Ads by Google Ads by Google

E le o se Fale Fa’amasino le Senate ae o le maota saili ai tofa


Le taimi na lulu aao ai le afioga i le ali’i Senatoa ia Tuaolo M. Fruean ma le Fa’atonusili o le Matagaluega o Tautua ma Auaunaga Lautele, tofa Taeaoafua Dr. Meki Solomona. [ata AF]
ausage@samoanews.com

Na fa’ailoa e le afioga i le ali’i Peresetene o le Senate ia Gaoteote Palaie Tofau i le taeao ananafi, i le taimi o le iloiloga a le maota e fesiligia ai tofiga a le kovana a le tofa Taeaoafua Dr. Meki Solomona e avea ma Fa’atonusili o le Matagaluega o Auaunaga ma Tautua Lautele a le malo e fa’apea, e le o se fale fa’amasino le Senate e fai ai ni fa’asalaga o tagata, ae o le maota e sasa’a ai le tofa ma saili i ai fa’aiuga lelei mo le manuia o le atunu’u.

 

O lea saunoaga mai le ali’i peresetene, na afua mai ina ua tele fesili a afioga i senatoa i le molimau fa’asaga i le mataupu lea o loo vavao ai le atunu’u, e fa’atatau i ni saunoaga sa ia lafo i se tagata faigaluega a lona Ofisa, i se fonotaga sa faia ina ua mae’a le palota i le masina o Novema 2016, atoa ai ma le talosaga mai le afioga i le ali’i senatoa ia Taua’a Vaouli, pe maua atu le tape lea sa pu’e ai le mataupu atoa e pei ona pisa ai le to’atele.

 

Saunoa atili Taua’a e fa’apea, e mafua ona ia fia fa’alogologo i le tape sa pu’e ai le mataupu o loo fesiligia, ona e le’i fa’alogologo ai lava o ia.

 

Na manino fo’i i saunoaga a ni isi o afioga i senatoa lo latou mauaina lea o le kopi o se tusi sa tufatufa e se tama’ita’i, lea o loo talosagaina ai afioga i senatoa ina ia silasila toto’a i le mataupu e pei ona tula’i mai, atoa ai ma se fa’aiuga latou te faia fa’asaga i tofiga a le kovana.

 

O le tusi e pei ona taua na tusia lea e le susuga a Nikolao Iuli Pula Jr, lea sa ia talosagaina ai le ali’i peresetene ina ia silasila toto’a i le mataupu e pei ona tula’i mai ia Taeaoafua ma se tasi o ana tagata faigaluega, o se tasi fo’i o lona aiga, lea o loo taua ai le lafo e Taeaoafua o upu mamafa atoa ai ma le fa’ate’a o le tagata faigaluega.

 

Na talosagaina atili e Nikolao le ali’i peresetene ina ia silasila toto’a i ituaiga tagata fa’apenei, pe talafeagai ona filifilia e avea ma ta’ita’i.

 

Na fesili le afioga a Alo Fa’auuga ia Taeaoafua pe sa ia maua se kopi o le tusi, ae na tali le molimau e leai. Sa ia saunoa atili fo’i e fa’apea, soo se mataupu lava e lua ona itu.

 

Saunoa Tuaolo M. Fruean e fa’apea, o molimau uma lava o loo autova’a atu i luma o le maota e iloilo ma fesiligia, “o alo o le atunu’u ua i ai le agava’a ma ua filifilia fo’i e fai ma ta’ita’i o Matagaluega a le malo”, ma, talu fo’i ona amata mai iloiloga a le maota, e leai lava se tofiga a le kovana ua teena e le maota.

 

“Afai tatou te teena tofiga a le kovana, lona uiga ua tatou teena alo o le atunuu o loo i ai le agava’a e avea ai ma ta’ita’i mo le malo”, o le saunoaga lea a Tuaolo.

 

Na si’isi’i i luga le si’ufofoga o Tuiagamoa Tavai ina ua ia saunoa e fa’atatau i le mataupu e pei ona a’afia ai le suafa o le Fa’atonusili ma se tagata faigaluega, ona e i ai lona talitonuga, e na o le tasi le itu o le mataupu lea ua alia’e i luga, e na o saunoaga a le Fa’atonusili sa lafo, ae le o aumaia tala sa lafo e le tagata faigaluega na a’afia.

 

Saunoa Tuiagamoa e faapea, o le fetaliaiga i le va o le fa’atonu ma le tagata faigaluega na a’afia, ua atagia mai ai le le fa’aaloalo o lenei ali’i i lona pule.

 

“Fa’atoa ou fa’alogo lava lea i se tamaititi ua le fa’aaloalo i ta’ita’i o le atunu’u ma le malo, ua ia fa’amaasiasi oe i luma o le aufaigaluega, e leai fo’i se eseesega o le mataupu lenei ma le va o le matai i lona aiga, e tatau ona ‘ava le aiga i le matai”, o le saunoaga lea a Tuiagamoa.

 

Na fa’afetaia e Fa’amausili Mau Jr le avanoa ua toe filifilia ai Taeaoafua e avea ma Fa’atonusili, fa’atasi ai ma lana fautuaga ina ia alofa i le aufaigaluega ma fai pea galuega lelei mo le atunu’u.

 

Saunoa Gaoteote e fa’apea, e le aumaia le sese e tasi e fa’aleaogaina ai le tele o galuega lelei sa faia mo le atuu’u i tausaga e tele ua mavae. Sa ia toe fa’amanatu fo’i i le maota tulafonoo loo lima ta’ita’iina ai galuega a le maota i tulaga o tusi mai tua, e le tatau ona aloaia i luma o le maota se’i vagana ua ia tuuina mai se fa’atanaga e aloaia ai le taliaina o tusi fa’apenei.

 

Na fa’amanatu e Faiivae Iuli Godinet ia Taeaoafua le mafua’aga o lona suafa matai, lea e atagia mai ai le toe afua o se tasi fou i se fa’aletonu ua tula’i mai, ae na saunoa Paepae Fai’ai e faapea, e taua le fa’aalu o aso o le olaga e alofa ai i se isi tagata, nai lo le fa’aalu o aso o le olaga e fa’amasino atu ai.

 

Na fa’amatua fa’atumulia luga o le maota o le senate i le aufaigaluega a le ali’i fa’atonu, fa’apea ai ma sui o le aiga o le ali’i na a’afia i le mataupu a le ali’i fa’atonu.

 

Ua aloaia nei le avea o Taeaoafua e toe avea ma Fa’atonusili o lea Ofisa, ina ua pasia o ia e le senate i le palota e 15-3.