ma agava’a ai i latou i le polokalame”, o le saunoaga lea a Lealasola.

 

Talu ona amata mai lenei polokalame mo le aufai faatoaga a le atunuu i le silia i le 7 tausaga talu ai, ua molimauina lava le to’atele o ni isi o le aufai fa’atoaga ua agava’a i lenei polokalame, ma ua i ai fo’i i latou ua latou ausia le tupe maualuga e $8,000 o lo o fa’atulaga mai e le polokalame e tatau ona maua e le tagata fai fa’atoaga e to’atasi.

 

“O se tasi o itu o lo o maitauina e le matou ofisa, e i ai lava ni isi o le aufai fa’atoaga e faigata ona latou teu malu lisiti poo faamaumauga o fa’atau sa faia, o le mafua’aga lena e fa’atino ai a matou polokalame fa’a faufautua e leai se totogi mo le aufai fa’atoaga i ni isi o taimi o le tausaga, ina ia fa’ailoa atu ai ia te i latou vaega e tatau ona latou faatinoina ina ia agava’a ai i polokalame tau tupe fa’apenei mai le malo tele”, o le saunoaga lea a Lealasola.

 

I tausaga ua mavae talu ona amata mai lenei polokalame, e le toatele ni isi o le aufai faatoaga e agavaa i le polokalame, ma faia ai loa e le Ofisa aoaoga ma fautuaga mo le aufai faatoaga e aunoa ma se totogi, ina ia faailoa ai vaega e tatau ona latou faia, ma talu ona mae’a aoaoga a le Ofisa mo le aufai fa’atoaga, ua silia i le 30 tusi talosaga ua mae’a ona tu’uina atu i le taimi nei mo lenei polokalame, o se faaopoopoga tele lea mai tausaga ua mavae.

 

Saunoa Lealasola e fa’apea, e tauta tele i le aufai fa’atoaga a le atunu’u le teu fa’alelei o lisiti ma fa’amaumauga o fa’atau sa faia mo le tausia atoa ai ma le fa’aleleia o a latou fa’atoaga, ina ia agava’a ai i latou i polokalame nei i tausaga o i luma.