Ads by Google Ads by Google

Fa’afetaia Komesina Leoleo foa’i tupe mai ni isi kamupani i le atunu’u


Komesina o Leoleo, Le’i Sonny Thompson, sui sinia o le Oifsa o Leoleo ae maise sui o le kamupani va’a a le Matson i le aso Faraile ua te’a i le Ofisa o le Komesina e talia le foai $5,000 mai le Matson. [ata: AF]
ausage@samoanews.com

Na fa’aalia e le afioga i le Komesina o Leoleo a le malo, tofa Le’i Sonny Thompson i le aso Faraile na te’a nei le agaga fa’afetai, ona o le lagolago o lo o molimauina le tu’uina atu e le atunu’u atoa ai ma ni isi o kamupani ma pisinisi tua, e fesoasoani ai i le fa’atupeina o le Vaiaso Fa’apitoa lenei mo Leoleo i le atunu’u.

 

I le talia aloaia ai e Le’i o se foa’i tupe e $5,000 mai le kamupani vaa a le Matson i le vaiaso na te’a nei, na ia fa’aaogaina ai loa lea avanoa e fa’aleoina ai i le atunu’u le agaga fa’afetai i kamupani ma pisinisi, i lo latou manatu lea e fesoasoani atu i le fa’atinoina o le pito laau a le Matagaluega o Leoleo, e aofia ai ma lana fa’afetai i le foa’i tupe e $5,000 sa tu’uina atu fo’i e le Fale’aiga a le McDonalds mo lenei lava fa’amoemoe e tasi.

 

O se feiloaiga puupuu i luga o le Ofisa o le ali’i Komesina i le aso Faaraile na te’a nei, na mafai ai ona feiloa’i le Komesina ma Sui Sinia o le Matagaluega o Leoleo, faapea ai sui a le Matson i le atunu’u, lea na ta’ita’i atu e le Sui Peresetene ia Tuilaepa Vic Angow fa’apea ai ma ni isi o sui o le kamupani.

 

Na fa’ailoa e Le’i i sui o le Matson lagona fa’agae’etia o le Matagaluega o Leoleo, ina ua mafai ona latou mauaina lenei foa’i tupe tele mai le latou kamupani, e fesoasoani ai i le Vaiaso Fa’apitoa mo Leoleo i lenei tausaga.

 

“E leai ni tupe a le Matagaluega o Leoleo a lo tatou malo, matou te fa’alagolago tasi lava i tupe e maua mai i le faigamalo a Amerika Samoa, aemaise ai tupe fesoasoani o lo o maua mai i le malo feterale e fa’atupe ai la matou tautua i aso ta’itasi”, o le saunoaga lea a Le’i.

 

“O lenei fo’i tautua matou te le o mauaina mai ai lava se tupe poo se taui, e le o penefiti ai fo’i o matou aiga poo ni tagata ta’ito’atasi o le Matagaluega, pau la matou vaega e fai, o le fa’atino o matou tiute i lalo o le tulafono ina ia mautinoa o lo o malu puipuia le saogalemu o le atunu’u atoa ma ia fa’amalosia tulafono uma e pei ona tu’uina mai ia te i matou”.

 

“E leai se foa’i o nei foa’i uma ua matou taulimaina e la’ititi i la matou vaai, o foa’i tupe uma lava ua mafai ona matou taulimaina i lenei vaitaimi, e pei o la outou foa’i fa’apea ai ma le foa’i tupe e $5,000 sa maua mai fo’i i le kamupani a le McDonalds Family Restaurant i le vaiaso nei (vaiaso na te’a nei), ma e i ai le talitonuga ua outou faia nei foa’i uma ona o lo outou talitonuina o la matou auaunaga i le atunu’u”, o le saunoaga lea a Le’i.

 

“E pei ona maitauina i le tele o tausaga le tele o le sao a kamupani ma pisinisi tua i soo se fa’agaioiga a le malo, e le gata i aoaoga ae o isi lava polokalame fai o lo o molimauina ai le sao o pisinisi ma kamupani i le malo, i lo’u la taofi, e le fou le galulue soosoo tauau o vaega nei e lua i soo se itu e fa’aleleia ma lagolago ai i le pito laau a le malo poo kamupani fo’i ma pisinisi tua”.

 

I le saunoaga e tali fuaitau ai i le saunoaga a Le’i, na taua ai e le afioga Tuilaepa le naunau o le kamupani e tu’uina mai sana fesoasoani i le tautua a le Ofisa o Leoleo, ae ua talafeagai lelei lava ma le Vaiaso Fa’apitoa o Leoleo i le vaiaso nei.

 

“E le o se meaalofa tele lenei meaalofa ua tu’uina mai e le Matson, peita’i o le agaga maualuga i lenei kamupani, o le fia momoli mai lea o le fa’afetai i le Matagaluega o Leoleo e tusa ai o la outou tautua o lo o fa’aauau pea mo le atunu’u. E le faigofie la outou tautua i le ao ma le po, ua tele fo’i taimi tatou te galulue fa’atasi ai ma ua molimauina ai la faigata o la outou galuega o lo o fa’atinoina nei, ae avea ia lenei meaalofa o se auala matou te fa’afetai atu ai ia outou e tusa ai o la outou tautua”, o le saunoaga lea a Tuilaepa.

 

Sa ia saunoa atili fo’i e fa’apea, “O se tasi lenei o fa’anaunauga o le Kamupani a le Matson, ua tele le sao o le atunu’u i le lagolagoina o la matou kamupani, ma ua tatau ai ona i ai se vaega matou te toe fa’afo’i atu i le atunu’u e fa’ailoa ai lo matou agaga fa’afetai i le latou lagolago. E le mafai ona ola se pisinisi pe a leai le atunu’u latou te lagolagoina”.

 

“Avea ai fo’i a’u e fai ma sui o le Peresetene faapea ai ma le pulega atoa a le kamupani a le Matson matou te fa’amanuia atu ai le vaiaso fa’apitoa o Leoleo ia te outou uma faapea ai nai o outou aiga, ina ia outou maua se vaiaso fiafia ma le manuia e ala i fa’agaioiga eseese o le a fa’atinoina”.

 

I le saunoaga a le tofa Le’i e fa’atatau i le polokalame fa’ataoto a le Ofisa o Leoleo mo le vaiaso atoa lenei, sa ia fa’amanatau ai i sui o le Matson le tele o le sao o Leoleo i le tausiaina lea o le filemu atoa ai ma le saogalemu o le atunu’u lautele.

 

“O le taua fo’i lena o le vaiaso faapitoa lenei mo Leoleo ua fuafuaina, e le gata e maua ai se taimi e mafuta fa’atasi ai ma nai o latou aiga, ae o se avanoa lelei fo’i lea e mafuta fa’atasi uma ai le aufaigaluega ma iloa atili ai e le isi le taimi, e ese mai i totonu o le nofoaga o lo o faatinoina ai galuega”, o le saunoaga lea a Le’i.

 

O ni isi o polokalame fa’aopoopo e pei ona fa’ailoa e Le’i mo le vaiaso fa’apitoa lenei o Leoleo, e aofia ai le Police Prom lea ua fa’amoemoe e faia i le po o le aso Faraile i le maota o le Fale Laumei i Utulei, lea o le a maua ai fo’i le avanoa o ali’i ma tama’ita’i Leoleo e fiafia ai ma o latou aiga, aemaise ai Ta’ita’i o le Matagaluega.

 

“E valaau atu ai ma le fa’aaloalo i le mamalu o le atunu’u, fa’apea ai uo ma aiga ina ia afifio mai tatou auai fa’atasi i le lagolagoina o soo se polokalame ua fuafuaina mo le matagaluega o Leoleo i lenei vaiaso atoa, ina ia fa’ailoa ai lo tatou tutu fa’atasi e lagolago i le tautua ma le auaunaga a au tama fanau o lo o ofoina atu mo le atunu’u”, o le saunoaga fa’ai’u lea a Le’i.

 

O le sauniga lotu sa fa’ataunu’uina i le malumalu o le Ekalesia EFKAS i Fagaalu i le afiafi ananafi na tatala aloaia ai le polokalame mo le vaiaso faapitoa mo Leoleo a le malo.