Vaega 69

O le mae’a ai o le feiloaiga aloaia a le Ofisa o Leoleonana i totonu o le malo ma le tamaloa o Meki ma lana aumalaga, na toe filifilia ai loa Meki e fa’aauau pea le avea o ia ma Ta’ita’i o le Ofisa i totonu o le aai, le tofiga ua silia i le 20 tausaga o ia tauaveina mai, ma ua fa’aopoopo fo’i isi ana tama fa’apitoa e to’a 4 ina ia atoa ai le to’a 8 o lana vaega e vaavaaia ma faamalosia le suesueina o faiga faasolitulafono faalilolilo i totonu o le atunu’u. O le afiafi ina ua sauni Meki ma lona aiga o le a fo’i atu i le fale, ae fa’ateia le ulugali’i ina ua musumusu atu le teineititi pologa o Ianeta ia tei laua, mo se avanoa latou te toe asia ai le nofoaga lea sa latou paka ai i le taeao. “Ianeta, e i ai se mafua’aga ua e mana’o ai tatou te toe asia luma o le pa e ulufale ai i le fale o le fafine saua o Mekala ma lona to’alua sa la agaleaga ia te oe”, o le fesili atu lea a le fafine faiaoga o Lucy ia Ianeta, ae sa na o le pupula fa’anoanoa o le teineititi pologa ma toe musumusu atu i le fafine faiaoga o Lucy, “Ioe Lucy si o’u Tina, e i ai lava o’u lagona i le ali’i meauli lea sa tatou vaaia o aga’i atu i totonu o le lotoa, ina ne’i i ai se fa’aletonu e tupu ia te ia”, o le toe tali atu lea a le teineitiiti pologa.

Ona o le tamaloa o Meki ua masani i tulaga o su’esu’ega i fa’alavelave fa’apenei, sa ia manatu ai e talia le talosaga a le teineititi pologa, ma ia savali atu ai loa ua fa’aola le ta’avale ae valaau atu i lona to’alua ma Ianeta ina ia fa’anatinat atu latou te asia le nofoaga e pei ona naunau i ai le teintititi. Manatua fo’i o lea ua atoa le aso talu ona i ai le aiga i le nofoaga sa faia ai le feiloaiga ma le Ofisa a Meki, peita’i na fa’ateia i latou ina ua taunu’u atu i luma o le pa, ma latou vaaia ai le ta’avale lea na alu atu ai le ali’i meauli o loo tu mai pea i luma o le fale a le ulugali’i o Mekala ma lona to’alua o Pulusi, pau le itu lea ua maitauina e le aiga, ua ese le itu lea ua paka mai ai le ta’avale, e foliga mai o lea ua paka mai i le itu i tua o le fale, le itu e tau le iloa atu i luma o le auala. “Vaai oe Meki si o’u Tama, e pei lava ou te iloa e i ai se mea ua tupu i le ali’i meauli lea sa sau i le ta’avale, ua leva na tatau ona toe fo’i o ia i le mea na sau ai, sa paka fo’i lana ta’avale i luma o le fale, ao lea ua ou vaai atu ua paka mai le ta’avale i tua, e foliga mai e i ai se mea o loo tupu ia te ia”, e fai lava tala a le teineititi meauli o Ianeta ma oso i fafo o le ta’avale, ona ia savali lea i le isi itu o le pa ma taumafai e falo lona ulu i totonu pe na te tau iloa atu ai ni isi i totonu. “Ianeta si o’u afafine, e sili pe a fai le tonu, o le a ou alu e momoli oulua ma lou Tina i le fale e te lua fa’atali mai ai, ona ou toe fo’i mai ai lea e piki mai ni tama se to’alua o la’u vaega, matou te galulue e tau saili le mafua’aga ua ala ai ona paka umi le ta’avale a le ali’i meauli lea i totonu o le lotoa”.

E malu ane loa le afiafi ae afe loa le isi ta’avale a le vaega a Meki i totonu o le lotoa, ma taumafai ai loa ali’i ia e to’alua e fesoota’i i luga o le fale pe tali mai se isi. E lei umi ae vaaia le savali mai i lalo o se fafine ma ona foliga saua, ma ia fesili i ali’i o loo tutu atu i fafo o le ta’avale i le mafua’aga ua la soli ai le lotoa ma le fanua. “E le tatau ona toe uia e se tagata le lotoa lenei pe afai e tuana’i taimi faigaluega, o le mafua’aga lena o lo’u fia iloaina o le pogai ua mafua ai ona oulua ulufale mai i totonu o le lotoa”, o le avaavau atu lea a le fafine saua o Mekala i ali’i Leoleonana e to’alua o loo tutu i fafo o lona fale, ae sa tali atu i ai le isi o i laua, “Tina, ua mafua ona ma soliina mai lou lotoa ona o lea o loo paka mai le isi ta’avale lea a le matou Vaega i le pito i tua o lou fale, ma te fia iloa fo’i le mafua’aga ua ala ai ona paka umi le ta’avale lea i tua o lou fale, ae o ai fo’i na malaga mai i le ta’avale lenei”.