Vaega 54

Na umi se taimi o fefa’amalosia’i le ali’i pologa ma le tamaloa o Meki, ona o le naunau o le ali’i pologa ia aua ne’i fa’avaivai Meki a ia fa’amalosi pea lava ina ia mautinoa e mafai ona sao ese atu mai totonu o lenei nofoaga pologa. Manatua fo’i le aufaitau, o le umi talu ona alu ese mai le solaaga a Meki mai totonu o le malo lenei o tagata pologa, o le umi fo’i lena talu ona ta’amilo solo fitafita a le tupu saua o Eteuati II i atumauga ma le vaomatua i le fia mauaina lea o le tamaloa o Meki fa’apea ai ma le tagata pologa lea fo’i ua sola ese mai i totonu o le malo, o ia lea o lo o masalomia sa ia fesoasoani i le fa’asolaeseina mai o le tamaloa o Meki. Ao taumafai le ali’i pologa e fa’aloto ia Meki, na fa’afuase’i ona la fa’alogoina le pa pa mai o fana mai le isi itu e le mamao ese mai le nofoaga o loo la malolo ai. O le te’i o Meki i le pa pa o fana na mafua ai ona toe fa’alototele lona loto ina ia fa’aauau pea le solaaga ina ne’i toe maua atu i laua ona atili ai loa lea ona faigata le mataupu. “Pei uma lava ou te fa’alogo atu o fana ia a fitafita a le tupu saua o Eteuati II lea o loo fa’a pa pa mai i le itu lea o le mauga, ae ua tatau ona faia se ta gaioiga ina ia mafai ai ona fa’asaoina i taua”, o le talanoa fa’amalosi atu lea a le ali’i pologa ia Meki ma ia taumafai e fa’atu i luga le ali’i ona ua lagona lona mafatia i ona vae, ua tau le mafai ai ona savali ina ua lagona le vaivai mai le vaiaso atoa na sau ai le solaaga.

O le ali’i pologa lea o lo o to’alua ma Meki, ua masani o ia i soo se vaega o le vaomatua, ma ua ia loaina lelei lava le gaioiga e tatau ona faia i le taimi lea, o lea na ia fai atu ai loa ia Meki, “Vaai oe Meki, o le a e fa’atali lelei atu i lalo o le laau lenei, aua e te pisa pe e te savali i se isi lava itu, tau lava o lou nofo ma vaavaai pe i ai ni tagata e aga’i mai i le vaega lenei, ae se’i o’u ta’amilo atu i le itu le la o le auvae mauga e vaavaai pe toafia fitafita a le tupu o loo aga’i mai i le itu lenei o loo ta i ai”, e fai lava tala a le ali’i pologa ma tago atu i lana fulu a u ua fa’afafa i lona tua, ona tamo’e televave atu loa lea i le isi itu o le mauga ma taumafai e saili sona auala e sao atu ai i le itu lea o lo o pisa mai ai fitafita a le tupu, ae o se itu na fa’ateia tele ai le ali’i polgoa, ona e fetaui lava lona taunu’u atu i le isi tama’i mati’e ae tau atu loa ma lana vaai i se tagata e le o se fitafita, o lo o savali to’atasi mai i le isi itu o le togavao e foliga mai o se tagata ese e le masani i le vaega o le vaomatua lea o lo o i ai. Na tasi lava le masalosalo a le ali’i pologa lenei, e foliga mai o se tasi lenei o tagata o le vaega a le tamaloa o Meki lea sa fa’asa’oloto muamua e le tupu o Eteuati, lea o loo toe taumafai e saili se auala e toe o’o atu ai i totonu o le aai e fa’asao ia Meki. O le popole o le ali’i pologa ina ne’i maua e fitafita le ali’i lenei, na mafua ai loa ona ia fana se fa’ailoilo i le vaega tonu o loo savali mai ai o ia, ma e le’i pine ona fana e le ali’i pologa le fa’ailoilo ae iloa mai loa o ia e le tagata lenei, ma taumafai atu ai loa le ali’i pologa e fai atu i ai ni gaioiga e iloa ai, e le o sagalemu le nofoaga o lo o i ai, peita’i na tuai gaioiga a le ali’i pologa ae fa’afuase’i loa ona iloa atu e fitafita e to’alua a le tupu saua le tagata lenei ma la osofaia ai loa o ia, ua saisai ona la toso lea aga’i i lalo o se tasi o laau tele lava ma le fa’amoemoe o le a fasiotia ai o ia, peita’i o le poto masani o le ali’i pologa i auala e osofa’i ai manu feai pe a oo i le taimi o a latou tuliga i totonu o le vao matua, na pei ai o le selo i lona mafaufau le auala na ia fasiotia ai ali’i fitafita e to’alua ia sa laua pu’e fa’apagota le ali’i lenei, ina ua ia tafanaina o la muaulu i ana fulu a u ma pei ai o le fiti ese o ni meaola le tau fai fiti solo o le au ali’i nei ina ua lavevea ma maua ai loa le avanoa o le ali’i pologa na te maua ai ona fili ua leva ona ia taumafai e saili se auala e maua ai.