Ads by Google Ads by Google

E LE O OE O SE SULI MONI - XXXI

ausage@samoanews.com

Na motu fa’afuase’i le talanoaga a le Tupu ma le teineititi pologa ina ua fa’atonu e le Tupu ana auauna e tapena atu le la taumafataga ma le teineititi pologa se’i o la ‘aai fiafia ai, ua alu le aso ma ua lagona fo’i le fia ‘ai, ma o le taimi fo’i lea na vaaia ai e le teineititi pologa le pisi o auauna i le tapenaina atu o le la taumafataga ma le Tupu, ma ua vaaia fo’i foliga fiafia o le Tupu i le taimi o le la taligasua. Ao faia le taumafataga, sa vaaia e le teineititi pologa foliga fiafia o le Tupu i le la mafutaga, ma ua oso a’e ai se manatu ia te ia, o le a ia fesiligia le Tupu i le mafua’aga ua ia fa’atagaina ai o ia la te talisua fa’atasi i lona maota, ae o loo fa’aigoa o ia o se teineititi pologa, e le taualoa ae ua na o se teineititi mativa.

 

Ua mae’a le taligasua ona fa’atonu lea e le Tupu ana auauna ina ia aga’i e se atu mai le potu, ae se’i toe fa’aauau le la fa’asoa ma le teineititi pologa o Ianeta.  “Lau afioga i le Tupu, o la’u talosaga lena ma lo’u loto maualalo, tu’u maia a’u ou te nofo i lou malo ma ou tautua o se tasi o tagata pologa, ae fa’asa’oloto Meki ma ana auauna, o i latou o ni tagata alolofa ia te a’u”. Na umi se taimi o fa’atau pupula le Tupu i le teineititi e aunoa ma sana tala, se’i vagana ai le fa’anunumi o lona muaulu e foliga mai o loo i ai se tupua o loo ia taumafai e mate. O le umi ona nofo o le Tupu fa’atasi ai ma le teineititi pologa e aunoa ma se isi e gagana i se upu, na mafua ai ona toe fesili le teineititi i le Tupu, “Lau afioga i le Tupu, e i ai le fesili lea ou te fia fesili atu ai i lau afioga, atonu e maua mai ai se tali fiafia mo a’u”, o le oso fiafia atu lea a le teineititi pologa ma ona foliga fiafia, ona nofo sa’o lea o le Tupu ma fa’apea mai, “O le a lena mataupu e te fia fesili mai ai”, o le fesili atu lea a le Tupu, ae na tali le teineititi pologa e fa’apea, “Sa ou fiamalamalama pe aisea lava ua e alofa mai ai ma tu’u mai lenei avanoa fa’aauro ta te talisua ai ma lau afioga a le Tupu i totonu o lou maota”, o le talanoa atu lea a le teineititi pologa ma lona naunau talosia ae mafai e le Tupu ona ia fa’ailoa mai le mea moni o loo i lona loto ua mafua ai ona ia tu’u atu le avanoa la te talisua ai i lona maota.

 

“Vaai oe Ianeta, e le faigofie i lo’u loto lenei mataupu, ae ao pea ona ou fa’asoa atu. I tausaga e tele ua mavae atu, sa avea ai lou grandfather o se tasi o au uo mamae, e pei lava i maua o se uso i le tele o aso, e mafuta fa’atasi ma tafafao fa’atasi. Sa masani ona ou alu atu i lona fale i le taimi e te lei fanau mai ma ma mafuta ai, o isi lava aso e toeititi atoa le vaiaso o o’u nofo ai ma ou tafao ai i lona fale seia oo loa i se tasi aso ao ma galulue i lana fa’atoaga, na fa’afuase’i ai ona ma vaaia lona afafine sa galue o se teine tausima’i i le falema’i ua alu atu i le fale ma afisi atu se pepe aulelei, ma tamoe atu ma ona foliga fiafia ma fai atu i lona Tama, “Papa, ua maua si a’u tama teine e tausi”. Na fesili le toeaina i lona afafine, “O ai e ana lena pepe ua e sau ma oe”, ae na tali lona afafine ma ona loimata, “Papa, o le pepe lenei a se tasi o Tina meauli na maliu i le taimi na fanau ai, ma ou talosaga ai loa i le pule o le falema’i e aumai ma a’u le pepe ou te tausia i lo’u aiga”. O le fa’amatalaga lea a le Tupu, ae sa na o le fa’alologo o le teineititi o Ianeta e aunoa ma se pisa. “Na oso fiafia atu lou grandfather ma afisi mai le pepe i ona lima ao o’u tu ai i tafatafa, ona ia fesili lea i lona afafine tausi ma’i, o ai le igoa o le pepe, ae na tali lona afafine, e le’i maua se igoa. Na faliu mai le toeaina ia te a’u ma fai mai, e i ai se igoa manaia se’i fa’aigoa ai si o’u afafine, ona ou tali atu loa lea i le toeaina, fa’aigoa lou afafine ia IANETA, o le igoa lena o si o’u afafine pele e to’atasi na ave fa’atagata o taua e tagata faomea o le malo. O le mafua’aga lena o lou igoa ia Ianeta, e fa’amanatu ai si o’u afafine ua oti”.